Oblahii kɛ Oblayei Náa Asafoŋ Kpeei Ahe Sɛɛ

¹ Gbekɛ yoo ko ni eye afii 13 kɛmiimɔ afii 19 lɛ kɛɛ akɛ: “Bei komɛi lɛ, misusuɔ akɛ oblahii kɛ oblayei ji mɛi ni kɛ shihilɛ ni mli wa fe fɛɛ kpeɔ. Wɔyɛ mɛi ni bɔɔ ajwamaŋ, ní kɛ tsofai tsuɔ nii yɛ gbɛ ni ejaaa nɔ, ní nuɔ dãa waa lɛ ateŋ.” Ani nakai ji bɔ ni onuɔ he? Kɛ́ nakai ni lɛ, mɛni osusuɔ akɛ no baaye abua bo koni owu oshi nibii fɔ̃ji nɛɛ? Ehe miihia ni oná hemɔkɛyeli, hemɔkɛyeli ni mli wa akɛ nibii ni Yehowa kɛɔ wɔ akɛ wɔfee lɛ ja, ejaakɛ kɛ́ obɛ hemɔkɛyeli lɛ, ‘onyɛŋ Nyɔŋmɔ hiɛ osa.’ (Heb. 11:6) Asafoŋ kpeei ni oooya lɛ baaye abua bo koni owaje hemɔkɛyeli ni oyɔɔ akɛ Kristofonyo lɛ, ni ebaawaje ofai shi ni otswa akɛ ofeŋ efɔŋ lɛ.

² Obaanyɛ Oná Kpeei Ahe Sɛɛ Babaoo: Mɛni hãa niyenii ni ŋɔɔ ni akɛ nanemɛi kpakpai yeɔ lɛ feɔ miishɛɛ? Niyenii lɛ, kɛ bɔ ni afeɔ ekome kɛyeɔ kɛ miishɛɛ lɛ, aloo jeee nakai? Wɔkpeei lɛ hãa wɔnáa shihilɛ ni tamɔ nɛkɛ, shi yɛ mumɔŋ shishinumɔ naa.

³ Nibii ni awieɔ yɛ asafoŋ kpeei ashishi lɛ tswaa mɔ emaa shi; ekomɛi kɔɔ bɔ ni wɔɔfee wɔtsu daa gbi shihilɛ mli naagbai ahe nii lɛ he, ni ekomɛi hu kɔɔ Biblia mli gbalɛi ni yɔɔ miishɛɛ ahe. Akɛ gbɛtsɔɔmɔ ni baaye abua bo ni oná shihilɛ gbɛ ni hi fe fɛɛ, ni onyɛ okpee shihilɛ mli naagbai ni okɛkpeɔ lɛ anaa lɛ hãa. Nanemɛi ni wɔkɛkpeɔ yɛ asafoŋ kpeei ashishi lɛ ji nanemɛi ni hi fe fɛɛ ni wɔbaanyɛ wɔná, ni ekomefeemɔ kɛ suɔmɔ ni yɔɔ nyɛmimɛi lɛ ateŋ lɛ hãa wɔnáa miishɛɛ, ni wɔnuɔ he akɛ wɔyɛ shweshweeshwe. (Lala 133:1) Ŋwanejee ko bɛ he akɛ, enɛ ji nɔ ni hã oblayoo ko wie akɛ: “Miyaa skul gbi muu lɛ fɛɛ, ni enɛ hãa etɔɔ mi. Shi asafoŋ kpeei lɛ tamɔ hejɔɔmɔhe yɛ ŋa nɔ, ehãa mináa hewalɛ hee koni manyɛ makpee shihilɛi ni mikɛbaakpe yɛ skul enɔjetsɛremɔ lɛ anaa.” Oblayoo kroko hu kɛɛ akɛ: “Mina akɛ naanyobɔɔ gbagbalii ni kã mi kɛ mɛi krokomɛi ni sumɔɔ Yehowa lɛ ateŋ lɛ yeɔ ebuaa mi koni mahi emasɛi.”

⁴ Kɛ́ okɛ ohe wo Teokrase Sɔɔmɔ Skul lɛ mli lɛ, okaseɔ bɔ ni ataoɔ Biblia mli saji amli, bɔ ni atoɔ he gbɛjianɔ, kɛ bɔ ni ahãa lɛ akɛ wiemɔ yɛ Maŋtsɛyeli Asa nɔ. Bo lɛ kwɛmɔ bɔ ni tsɔsemɔ ni akɛhãa bo koni onyɛ okɛ hesaa atsɔɔ mɛi Nyɔŋmɔ Wiemɔ lɛ mli anɔkwalei ni hereɔ mɔ yiwala lɛ he yɔɔ sɛɛnamɔ hã! Nɛgbɛ kwraa oblahii kɛ oblayei baanyɛ aná tsɔsemɔ kpakpa ni tamɔ nɛkɛ yɛ?

⁵ Bɔ ni Ooofee Oná Asafoŋ Kpeei Ahe Sɛɛ Jogbaŋŋ: Kɛ́ obaaná asafoŋ kpeei ahe sɛɛ jogbaŋŋ kɛmɔ shi lɛ, nibii etɛ komɛi yɛ ni esa akɛ ofee. Nomɛi ji hesaamɔ, ohe ni okɛaawo mli, kɛ nɔ ni okaseɔ lɛ ni okɛbaatsu nii.

⁶ Saamɔ Ohe: Too be ni okɛsaa ohe kɛhã kpeei lɛ be fɛɛ be. Kaahã skul nikasemɔ, be fã nitsumɔ, loo hiɛtserɛjiemɔ hé be ni esa akɛ okɛsaa ohe kɛhã nibii ni abaasusu he yɛ asafoŋ kpee lɛ eko fɛɛ eko shishi lɛ. Kɛ́ onyɛɔ osaa ohe be fɛɛ be lɛ, obaaná he sɛɛ. Klɛŋklɛŋ kwraa lɛ, bɔɔ mɔdɛŋ ni okɛ daa otsi Biblia kanemɔ he gbɛjianɔtoo kɛhã Teokrase Sɔɔmɔ Skul lɛ anyiɛ pɛpɛɛpɛ. Kɛ́ ohe minitii fioo ko kɛkane yitsei ni akɛhã lɛ eko daa gbi, ni ojwɛŋ nɔ lɛ, obaanyɛ ogbe fɛɛ naa. Too be ni okɛsaa ohe kɛhã Asafoŋ Biblia Nikasemɔ lɛ kɛ Buu-Mɔɔ Nikasemɔ lɛ. Mɛi komɛi feɔ enɛ kɛ́ hooo lɛ gbi kome loo gbii enyɔ dani kpee gbi lɛ shɛɔ. Bɔɔ mɔdɛŋ ni ofee nakai nɔŋŋ daa otsi kɛhã Sɔɔmɔ Kpee lɛ mli nifeemɔi lɛ.

⁷ Okɛ Ohe Awo Mli: Biblia lɛ kɛɔ akɛ, be ni Yesu ye afii 12 lɛ, ana lɛ yɛ sɔlemɔwe lɛ ní eebo saji atoi, eebibii saji, ni eehã saji ahetoo. (Luka 2:46, 47) Kɛ́ wɔɔwie he yɛ gbɛ kroko nɔ lɛ, ekɛ ehe wo nifeemɔ ni yaa nɔ yɛ jɛmɛ lɛ mli kwraa. Kɛ́ obɔ mɔdɛŋ okɛ ohe wo kpeei lɛ amli lɛ, obaaná he sɛɛ babaoo.​—Abɛi 15:23.

⁸ Ehe miihia ni obo nibii ni atsɔɔ yɛ kpeei lɛ ashishi lɛ atoi jogbaŋŋ. Bei komɛi lɛ, wiemɔ toiboo wa fe ehãmɔ. Mɛni hewɔ? Ejaakɛ ojwɛŋmɔ baanyɛ akpa shi kɛ́ mɔ kroko miiwie. Te ooofee tɛŋŋ oye su nɛɛ nɔ? Kɛtsɔ saji fioo komɛi ni oooŋmala lɛ nɔ. Ŋmalamɔ otii fioo komɛi ni obaasumɔ ni okwɛ mli be kroko lɛ. Kɛ́ oŋmalaa otii oshwieɔ shi lɛ, ebaaye ebua bo koni ojwɛŋmɔ ahi wiemɔ ni ahãa lɛ nɔ. Agbɛnɛ hu, gbelemɔ ŋmalɛi ni wielɔ lɛ baatsɛ lɛ, ni onyiɛ sɛɛ be ni ekaneɔ lɛ.

⁹ Kɛfata he lɛ, hã efee oti ni ma ohiɛ akɛ be fɛɛ be ni abaafee sanebimɔi kɛ hetoi lɛ, okɛ ohe baawo mli. Kɛ́ osusu nɔ ni otaoɔ owie lɛ he jogbaŋŋ lɛ, obaaná nikasemɔ lɛ he sɛɛ babaoo. Abɛi 15:28 lɛ kɛɔ akɛ: “Jalɔ tsui jwɛŋɔ hetoohamɔ he.”

¹⁰ Okɛ Nɔ ni Okaseɔ lɛ Atsu Nii: Naagbee kwraa lɛ, bɔɔ mɔdɛŋ ni ohã nɔ ni okaseɔ lɛ ‘atsu nii yɛ omli.’ (1 Tes. 2:13) Kɛ́ otee nɔ okɛ otii ni okaseɔ yɛ kpee fɛɛ kpee shishi lɛ tsu nii lɛ, obaabɛŋkɛ Yehowa Nyɔŋmɔ waa. Ebaafee mɔ ni yɔɔ diɛŋtsɛ kɛhã bo, ni obaaná miishɛɛ babaoo ni otsui baanyɔ omli be ni oyaa nɔ ‘onyiɛɔ anɔkwale lɛ mli’ ní ohãa etsɔɔ onɔ̃ lɛ.​—3 Yoh. 4.

¹¹ Nyɛmimɛi oblahii kɛ oblayei, kɛ́ nyɛsaa nyɛhe kɛhã asafoŋ kpeei be fɛɛ be, ni nyɛkɛ nyɛhe wo mli, ni nyɛkɛ nɔ ni nyɛkaseɔ lɛ tsu nii lɛ, nyɛbaaná kpeei lɛ ahe miishɛɛ waa. Nakai beaŋ nɔŋŋ lɛ, nyɛbaaná he sɛɛ kɛmɔ shi. Ebaahã nyɛhemɔkɛyeli lɛ mli awa, ni ebaawaje nyɛfai shi ni nyɛtswa akɛ nyɛbaaya nɔ nyɛye Yehowa, ni ji nyɛ-Tsɛ ni yɔɔ ŋwɛi lɛ anɔkwa.​—Lala 145:18.