Ná Hesai Pii yɛ Shiɛmɔ Nitsumɔ lɛ Mli—Tsɔsemɔ Biblia mli Nikaselɔi Koni Amɛfɔ Nikasemɔ

Nɔ Hewɔ ni Ehe Hiaa: Bɔ ni afee ni Biblia mli nikaselɔi adara yɛ mumɔŋ lɛ, jeee Nyɔŋmɔ Wiemɔ lɛ mli shishijee tsɔɔmɔi lɛ pɛ esa akɛ amɛkase ni amɛjwɛŋ nɔ. (Heb. 5:12–6:1) Nikasemɔ biɔ mɔdɛŋbɔɔ. Ebiɔ ni amɛkɛ nɔ ni amɛkaseɔ lɛ ato nɔ ni amɛle momo lɛ he, ni amɛna bɔ ni amɛkɛbaatsu nii amɛhã. (Abɛi 2:1-6) Kɛ́ nikaselɔi lɛ kase bɔ ni ataoɔ nii amli lɛ, ebaahã amɛkɛ asafo lɛ woji lɛ atsu nii kɛtao sanebimɔi ahetoo yɛ Biblia lɛ mli. Kɛ́ amɛbɔ mɔdɛŋ waa amɛkɛ nibii ni amɛkaseɔ lɛ tsu nii lɛ, ebaaye ebua amɛ koni amɛdamɔ kai ni amɛkɛbaakpe akɛ Kristofoi lɛ naa.—Luka 6:47, 48.

Bɔ ni Obaafee lɛ Ohã:

Maa nɔ mi ohã lɛ akɛ, be fɛɛ be ni ebaakase nii lɛ, ehe miihia waa ni esɔle ebi Yehowa yelikɛbuamɔ dani eje shishi.—Yoh. 14:26; 1 Kor. 2:10.
Kɛ́ okɛ mɔ ko je Biblia mli nikasemɔ shishi nɔŋŋ lɛ, wo lɛ hewalɛ ni ekase he ni nyɛbaakase lɛ dani oba. Okɛ owolo lɛ atsɔɔ lɛ, ni otsɔɔ lɛ bɔ ni ebaafee efolɔ wiemɔi loo saji otii lɛ pɛ ashishi.
Hã ekɛ lɛ diɛŋtsɛ ewiemɔi atsu nii kɛhã saji lɛ ahetoo. Kaahã nikasemɔ lɛ fee sanebimɔ kɛ hetoohamɔ kɛkɛ, ní nikaselɔ lɛ kane hetoo lɛ tɛ̃ɛ kɛjɛ wolo lɛ mli.
Wo onikaselɔ lɛ hewalɛ koni ekane Nyɔŋmɔ Wiemɔ lɛ fã ko daa gbi. Tsɔɔmɔ lɛ Biblia kanemɔ he gbɛjianɔtoo wolo ni yɔɔ jw.org lɛ nɔ, ni tsɔɔ gbɛ ni sa jogbaŋŋ ni ebaanyɛ etsɔ nɔ efee enɛ. Ebaabi ni etswa efai shi koni enyɛ ekane Biblia lɛ daa gbi ní ekɛfee esu, ni kɛ́ efee nakai lɛ, ebaaná he sɛɛ waa.—Lala 1:2, 3.
Tsɔɔmɔ onikaselɔ lɛ bɔ ni ebaanyɛ ekɛ Watchtower Library lɛ loo Buu-Mɔɔ INTANƐT NƆ WOJIATOOHE lɛ atsu nii kɛtao sanebimɔi ahetoo yɛ Biblia lɛ mli. Ye obua lɛ ni ena niŋmaa okadii ni akɛdamɔɔ shi ahãa woji ni wɔkɛfɔɔ nitsumɔ yɛ asafoŋ kpeei ashishi lɛ.

Kaa Enɛ Okwɛ yɛ Nyɔɔŋ nɛɛ Mli:

Kɛ́ nyɛgbe saneyitso ko loo saneyitso bibioo ko naa lɛ, bi o-Biblia mli nikaselɔ lɛ koni etsɔɔ nɔ ni nyɛkase lɛ kuku. Kɛ́ obɛ mɔ ko ni okɛkaseɔ nii lɛ, okɛ wiemɔi fioo atsu nii kɛfo Biblia lɛ loo Buu-Mɔɔ lɛ mli sane ko kuku, ni ofɔ nakai feemɔ koni ehã onu saji ashishi jogbaŋŋ fe tsutsu lɛ.