HII SHI AKƐ KRISTOFONYO

Gbohiiashitee Lɛ—Kpɔmɔnɔ lɛ Hewɔ lɛ, Ebaaba Mli

Be ni wekumɛi kɛ nanemɛi ni damɔ oblayoo ko gbele saa he lɛ eye awerɛho sɛɛ lɛ, oblayoo lɛ nyɛmi yoo ko susu gbohiiashitee ni baaba wɔsɛɛ lɛ he, ni no shɛje emii

Kaimɔ lɛ hãa wɔnáa hegbɛ kɛsusuɔ jɔɔmɔi ni kpɔmɔnɔ lɛ baahã wɔnine ashɛ nɔ wɔsɛɛ, tamɔ gbohiiashitee lɛ nɛkɛ lɛ, he. Ejeee Yehowa yiŋtoo akɛ adesai agboi kɔkɔɔkɔ. No hewɔ ni nibii ni hãa wɔyeɔ awerɛho fe fɛɛ yɛ shihilɛ mli lɛ ateŋ ekome ji, kɛ́ wɔsuɔlɔ ko gbo lɛ. (1Ko 15:26) Be ni Yesu na akɛ ekaselɔi lɛ miiye awerɛho yɛ Lazaro gbele lɛ hewɔ lɛ, edɔ lɛ waa. (Yoh 11:33-35) Akɛni Yesu jieɔ e-Tsɛ lɛ sui akpo hewɔ lɛ, wɔyɛ nɔmimaa akɛ edɔɔ Yehowa hu waa kɛ́ ena akɛ wɔmiiye awerɛho yɛ wɔsuɔlɔ ko gbele hewɔ. (Yoh 14:7) Yehowa miikpa be ni ekɛbaatee etsuji ni egboi lɛ ashi lɛ gbɛ waa, ni esa akɛ wɔ hu wɔfee nakai.—Hio 14:14, 15.

Akɛni Yehowa ji Nyɔŋmɔ ni toɔ gbɛjianɔ jogbaŋŋ hewɔ lɛ, nilee yɛ mli akɛ wɔɔhe wɔye akɛ gbohiiashitee lɛ baaya nɔ yɛ gbɛjianɔtoo kpakpa naa. (1Ko 14:33, 40) Nɔ najiaŋ ni wɔbaafee yara lɛ, wɔbaahere mɛi ni abaatee amɛ shi lɛ atuu. Ani ojwɛŋɔ gbohiiashitee lɛ nɔ, titri lɛ, kɛ́ ooye awerɛho? (2Ko 4:17, 18) Ani odaa Yehowa shi akɛ ehã wɔ kpɔmɔnɔ lɛ, ni akɛ, ehã wɔle yɛ Ŋmalɛi lɛ amli akɛ gbohii lɛ baaba wala mli ekoŋŋ?—Kol 3:15.

Onanemɛi kɛ owekumɛi lɛ ateŋ namɛi okpaa gbɛ waa akɛ obaaná amɛ ekoŋŋ?
Mɛi ni Biblia lɛ ewie amɛhe lɛ ateŋ namɛi okpaa gbɛ waa akɛ okɛ amɛ baakpe ni okɛ amɛ agba sane?