Mɛni Obaanyɛ Okase Yɛ Asafo Lɛ Lalai Krokomɛi Lɛ Amli?

Tsɔɔmɔ asafo lɛ lalai krokomɛi lɛ ateŋ ekomɛi ni osumɔɔ waa. Mɛni hewɔ osumɔɔ nomɛi lɛ? Ani onaa akɛ amɛhe vidioi lɛ kɔɔ nibii ni wɔkɛkpeɔ yɛ wɔshihilɛ mli lɛ ahe? Akɛni lalai lɛ kɔɔ saji srɔtoi ahe, ní ayɛ henɔi srɔtoisrɔtoi hu hewɔ lɛ, mɔ fɛɛ mɔ baanya eko he kɛ̃. Shi wɔkɛ asafo lɛ lalai krokomɛi lɛ kɛ amɛhe vidioi lɛ ejieee wɔhiɛtserɛ pɛ kɛkɛ.

Ŋaawoi kpakpai ni wɔbaanyɛ wɔkɛtsu nii yɛ wɔshihilɛ mli kɛ shiɛmɔ nitsumɔ lɛ mli lɛ yɛ lalai nɛɛ eko fɛɛ eko mli. Ekomɛi wieɔ gbɔfeemɔ, ekomefeemɔ, naanyobɔɔ, ekãafeemɔ, suɔmɔ, loo hemɔkɛyeli he. Ekrokomɛi hu wieɔ bɔ ni wɔɔfee wɔku wɔsɛɛ kɛba Yehowa ŋɔɔ, wɔkɛ tɔmɔ ake, wɔya nɔ wɔye anɔkwa, kɛ bɔ ni wɔɔfee wɔkɛ mumɔŋ otii amamɔ wɔhiɛ lɛ he. Eko po wieɔ bɔ ni wɔɔfee wɔkɛ mobail foŋ atsu nii yɛ gbɛ ni sa nɔ lɛ he. Mɛɛ ŋaawoi kpakpai krokomɛi ona yɛ lalai nɛɛ amli?

KWƐMƆ LALA NI YITSO JI, ETSƐŊ EBAABA LƐ HE VIDIO LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Mɛɛ jɔɔmɔi ni wɔbaaná wɔsɛɛ lɛ nuumo lɛ kɛ yoomo lɛ susuɔ he?—1Mo 12:3

• Te wɔɔfee tɛŋŋ wɔhã hemɔkɛyeli ni wɔyɔɔ akɛ Yehowa baaye eshiwoi lɛ anɔ lɛ mli awa?

• Namɛi etsɛŋ wɔbaana amɛ ekoŋŋ?

• Mɛɛ gbɛ nɔ Maŋtsɛyeli lɛ he hiɛnɔkamɔ lɛ waa wɔ ni wɔfiɔ shi yɛ kai ni wɔkɛkpeɔ bianɛ lɛ amli?​—Ro 8:25