Nyɔŋmɔ Kɛ Kristo Baahã Wɔye Wɔhe Wɔsɛɛ

Mɛni oyeɔ otsui yɛ he daa gbi? Ani oji wekuyitso ni miitsu sɔ̃i pii ahe nii? Ani oji fɔlɔ kome ni miibɔ mɔdɛŋ ni ekwɛ ebii? Ani oji oblanyo loo oblayoo ni mɛi ni okɛyaa skul lɛ miigba onaa? Ani hela ko loo gbɔlɛ miisu otsui? Mɔ fɛɛ mɔ kɛ naagba ko miikpe kɛ̃. Nyɛmimɛi pii kɛ naagbai srɔtoi miikpe yɛ be kome mli. Shi wɔle akɛ etsɛŋ, wɔbaaye wɔhe kɛje naagbai nɛɛ fɛɛ amli.​—2Ko 4:16-18.

Shi amrɔ nɛɛ po lɛ, le ni wɔle akɛ Yehowa nuɔ wɔshihilɛ lɛ shishi, ehiɛ sɔɔ wɔnɔkwayeli kɛ wɔshifimɔ lɛ, ni ekpɛ mli akɛ wɔsɛɛ lɛ ebaajɔɔ wɔ babaoo lɛ, shɛjeɔ wɔmii. (Yer 29:11, 12) Yesu hu jwɛŋɔ wɔhe waa. Ewo wɔ shi akɛ, ‘ekɛ wɔ yɛ,’ be ni wɔtsuɔ wɔsɔ̃i akɛ Kristofoi lɛ ahe nii lɛ. (Mat 28:20) Kɛ́ wɔjwɛŋ heyeli ni wɔbaaná yɛ Nyɔŋmɔ Maŋtsɛyeli lɛ shishi lɛ nɔ lɛ, wɔhiɛnɔkamɔ lɛ mli baawa, ni wɔbaabɔ mɔdɛŋ wɔfi shi yɛ kai ni wɔkɛkpeɔ amrɔ nɛɛ amli fe tsutsu lɛ.—Ro 8:19-21.

KWƐMƆ VIDIO NI JI, YAA NƆ OKWƐ YESU BE NI AHUM LƐ TSWAA KƐBAA LƐ!​—JƆƆMƆI NI MAŊTSƐYELI LƐ KƐBAABA WƆSƐƐ LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Te fee tɛŋŋ ni adesai tse amɛhe kɛje Nyɔŋmɔ he, ni mɛni jɛ mli kɛba?

• Mɛni mɛi ni yeɔ Yehowa anɔkwa lɛ baaná wɔsɛɛ?

• Mɛni baahã wɔnine ashɛ jɔɔmɔi nɛɛ anɔ?

• Mɛɛ jɔɔmɔi okpaa gbɛ yɛ jeŋ hee lɛ mli?