Amɛna Akɛ Asafo Lɛ Sumɔɔ Amɛ Waa

OBLAYOO ko ni atsɛɔ lɛ Yomara lɛ kɛ enyɛmimɛi hii Marcelo kɛ Hiver hi akrowa bibioo ko yɛ Guatemala. Odasefoi lɛ kɛ Yomara bɔi Biblia lɛ kasemɔ, ni sɛɛ mli lɛ, enyɛmimɛi hii enyɔ lɛ bafata ehe. Shi no mli lɛ, amɛyɛ naagba ko. Amɛyi etɛ lɛ fɛɛ lɛ, shwilafoi ji amɛ ni amɛnyɛɛɛ amɛkane braille, ni ji woji ni afeɔ ahãa shwilafoi lɛ. No hewɔ lɛ, be fɛɛ be ni akɛ amɛ baakase nii lɛ, mɔ ni kɛ amɛ kaseɔ nii lɛ kaneɔ kukuji ni akɛ amɛ baakase lɛ kɛ ŋmalɛi ni yɔɔ mli lɛ ehãa amɛ.

Naagba kroko ni amɛkɛkpe ji, asafoŋ kpeei yaa bawa kɛhã amɛ. Kɛjɛ amɛshĩa lɛ kɛmiiya Maŋtsɛyeli Asa ni bɛŋkɛ amɛ fe fɛɛ lɛ heɔ minitii 40, ni amɛ kome too amɛnyɛɛɛ amɛya jɛmɛ. Shi nyɛmimɛi lɛ toɔ gbɛjianɔ ni amɛbawoɔ amɛ kɛyaa asafoŋ kpeei lɛ fɛɛ. Be ni abɔi amɛ asaimɛnt hãmɔ yɛ otsi teŋ kpee lɛ mli lɛ, nyɛmimɛi lɛ yeɔ amɛbuaa amɛ ni amɛkaseɔ asaimɛnt lɛ amɛwoɔ amɛyitsoŋ ni amɛbafeɔ.

Yɛ May 2019 lɛ, abɔi asafoŋ kpeei feemɔ yɛ amɛkrowa lɛ. No mli lɛ, nyɛmi nuu ko kɛ eŋa, ni ji daa gbɛgbalɔi lɛ efã kɛba amɛkrowa lɛ. Amɛkɛfee oti ni ma amɛhiɛ akɛ, amɛbaatsɔɔ nyɛmimɛi etɛ nɛɛ bɔ ni akaneɔ braille kɛ bɔ ni aŋmaa lɛ ahãa, eyɛ mli akɛ amɛ diɛŋtsɛ lɛ amɛleee bɔ ni afeɔ lɛ ahãa. No hewɔ lɛ, amɛtee wojiatoohe ko amɛyakase braille he nii koni amɛnyɛ amɛtsɔɔ mɛi.

Yɛ nyɔji fioo komɛi amli lɛ, nyɛmimɛi etɛ nɛɛ bɔi braille kanemɔ ni etɔɔɔ amɛ, ni enɛ hã amɛtee amɛhiɛ yɛ asafo lɛ mli.a Bianɛ lɛ, Yomara, Marcelo, kɛ Hiver fɛɛ miisɔmɔ akɛ daa gbɛgbalɔi. Marcelo miisɔmɔ hu akɛ asafoŋ sɔɔlɔ. Amɛkɛ ekãa sɔmɔɔ Yehowa otsi muu lɛ fɛɛ, ni ekãa ni amɛyɔɔ lɛ miitsɛŋe mɛi krokomɛi.

Nyɛmimɛi etɛ nɛɛ ahiɛ sɔɔ suɔmɔ ni asafoŋbii lɛ jieɔ lɛ kpo amɛtsɔɔ amɛ kɛ bɔ ni amɛyeɔ amɛbuaa amɛ lɛ waa. Yomara wie akɛ: “Kɛjɛ klɛŋklɛŋ be ni wɔkɛ Odasefoi lɛ kpe lɛ, amɛtee nɔ amɛjie anɔkwa Kristofoi asuɔmɔ kpo amɛtsɔɔ wɔ.” Marcelo hu kɛfata he akɛ: “Wɔyɛ nanemɛi kpakpai pii yɛ wɔsafo lɛ mli, ni wɔfata nyɛmimɛi ni efee ekome akɛ weku yɛ jeŋ fɛɛ lɛ ahe.” Yomara kɛ enyɛmimɛi lɛ miikpa be ni amɛkɛ amɛhiŋmɛii baana ni shikpɔŋ lɛ etsɔ paradeiso lɛ gbɛ waa.​—Lala 37:10, 11; Yes. 35:5.