Hulda Shɛ Oti Ni Ekɛma Ehiɛ Lɛ He

WƆNYƐMIMƐI yei etɛ komɛi yɛ ŋshɔkpɔ bibioo ko ni atsɛɔ lɛ Sangir Besar lɛ nɔ yɛ Indonesia. Afii fioo ni eho nɛ lɛ, no mli lɛ amɛtsuɔ nii yɛ ŋshɔ lɛ naa. Ale amɛ waa yɛ ŋshɔkpɔ lɛ nɔ akɛ amɛshiɛɔ ni amɛtsɔɔ mɛi Biblia lɛ. Shi jeee no ji nɔ ni no mli lɛ amɛtsuɔ yɛ ŋshɔ lɛ naa lɛ.

No mli lɛ, nɔ ni amɛfeɔ yɛ ŋshɔ lɛ naa ji, amɛyaloɔ tɛi kɛjɛɔ ŋshɔ lɛ mli kɛbashwieɔ ŋshɔnaa shĩa lɛ nɔ. Tɛi lɛ ekomɛi dara tamɔ bɔɔlu. Kɛ́ amɛkɛba lɛ, amɛtaraa sɛii bibii anɔ ni amɛkɛ hamlɛ tsoɔ tɛi lɛ ni efeɔ bibiibibii fe wuɔ wɔlɔ. No sɛɛ lɛ, amɛloɔ tɛi lɛ amɛwoɔ rɔba gogai amli ni amɛnyiɛɔ kɛyakwɔɔ aŋtswele ko kɛyaa he ni amɛyɔɔ lɛ. Kɛ́ amɛkɛtee lɛ, amɛyatsɔmɔɔ amɛwoɔ baagii agbogboi amli, ni tsɔji baholeɔ ni akɛyafeɔ gbɛjegbɛi.

Atsɛɔ nyɛmimɛi yei nɛɛ ateŋ mɔ kome Hulda. Bɔ ni eshihilɛ yɔɔ lɛ hewɔ lɛ, enyɛɔ ekɛ be babaoo tsuɔ nitsumɔ nɛɛ fe nyɛmimɛi yei krokomɛi lɛ. Shika ni enáa yɛ nitsumɔ nɛɛ mli lɛ ekɛkwɛɔ eweku lɛ. Shi agbɛnɛ lɛ, ekpɛ eyiŋ akɛ ekɛ shika lɛ eko baato ni ekɛfee nɔ kroko. Mɛni etaoɔ ekɛfee? Eetao ekɛhé tablɛti koni ekɛ JW Library^® lɛ awo nɔ, ejaakɛ ele akɛ vidioi kɛ nibii krokomɛi ni yɔɔ JW Library lɛ nɔ lɛ baawa lɛ yɛ shiɛmɔ nitsumɔ lɛ mli, ni ebaaye ebua lɛ ni enu Biblia lɛ shishi jogbaŋŋ.

Enɛ hewɔ lɛ, daa leebi lɛ, Hulda tsuɔ nii ŋmɛlɛtswai enyɔ kɛfataa be ni ekɛtsuɔ nii daa lɛ he, ni efee enɛ nyɔɔŋ kome kɛ fã. Enyɛ etso tɛ ni fa bɔ ni baayi shia lɔle bibioo kome. Enɛ hã ená shika ni fa bɔ ni sa ni ekɛhé tablɛti lɛ.

Hulda wie akɛ: “Tɛ lɛ ni mitso lɛ hã etɔ mi ni mihewojiaŋ fɛɛ wa mihe. Shi be ni minine shɛ tablɛti lɛ nɔ lɛ, mihiɛ kpa tɔlɛ kɛ deŋme lɛ fɛɛ nɔ, ejaakɛ tablɛti lɛ ye ebua mi ni minyɛ mitsu shiɛmɔ nitsumɔ lɛ jogbaŋŋ fe tsutsu lɛ po, ni etɔɔɔ mi tsɔ kɛ́ miisaa mihe kɛhã asafoŋ kpeei.” Ewie hu akɛ, tablɛti lɛ ye ebua lɛ ni enyɛ ekɛ ehe wo asafoŋ kpeei kɛ shiɛmɔyaa mli be ni COVID-19 hela lɛ je shishi lɛ. Eŋɔɔ wɔnaa waa akɛ, Hulda nyɛ eshɛ oti ni ekɛma ehiɛ lɛ he.