9 Mɔ Ni Oji

NƆ NI ETSƆƆ

Jeee ogbɛ́i kɛ bɔ ni ogbɔmɔtso yɔɔ lɛ ni hãa anaa mɔ ni oji diɛŋtsɛ. Nibii ni hãa anaa mɔ ni oji diɛŋtsɛ lɛ ekomɛi ji, osui, nibii ni oheɔ oyeɔ, kɛ bɔ ni obaa ojeŋ ohãa. Anɔkwa, nɔ fɛɛ nɔ ni mɛi le yɛ ohe, bɔ ni oji yɛ mligbɛ kɛ kponɔgbɛ lɛ fɛɛ ni hãa anaa mɔ ni oji diɛŋtsɛ.

NƆ HEWƆ NI EHE HIAA

Kɛ́ osumɔɔɔ ni gbɛ́i ni ofee ohã ohe lɛ fiteɔ lɛ, no lɛ obaabɔ mɔdɛŋ ni ohi shi yɛ nibii ni oheɔ oyeɔ lɛ anaa, moŋ fe ni obaahã otipɛŋfoi atsɔɔ bo nɔ ni ofee.

“Mɛi babaoo feɔ amɛnii tamɔ tsobii ni awo amɛ atadei ni akɛmamɔɔ shwapoi amli lɛ. Tsobii nɛɛ halaaa atadei ni amɛbaasumɔ ni amɛwo, mɛi krokomɛi ni kɛwoɔ amɛ.”​—Adrian.

“Mikase bɔ ni mafee mahi shi yɛ nɔ ni mile akɛ eja lɛ naa, kɛ́ efeemɔ wa po. Bɔ ni minanemɛi lɛ feɔ amɛnii amɛhãa kɛ bɔ ni mi hu mifeɔ minii mihãa kɛ́ miyɛ amɛteŋ lɛ hãa minaa kɛ́ amɛji nanemɛi kpakpai.”​—Courtney.

BIBLIA MLI SHISHITOO MLA: “Nyɛkahãa je nɛɛ shɔ̃a nyɛ dɔŋŋ, shi moŋ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ.”​—Romabii 12:2.

NƆ NI OBAANYƐ OFEE

Susumɔ nɔ gbɔmɔ ni oji amrɔ nɛɛ kɛ nɔ gbɔmɔ ni obaasumɔ ni otsɔ wɔsɛɛ lɛ he. Pɛimɔ nibii ni obɔɔ mɔdɛŋ yɛ mli kɛ ogbɔjɔmɔi kɛ nibii ni oheɔ oyeɔ lɛ amli, koni no aye abua bo ni ona nɔ gbɔmɔ ni oji amrɔ nɛɛ kɛ nɔ gbɔmɔ ni obaasumɔ ni otsɔ wɔsɛɛ. Sanebimɔi ni nyiɛ sɛɛ nɛɛ baanyɛ aye abua bo koni onyɛ opɛi omli okwɛ.

Nibii ni obɔɔ mɔdɛŋ yɛ mli: Mɛɛ hesai miyɔɔ? Mɛɛ nibii mibɔɔ mɔdɛŋ waa yɛ mli? Akɛ nɔkwɛmɔnɔ lɛ, ani miyeɔ be nɔ? Ani minyɛɔ miyeɔ mihe nɔ? Ani misumɔɔ nitsumɔ? Ani mifeɔ mɛi ejurɔ? Mɛɛ nibii kpakpai mifeɔ?

ŊAAWOO: Ani ewa kɛhã bo akɛ obaayɔse nibii ni obɔɔ mɔdɛŋ yɛ mli lɛ? Bi omami loo opapa loo onaanyo ko ni oheɔ lɛ oyeɔ ni ekɛɛ bo nibii ni obɔɔ mɔdɛŋ yɛ mli kɛ nɔ hewɔ ni ekɛɔ nakai.

BIBLIA MLI SHISHITOO MLA: “Mɔ fɛɛ mɔ apɛi enifeemɔi amli ekwɛ, kɛkɛ lɛ ebaana nɔ ko yɛ lɛ diɛŋtsɛ ehe ni baahã emii ashɛ ehe, shi jeee ni ekɛ ehe baato mɔ kroko he.”​—Galatiabii 6:4.

Ogbɔjɔmɔi. Mɛɛ sui esa akɛ matsu he nii kɛ hiɛdɔɔ? Mɛɛ be ewaaa akɛ abaaka mi ni mafee nɔ ko ni ehiii? Mɛɛ shihilɛi ehe baahia ni maye mihe nɔ waa yɛ mli?

BIBLIA MLI SHISHITOO MLA: “Kɛ́ wɔkɛɛ akɛ, ‘Esha ko kwraa bɛ wɔhe’ lɛ, no lɛ wɔmiilaka wɔ diɛŋtsɛ wɔhe.”​—1 Yohane 1:8.

Nibii ni oheɔ oyeɔ. Mɛɛ jeŋba he mlai mihiɔ shi yɛ naa, ni mɛni hewɔ? Ani miheɔ miyeɔ akɛ Nyɔŋmɔ yɛ? Mɛɛ nibii hãa miyiŋ tsɔɔ akɛ eyɛ lɛɛlɛŋ? Mɛɛ nifeemɔi minaa akɛ ehiii loo ejaaa, ni mɛni hewɔ? Mɛni miheɔ miyeɔ akɛ ebaaba wɔsɛɛ?

BIBLIA MLI SHISHITOO MLA: “Sanenɔjwɛŋmɔ baabu ohe, ni sanesɛɛkɔmɔ hu baakwɛ onɔ.”​—Abɛi 2:11.