Nyɔŋmɔ Webii Shi Babilon

AAAFEE afii enyɔ eho kɛjɛ beni Mediabii kɛ Persiabii ŋɔ Babilon nom lɛ. Ni kwɛmɔ nɔ ni yaa nɔ agbɛnɛ! Hɛɛ, Israelbii lɛ miishi Babilon. Te fee tɛŋŋ ni amɛye amɛhe hu? Namɔ ŋmɛɛ amɛhe akɛ amɛya?

Koresh, Persia maŋtsɛ lɛ fee nakai. Dani abaafɔ Koresh lɛ, Yehowa tsɔ hiɛ kwraa eha egbalɔ Yesaia ŋma yɛ ehe akɛ: ‘Obaafee nɔ ni mitaoɔ ni ofee lɛ pɛpɛɛpɛ. Abaagbele agboi lɛ ashwie shi aha bo ni oyaŋɔ maŋ lɛ nom.’ Ni Koresh nyiɛ hiɛ lɛɛlɛŋ ni amɛŋɔ Babilon. Mediabii kɛ Persiabii lɛ ba maŋ lɛ mli nyɔɔŋ teŋ kɛtsɔ agboi ni agbele ashwie shi lɛ amli.

Shi Yehowa gbalɔ Yesaia kɛɛ hu akɛ, Koresh kɛ fãmɔ baaha ni asaa ama Yerusalem kɛ esɔlemɔtsu lɛ ekoŋŋ. Ani Koresh kɛ nɛkɛ fãmɔ nɛɛ ha? Hɛɛ, efee nakai. Nɔ ni Koresh kɛɛ Israelbii lɛ nɛ: ‘Agbɛnɛ nyɛyaa Yerusalem, ni nyɛyamaa Yehowa nyɛ Nyɔŋmɔ lɛ sɔlemɔwe lɛ.’ Ni enɛ pɛpɛɛpɛ Israelbii nɛɛ yaa ni amɛyafee lɛ.

Shi jeee Israelbii ni yɔɔ Babilon lɛ fɛɛ baanyɛ afã gbɛ kakadaŋŋ nɛɛ kɛku sɛɛ kɛya Yerusalem. Eji gbɛ kakadaŋŋ diɛŋtsɛ, ni ejɛkɛmɔ aaafee shitoi 500 (kilomitai 800), ni mɛi babaoo egbɔlɔ aloo amɛbɛ hewalɛ ni amɛkɛaafã gbɛ kakadaŋŋ nɛɛ. Ni yiŋtoi krokomɛi ni haaa mɛi komɛi aya lɛ hu yɛ. Shi Koresh kɛɛ mɛi ni eyaaa lɛ akɛ: ‘Nyɛkɛ jwiɛtɛi kɛ shika kɛ nikeenii krokomɛi ahaa mɛi ni kuɔ amɛsɛɛ amɛyasaa amɛma Yerusalem kɛ esɔlemɔwe lɛ.’

No hewɔ lɛ, akɛ nikeenii babaoo ha Israelbii ni eku amɛsɛɛ kɛmiiya Yerusalem lɛ. Agbɛnɛ hu, Koresh kɛ tsɛŋsii kɛ kpuji ni Maŋtsɛ Nebukadnezar yaloo kɛjɛ Yehowa sɔlemɔwe beni ekpãta Yerusalɛm hiɛ lɛ fɛɛ ha amɛ ekoŋŋ. Gbɔmɛi lɛ ná nibii babaoo ni esa akɛ amɛtere kɛya.

Beni amɛfã gbɛ aaafee nyɔji ejwɛ sɛɛ lɛ, Israelbii lɛ yashɛ Yerusalem yɛ be naa pɛpɛɛpɛ. Afii 70 pɛpɛɛpɛ nɛ ni akpãta maŋ lɛ hiɛ, ni ashi shikpɔŋ lɛ afɔ̃ shi ni mɔ ko mɔ ko bɛ nɔ. Shi, eyɛ mli akɛ Israelbii lɛ eku amɛsɛɛ amɛba amɛ diɛŋtsɛ amɛmaŋ moŋ, shi amɛkɛ shihilɛi komɛi ni mli wa baakpe, taakɛ wɔbaakase kɛnyiɛ sɛɛ lɛ.