Bɔ Ni Wɔɔfee Wɔhi Shi Kɛya Naanɔ

ANI obaanyɛ otsɔɔ wolo ni gbekɛ yoo fioo lɛ kɛ enanemɛi lɛ kaneɔ lɛ? Hɛɛ, wolo ni okaneɔ nɛɛ nɔŋŋ eko—Mi-Wolo ni Gbaa Biblia Mli Saji. Ni amɛmiikane sane ni okaneɔ lɛ nɔŋŋ—“Bɔ ni Wɔɔfee Wɔhi Shi Kɛya Naanɔ.”

Ani ole nɔ ni amɛkaseɔ lɛ? No ji, kɛji wɔbaanyɛ wɔhi shi kɛya naanɔ lɛ, no lɛ ehe miihia ni wɔle Yehowa kɛ e-Bi Yesu he sane klɛŋklɛŋ. Biblia lɛ kɛɔ akɛ: ‘Gbɛ ni aaatsɔ nɔ ahi shi kɛya naanɔ nɛ. Kasemɔ anɔkwa Nyɔŋmɔ lɛ, kɛ e-Bi ni ji Yesu Kristo ni etsu lɛ kɛba shikpɔŋ nɔ lɛ he nii.’

Te wɔɔfee tɛŋŋ wɔkase Yehowa Nyɔŋmɔ kɛ e-Bi Yesu he nii? Gbɛ kome ji ni wɔkane Mi-Wolo ni Gbaa Biblia Mli Saji lɛ kɛjɛ shishijee kɛyashi naagbee. Ewieɔ Yehowa kɛ Yesu he saji babaoo, aloo jeee nakai? Ni ewieɔ nibii ni amɛfee momo kɛ nɔ ni amɛbaafee hu lɛ he babaoo. Shi ehe miihia ni wɔfee babaoo fe ni wɔɔkane wolo nɛɛ kɛkɛ.

Ani oona wolo kroko ni kã shikpɔŋ lɛ? Biblia lɛ ni. Ha ni mɔ ko akane Biblia lɛ fãi ni saji ni yɔɔ wolo nɛɛ mli lɛ damɔ nɔ lɛ etsɔɔ bo. Biblia lɛ kɛ saji ni he hiaa bɔni afee ni wɔ fɛɛ wɔnyɛ wɔsɔmɔ Yehowa yɛ gbɛ ni ja nɔ, ni wɔna naanɔ wala lɛ fɛɛ haa wɔ. No hewɔ lɛ esa akɛ efee wɔsubaŋ akɛ wɔɔkase Biblia lɛ yɛ bei babaoo mli.

Shi ni wɔɔkase Yehowa Nyɔŋmɔ kɛ Yesu Kristo he nii lɛ kɛkɛ faaa. Wɔbaanyɛ wɔná amɛ kɛ amɛtsɔɔmɔi lɛ ahe nilee babaoo diɛŋtsɛ, ni kɛlɛ wɔnine shɛŋ naanɔ wala nɔ. Ani ole nɔ kroko hu ni he hiaa?

Ehe miihia ni wɔshihilɛ kɛ nibii ni wɔkaseɔ lɛ hu akpã gbee. Ani okaiɔ Yuda Iskariot? Efata mɛi 12 ni Yesu hala koni amɛfee ebɔfoi lɛ ahe. Yuda yɛ Yehowa kɛ Yesu he nilee babaoo. Shi mɛni ba enɔ? Yɛ be fioo sɛɛ lɛ, ebafee hiɛjoolɔ, ni etsɔɔ Yesu sɛɛ gbɛ eha ehenyɛlɔi lɛ, ni aha lɛ jwiɛtɛi kukuji 30. No hewɔ lɛ Yuda naŋ naanɔ wala.

Ani okaiɔ Gehazi, nuu ni wɔkase ehe nii yɛ Sane ni ji 69 lɛ mli lɛ? Eetao ni ena atadei komɛi kɛ shika ni jeee enɔ. No hewɔ lɛ emale koni enine ashɛ nibii nɛɛ anɔ. Shi Yehowa gbala etoi. Ni kɛji wɔbooo emlai lɛ atoi lɛ, ebaagbala wɔ hu wɔtoi.

Shi gbɔmɛi kpakpai babaoo yɛ ni amɛsɔmɔ Yehowa yɛ anɔkwayeli mli. Wɔmiisumɔ ni wɔtamɔ amɛ, aloo jeee nakai? Gbekɛ nuu Samuel ji nɔkwɛmɔ nɔ kpakpa ni wɔbaasumɔ ni wɔkase lɛ. Kaimɔ akɛ, taakɛ wɔna yɛ Sane ni ji 55 lɛ mli lɛ, beni ebɔi Yehowa sɔɔmɔ yɛ esɔlemɔwe lɛ, no mli lɛ eye afii ejwɛ loo afii enumɔ pɛ. No hewɔ lɛ, bɔ fɛɛ bɔ ni odako kwraa ha lɛ, ojeee mɔ ni odako ni onyɛŋ Yehowa osɔmɔ.

Eji anɔkwale akɛ, mɔ ni wɔ fɛɛ wɔtaoɔ wɔnyiɛ esɛɛ ji Yesu Kristo. Beni eji gbekɛ nuu fioo po lɛ, taakɛ atsɔɔ yɛ lɛ Sane ni ji 87 lɛ mli lɛ, no mli lɛ eyaa sɔlemɔwe lɛ ni ekɛ mɛi krokomɛi yawieɔ eŋwɛi Tsɛ lɛ he. Nyɛhaa wɔnyiɛa enɔkwɛmɔ nɔ lɛ sɛɛ. Nyɛhaa wɔgbaa wɔ-Nyɔŋmɔ ni he yɔɔ naakpɛɛ, Yehowa, kɛ e-Bi, Yesu Kristo he sane wɔtsɔa mɛi babaoo bɔ ni wɔɔnyɛ. Kɛ wɔfee enɛ lɛ, no lɛ wɔbaanyɛ wɔhi shi kɛya naanɔ yɛ Nyɔŋmɔ paradeiso hee lɛ mli yɛ shikpɔŋ nɛɛ nɔ.