Yitso 15

Mɛɛ Gbɛ nɔ Yehowa Tsɔɔ Ekudɔɔ Esafo Lɛ?

1. Mɛɛ saji ni kɔɔ Yehowa gbɛjianɔtoo lɛ he Biblia lɛ jieɔ lɛ kpo, ni mɛni hewɔ enɛ he hiaa wɔ lɛ?

YEHOWA tsɔɔ Ŋmalɛi ni jɛ Mumɔŋ lɛ anɔ ehaa wɔleɔ eŋwɛi gbɛjianɔtoo ni yɔɔ naakpɛɛ lɛ mli fioo ko. (Yes. 6:2, 3; Ezek. 1:1, 4-28; Dan. 7:9, 10, 13, 14) Eyɛ mli akɛ wɔnyɛɛɛ wɔna mumɔŋ bɔɔ nii moŋ, shi ehaa wɔhiɛ baa wɔhe nɔ yɛ gbɛi anɔ ni ŋwɛibɔfoi anitsumɔi saa anɔkwa jalɔi ni yɔɔ shikpɔŋ nɔ lɛ ahe ehaa lɛ he. (1 Mose 28:12, 13; 2 Maŋ. 6:15-17; Lala 34:8; Mat. 13:41, 42; 25:31, 32) Biblia lɛ hu tsɔɔ Yehowa gbɛjianɔtoo ni anaa lɛ mli ni eyeɔ ebuaa wɔ koni wɔnu gbɛ ni etsɔɔ nɔ ekudɔɔ enɛ lɛ shishi. Kɛ wɔyɛ nɛkɛ nibii nɛɛ ahe mumɔŋ shishinumɔ lɛlɛŋ lɛ, enɛ baaye abua wɔ ni ‘wɔnyiɛ bɔ ni sa Yehowa hiɛ ni wɔsa ehiɛ kwraa.’—Kol. 1:9, 10.

EFA NI ANAA LƐ YƆSEMƆ

2. Mɛni ji Nyɔŋmɔ asafo lɛ kɛjɛ Pentekoste afi 33 Ŋ.B. kɛbaa nɛɛ?

² Israel maŋ lɛ hi shi afi 1,545 sɔŋŋ akɛ Nyɔŋmɔ asafo. Shi amɛyeee Mla kpaŋmɔ lɛ nɔ ni amɛkpoo Nyɔŋmɔ diɛŋtsɛ Bi lɛ. No hewɔ lɛ, Yehowa ha asafo hee ko ba shihilɛ mli, ni ekɛ esafo nɛɛ fee kpaŋmɔ hee. Awieɔ nɛkɛ asafo nɛɛ he yɛ Ŋmalɛi lɛ amli akɛ Kristo “ayemforo” ni mɛi 144,000 ni Nyɔŋmɔ ehala amɛ yɔɔ mli koni amɛkɛ e-Bi lɛ abafee ekome yɛ ŋwɛi. (Efes. 5:22-32; Kpoj. 14:1; 2:9, 10) Akɛ mumɔ krɔŋkrɔŋ fɔ klɛŋklɛŋ bii lɛ mu yɛ Pentekoste, yɛ afi 33 Ŋ.B. Yehowa tsɔ mumɔ krɔŋkrɔŋ lɛ nɔ eye odase ni tɔmɔ ko bɛ he akɛ enɛ ji asafo ni agbɛnɛ ekɛbaatsu nii ni ekɛha eyiŋtoo aba mli.—Heb. 2:2-4.

3. Namɛi feɔ Yehowa gbɛjianɔtoo ni anaa ŋmɛnɛ lɛ?

³ Ŋmɛnɛ, mɛi 144,000 nɛɛ ateŋ shwɛɛnii ko pɛ yɔɔ shikpɔŋ nɔ. Shi yɛ Biblia gbalɛ mlibaa mli lɛ, asafo babaoo ni ji “tooi krokomɛi” yɛ ni akɛ amɛ ebafata amɛhe. Yesu Kristo, ni ji Tookwɛlɔ Kpakpa lɛ kɛ nɛkɛ “tooi krokomɛi” nɛɛ kɛ esɛɛnyiɛlɔi ni akɛ mumɔ efɔ amɛ lɛ ateŋ shwɛɛnii lɛ efee ekome koni amɛfee “kuu kome” yɛ lɛ ni ji amɛ “tookwɛlɔ kome” lɛ shishi. (Yoh. 10:11, 16; Kpoj. 7:9, 10) Mɛnɛɛmɛi fɛɛ feɔ gbɛjianɔtoo kome, Yehowa gbɛjianɔtoo ni anaa ŋmɛnɛ lɛ.

EJI TEOKRASE GBƐJIANƆTOO

4. Namɔ kudɔɔ gbɛjianɔtoo lɛ, ni yɛ mɛɛ gbɛ nɔ?

⁴ Ŋmalɛ mli wiemɔ “Nyɔŋmɔ hiɛkalɔ lɛ asafo lɛ” haa aleɔ mɔ ni kudɔɔ enɛ. Eji teokrase gbɛjianɔtoo, aloo nɔ ni Nyɔŋmɔ yeɔ nɔ. Yehowa kɛ gbɛtsɔɔmɔ haa ewebii kɛtsɔɔ mɔ ni E-hala lɛ akɛ efee asafo lɛ yitso ni anaaa lɛ ni ji Nuŋtsɔ Yesu Kristo nɔ, kɛ agbɛnɛ kɛtsɔ Lɛ diɛŋtsɛ e-Wiemɔ ni jɛ mumɔŋ ni ji Biblia lɛ nɔ.—1 Tim. 3:14, 15; Efes. 1:22, 23; 2 Tim. 3:16, 17.

5. (a) Ana ŋwɛi gbɛtsɔɔmɔ ni akɛhaa asafo lɛ yɛ klɛŋklɛŋ afii oha lɛ mli yɛ mɛɛ gbɛ nɔ? (b) Mɛni tsɔɔ akɛ Yesu ka he eji asafo lɛ yitso?

⁵ Nɛkɛ teokrase gbɛtsɔɔmɔ nɛɛ baje kpo faŋŋ yɛ be mli ni mumɔ krɔŋkrɔŋ lɛ kanya asafo lɛ mli bii ni ji klɛŋklɛŋ bii lɛ yɛ Pentekoste afi 33 Ŋ.B. lɛ. (Bɔf. 2:1-4, 32, 33) Enɛ je kpo yɛ be mli ni Yehowa bɔfo lɛ kudɔ saji ni ha agbɛ sanekpakpa lɛ ashwã kɛtee Afrika lɛ. (Bɔf. 8:26-39) Nakai nɔŋŋ eji, beni Yesu gbee kɛ gbɛtsɔɔmɔi ha yɛ be mli ni atsake Saul ni jɛ Tarso lɛ kɛ agbɛnɛ beni aje maŋsɛɛ sanekpakpa shiɛmɔ nitsumɔ shishi yɛ Jeŋmajiaŋbii lɛ ateŋ lɛ. (Bɔf. 9:3-7, 10-17; 10:9-16, 19-23; 11:12) Shi jeee be fɛɛ be akɛ gbɛtsɔɔmɔ ni he hiaa lɛ haa yɛ naakpɛɛ gbɛi nɛɛ anɔ. Be bashɛ ni anuuu gbeei kɛjɛɛɛ ŋwɛi dɔŋŋ, ŋwɛibɔfoi ejieee amɛhe kpo amɛtsɔɔɔ gbɔmɛi dɔŋŋ ni mumɔ lɛ naakpɛɛ nikee nii lɛ sɛɛ fo. Shi Yesu ewo esɛɛnyiɛlɔi anɔkwafoi lɛ ashi akɛ: “Ni naa, mi lɛ mikɛ nyɛ yɛ daa kɛyashi jeŋ naagbee lɛ,” ni anɔkwa saji lɛ tsɔɔ akɛ ekɛ amɛ yɛ hu. (Mat. 28:20; 1 Kor. 13:8) Jeee akɛ Yehowa Odasefoi kpɛlɛɔ eyitsoyeli lɛ nɔ kɛkɛ, shi moŋ, eka shi faŋŋ akɛ kulɛ amɛnyɛŋ amɛya nɔ amɛjaje Maŋtsɛyeli lɛ he sane lɛ yɛ shitee-kɛ-woo ni mli wa lɛ mli kɛ́ eyelikɛbuamɔ bɛ mli.

6. (a) Namɛi feɔ “tsulɔ anɔkwafo kɛ nilelɔ” lɛ, ni mɛni hewɔ? (b) Mɛɛ nitsumɔ akɛha nakai “tsulɔ” lɛ?

⁶ Beni eshwɛ fioo ni Yesu baagbo lɛ, ewie “tsulɔ anɔkwafo kɛ nilelɔ” ni Lɛ akɛ Nuŋtsɔ lɛ ekɛ gbɛnaa nii krɛdɛɛ ko baawo edɛŋ lɛ he etsɔɔ ekaselɔi lɛ. Taakɛ Yesu sane mlitsɔɔmɔ lɛ tsɔɔ lɛ, nakai “tsulɔ” lɛ baahi shi yɛ be mli ni Nuŋtsɔ lɛ shiɔ kɛyaa ŋwɛi lɛ ni ebaahi shi lolo yɛ be mli ni Kristo kuɔ esɛɛ lɛ. Eka shi faŋŋ akɛ nɛkɛ sane mlitsɔɔmɔ nɛɛ nyɛŋ afee nɔ ni sa gbɔmɔ aŋkro ko. Shi esa Kristo anɔkwafoi ni afɔ amɛ mu lɛ asafo lɛ fɛɛ akɛ kuu kome. Yesu wie akɛ ekɛ lɛ diɛŋtsɛ ela baahe amɛ, no hewɔ lɛ, ewie amɛhe tamɔ kuu akɛ “tsulɔ.” Eha amɛ nitsumɔ ni amɛtsu, ekɛ nitsumɔ fɔ amɛnɔ akɛ amɛ fɛɛ amɛfee kaselɔi ni amɛlɛ amɛ yɛ mumɔŋ, amɛha amɛ “[mumɔŋ] ŋmaa yɛ be ni sa mli.” Mumɔ krɔŋkrɔŋ ma amɛhalamɔ lɛ nɔ mi yɛ Pentekoste afi 33 Ŋ.B.—Mat. 24:45-47; 28:19, 20; 1 Kor. 6:19, 20; okɛto Yesaia 43:10 he.

7. (a) Mɛɛ gbɛnaa nii ni mli elɛɛ “tsulɔ” lɛ yɔɔ ŋmɛnɛ? (b) Mɛni hewɔ gbɛtsɔɔmɔ ni atsɔɔ kuu nɛɛ nɔ akɛhaa wɔ lɛ nɔkpɛlɛmɔ he hiaa lɛ?

⁷ Kɛji yɛ Nuŋtsɔ lɛ sɛɛkuu mli ni ebana ni “tsulɔ” lɛ miitsu enitsumɔ lɛ yɛ anɔkwayeli mli lɛ, ekɛ gbɛnaa nii ni dara baawo edɛŋ. Afii ni baanyiɛ sɛɛ lɛ baafee be ni ekɛbaaye Maŋtsɛyeli lɛ he odase yɛ jeŋ fɛɛ, ni abaabua “asafo babaoo” ko ni ji Yehowa jalɔi anaa koni abaa amɛyi kɛtsɔ “amanehulu kpeteŋkpele” lɛ mli. (Mat. 24:14; Kpoj. 7:9, 10) Agbɛnɛ, mumɔŋ niyenii he baahia mɛnɛɛmɛi, ni “tsulɔ” kuu lɛ ni ji Kristo sɔɔlɔi ni akɛ mumɔ efɔ amɛ mu lɛ ji mɛi ni baalɛ amɛ. Bɔni afee ni wɔsa Yehowa hiɛ lɛ, ehe miihia ni wɔkpɛlɛ gbɛtsɔɔmɔ ni etsɔɔ nɛkɛ kuu nɛɛ nɔ ekɛhaa lɛ nɔ, ni wɔtsu he nii kɛ gbeekpamɔ.

8, 9. (a) Mɛɛ gbɛjianɔ ato yɛ klɛŋklɛŋ afii oha lɛ mli ni akɛna sanebimɔi ni kɔɔ tsɔɔmɔi kɛ gbɛtsɔɔmɔi ni he hiaa ni kɔɔ sanekpakpa lɛ shiɛmɔ he lɛ ahetoo? (b) Mɛɛ gbɛjianɔtoo ni tamɔ nakai nɔŋŋ yɔɔ ŋmɛnɛ?

⁸ Shi yɛ bei komɛi amli lɛ sanebimɔi ni kɔɔ tsɔɔmɔi loo hemɔkɛyeli kɛ nifeemɔi ahe baate shi. Kɛkɛ lɛ mɛni? Bɔfoi lɛ Asaji yitso 15 lɛ gbaa wɔ sane ko ni te shi ni kɔɔ taomɔ nii kɛha Jeŋmajiaŋbii ni atsake amɛ lɛ ahe ni ana naa. Akɛyafɔ bɔfoi lɛ kɛ onukpai ni yɔɔ Yerusalem ni sɔmɔ akɛ nɔyeli kuu lɛ mli bii lɛ ahiɛ. Nɛkɛ onukpai nɛɛ jeee mɛi ni tɔ̃ɔɔ; amɛjeee gbɔmɛi ni tɔko da. (Okɛto Galatabii 2:11-14 he.) Shi Nyɔŋmɔ kɛ amɛ tsu nii. Amɛsusu nɔ ni Ŋmalɛ ni jɛ mumɔŋ lɛ kɛɔ yɛ sane ni akɛbafɔ̃ amɛhiɛ lɛ he lɛ he kɛ agbɛnɛ nɔ ni Nyɔŋmɔ mumɔ lɛ tsuɔ yɛ Jeŋmajiaŋbii lɛ ni akɛ hegbɛ eha amɛ lɛ hu he, kɛkɛ ni amɛkpɛ amɛyiŋ. Nyɔŋmɔ jɔɔ nakai gbɛjianɔtoo lɛ nɔ. (Bɔf. 15:1-29; 16:4, 5) Ajɛ nɛkɛ nɔyeli kuu nɛɛ ŋɔɔ atsu aŋkroaŋkroi koni amɛyajaje sanekpakpa lɛ amɛtsɔɔ koni ekɛ nɔ ni Nuŋtsɔ lɛ diɛŋtsɛ efa lɛ akpa gbee.—Bɔf. 8:14; Gal. 2:9.

⁹ Mɛi ni feɔ Nɔyeli Kuu lɛ yɛ wɔgbii nɛɛ amli ji nyɛmimɛi ni akɛ mumɔ efɔ amɛ mu ni jɛ shikpɔji sɔrɔtoi anɔ. Amɛyɛ Yehowa Odasefoi ajeŋ fɛɛ nitsumɔ he yitso lɛ. Ekɛ anɔkwayeli tsuɔ jamɔ krɔŋŋ he nii yɛ Yesu Kristo yitsoyeli lɛ shishi. Nɛkɛ nyɛmimɛi nɛɛ hiɛ jwɛŋmɔ ni bɔfo Paulo, ni yɛ be mli ni ekɛ mumɔŋ ŋaawoo ko majeɔ enanemɛi Kristofoi lɛ, eŋma nɛkɛ lɛ hiɛ lɛ nɔŋŋ: “Jeee akɛ nyɛ hemɔkɛyeli lɛ nyɔŋ wɔyeɔ, shi moŋ nyɛmiishɛɛ lɛ he nitsumɔ hefatalɔi ji wɔ, ejaakɛ hemɔkɛyeli mli nyɛdamɔ shi yɛ.”—2 Kor. 1:24.

10. (a) Te afeɔ tɛŋŋ aleɔ mɛi ni baafee onukpai loo asafoŋ sɔɔlɔi lɛ? (b) Mɛni hewɔ esa akɛ wɔkɛ mɛi ni ahala amɛ awo gbɛhei nɛɛ amli lɛ afee ekome lɛ?

¹⁰ Yehowa Odasefoi ni yɔɔ jeŋ fɛɛ lɛ yɔseɔ nɛkɛ teokrase gbɛjianɔtoo nɛɛ. Amɛ asafoi sɔrɔtoi lɛ fɛɛ kɛ amɛ tsuɔ nii yɛ ekomefeemɔ mli. Amɛkɛ amɛhiɛ fɔɔ Nɔyeli Kuu lɛ nɔ koni ehala onukpai kɛ asafoŋ sɔɔlɔi ni amɛkwɛ asafo lɛ nitsumɔi ni baaya nɔ fɛfɛo lɛ nɔ. Mɛni nɔ adamɔɔ afeɔ nɛkɛ halamɔi nɛɛ? Atsɔɔ taomɔ nii lɛ faŋŋ yɛ Biblia lɛ mli. Onukpai ni jieɔ mɛi ayi lɛ kɛ mɛi ni akɛ hegbɛ eha amɛ koni amɛhala mɛi lɛ tere sɔ ko ni tsii waa yɛ Nyɔŋmɔ hiɛ ni esa akɛ amɛkɛ amɛhe akpɛtɛ he. (1 Tim. 3:1-10, 12, 13; 5:22; Tito 1:5-9) Oshikifɔɔ ko he nitsumɔ eyaaa nɔ yɛ asafo lɛ mli ni asaŋ aholeee niji anɔ akɛhalaaa mɔ ko. Shi moŋ, yɛ nɔ ni kɛ nii ni bɔfoi lɛ fee yɛ be mli ni ahalaa mɛi yɛ klɛŋklɛŋ afii oha lɛ mli lɛ kpaa gbee lɛ, nɔkwɛlɔi ni gbɛnaa nii ka amɛnɔ akɛ amɛjie mɛi ayi, kɛ mɛi ni yɛ sɛɛ mli lɛ amɛhalaa mɛi lɛ fɛɛ sɔleɔ koni Nyɔŋmɔ mumɔ lɛ aye abua amɛ, ni amɛtaoɔ gbɛtsɔɔmɔ kɛjɛɔ e-Wiemɔ ni jɛ mumɔŋ lɛ mli. (Bɔf. 6:2-4, 6; 14:23; okɛto Lala 75:7, 8 he.) Wɔtsɔɔ bɔ ni wɔheɔ gbɛtsɔɔmɔ ni onukpai lɛ kɛhaa lɛ nɔ wɔtsɔɔ hiɛsɔɔ ni wɔyɔɔ kɛha gbɛjianɔ ni suɔmɔ yɔɔ mli ni Kristo eto yɛ nɛkɛ “nikee nii yɛ gbɔmɛi ateŋ” nɛɛ he lɛ, koni amɛye amɛbua wɔ fɛɛ ni wɔnine ashɛ “ekomefeemɔ yɛ hemɔkɛyeli lɛ mli” lɛ nɔ.—Efes. 4:8, 11-16, NW.

11. (a) Mɛɛ nitsumɔ ni sɛɛnamɔ yɔɔ he yei ni yɔɔ teokrase gbɛjianɔtoo lɛ mli lɛ tsuɔ? (b) Mɛɛ be mli ehe bahiaa ni amɛkɛ nɔ ko aha amɛyiteŋ, ni mɛni hewɔ?

¹¹ Ŋmalɛi lɛ tsɔɔ akɛ esa akɛ hii akwɛ nɔkwɛmɔ gbɛhei ni yɔɔ asafo lɛ mli lɛ anɔ. Enɛ baaa yei ashi yɛ gbɛ ko nɔ, ejaakɛ amɛteŋ mɛi pii fata ŋwɛi gboshiniyelɔi yɛ Maŋtsɛyeli lɛ mli lɛ ahe. Kɛ yei ni ji Kristofoi lɛ kɛ heshibaa, hetsemɔ kɛ jeŋba kpakpa kwɛ amɛwekui anɔ lɛ, amɛ hu amɛyeɔ amɛbuaa ni asafo lɛ naa gbɛi kpakpa. (Tito 2:3-5) Amɛtsuɔ babaoo yɛ mɛi heei ni yɔɔ wiemɔ lɛ he miishɛɛ ni anaa amɛ ni akɛ amɛ hu baa gbɛjianɔtoo lɛ mli lɛ mli. (Lala 68:12) Shi hii ni ahala amɛ yɛ asafo lɛ mli lɛ ji hii ni tsɔɔ nii yɛ mli. (1 Tim. 2:12, 13) Ni kɛji akɛ hii ni he esa bɛ yɛ kpee ko ni asafo lɛ to he gbɛjianɔ lɛ shishi lɛ, belɛ yoo baaha eyiteŋ yɛ be mli ni ekwɛɔ kpee lɛ nɔ loo esɔleɔ lɛ.a Yɛ nɛkɛ gbɛ nɔ lɛ, ejieɔ bulɛ kpo etsɔɔ Yehowa gbɛjianɔtoo lɛ, taakɛ Yesu to okadi kɛha mɛi fɛɛ yɛ heshibaa kɛha e-Tsɛ lɛ mli lɛ.—1 Kor. 11:3-16; Yoh. 8:28, 29.

12. (a) Mɛni ji jwɛŋmɔ ni Biblia lɛ woɔ onukpai ahewalɛ akɛ amɛna yɛ amɛgbɛhei lɛ he? (b) Mɛɛ hegbɛ ni ekaaa wɔ fɛɛ wɔbaanyɛ wɔna mli gbɛfaŋnɔ?

¹² Yɛ je lɛ mli lɛ akɛ bulɛ babaoo haa mɔ ni hiɛ gbɛhe ni nɔ kwɔ lɛ akɛ mɔ ko ni he hiaa waa, shi yɛ Nyɔŋmɔ gbɛjianɔtoo lɛ mli lɛ, mla lɛ ji: “Mɔ ni feɔ ehe mɔ bibioo yɛ nyɛ fɛɛ nyɛteŋ lɛ ji mɔ ni ji agbo.” (Luka 9:46-48; 22:24-26, NW) No hewɔ lɛ Ŋmalɛ lɛ woɔ onukpai lɛ aŋaa ni amɛkwɛ jogbaŋŋ ni amɛkatsɔmɔ nuŋtsɔmɛi yɛ Nyɔŋmɔ webii anɔ, shi moŋ, amɛto okadi kpakpa amɛha asafoku lɛ. (1 Pet. 5:2, 3) Jeee mɛi fioo ko pɛ ni ahala amɛ, shi Yehowa Odasefoi fɛɛ, hii kɛ yei fɛɛ yɛ hegbɛ ni ekaaa akɛ amɛaadamɔ jeŋ muu fɛɛ Maŋtsɛ lɛ najiaŋ, ni amɛkɛ heshibaa awie yɛ egbɛi amli ni amɛgba gbɔmɛi ni yɔɔ he fɛɛ he lɛ e-Maŋtsɛyeli lɛ he sane.

13. Okɛ ŋmalɛi ni atsɛ lɛ atsu nii ni okɛtsɔɔ sanebimɔi ni ato naa yɛ kuku nɛɛ naagbee lɛ amli.

¹³ Wɔɔfee jogbaŋŋ akɛ wɔɔbi wɔ diɛŋtsɛ wɔhe akɛ: “Ani wɔhiɛ sɔɔ bɔ ni Yehowa kudɔɔ egbɛjianɔtoo ni anaa lɛ lɛlɛŋ? Ani wɔsubaŋi, wiemɔ kɛ nifeemɔ tsɔɔ nakai?” Saji otii ni nyiɛ sɛɛ nɛɛ ahesusumɔ baaye abua wɔteŋ mɔ fɛɛ mɔ ni wɔpɛi wɔ diɛŋtsɛ wɔmli wɔkwɛ:

Kɛ wɔba wɔhe shi lɛlɛŋ wɔha Kristo akɛ asafo lɛ yitso lɛ, kɛkɛ lɛ taakɛ atsɔɔ yɛ ŋmalɛi ni nyiɛ sɛɛ nɛɛ amli lɛ, mɛni ji nɔ ni wɔbaaya nɔ wɔfee? (Mat. 24:14; 28:19, 20; Luka 21:34-36; Yoh. 13:34, 35)

Yɛ mɔdɛŋ ni amɛbɔɔ koni amɛfee Kristofoi ni woɔ yibii lɛ hewɔ lɛ, nɛgbɛ esa akɛ mɛi fɛɛ ni ji gbɛjianɔtoo lɛ fa lɛ anu he akɛ amɛkɛ amɛhe fɔɔ Nyɔŋmɔ kɛ Kristo nɔ kɛyashɛɔ? (Yoh. 15:5; 1 Kor. 3:5-7)

Kɛ onukpai bɔ mɔdɛŋ ni amɛjaje gbɔmɛi ajwɛŋmɔ koni amɛsusu saji ahe yɛ gbɛ ni kɛ gbɛjianɔtoo muu lɛ fɛɛ kpaa gbee nɔ lɛ, namɔ ji mɔ ni esa akɛ wɔsusu emlihilɛ yɛ nɛkɛ sane nɛɛ mli lɛ he? (Efes. 4:7, 8, 11-13; 2 Kor. 13:11)

Kɛ wɔkɛ hiɛsɔɔ kpɛlɛ mumɔŋ gbɛjianɔtoo ni baa kɛtsɔɔ “tsulɔ” kuu lɛ kɛ e-Nɔyeli Kuu lɛ nɔ lɛ nɔ lɛ, belɛ wɔmiijie bulɛ kpo wɔmiitsɔɔ namɔ? Shi kɛ wɔwie mɛnɛɛmɛi ahe efɔŋ hu? (Luka 10:16; okɛto 3 Yohane 9, 10 he.)

Mɛni hewɔ esaaa akɛ wɔwieɔ wɔshiɔ onukpai ni ahala amɛ lɛ? (Bɔf. 20:28; Rom. 12:10)

14. (a) Wɔtsɔɔ subaŋ ni wɔjieɔ lɛ kpo yɛ teokrase gbɛjianɔtoo lɛ he lɛ nɔ wɔtsɔɔ mɛni? (b) Yɛ enɛ gbɛfaŋ lɛ, mɛɛ hegbɛ baa kɛhaa wɔ ni wɔkɛjie lɛ kpo wɔtsɔɔ akɛ Abonsam lɛ amalelɔ ni, koni Yehowa tsui anya?

¹⁴ Yehowa tsɔɔ egbɛjianɔtoo ni anaa ni yɔɔ Kristo shishi akɛ yitso ni ehala lɛ lɛ nɔ ekɛ wɔ yeɔ ŋmɛnɛ. No hewɔ lɛ su ni wɔjieɔ lɛ kpo yɛ egbɛjianɔtoo lɛ he lɛ tsɔɔ wɔshidaamɔ yɛ jeŋ muu fɛɛ nɔyeli he sane nɛɛ he diɛŋtsɛ. (Heb. 13:17) Satan kɛɔ akɛ nɔ ni tsirɛɔ wɔ fe fɛɛ ji pɛsɛmkunya akɔnɔ, akɛ nɔ ni wɔtaoɔ titri ji wɔ diɛŋtsɛ wɔhe nii. Shi kɛ wɔjɛ miishɛɛ mli wɔkɛ wɔhe ha akɛ wɔɔsɔmɔ yɛ gbɛ fɛɛ gbɛ ni he hiaa nɔ, ni wɔwieee ni wɔfeee nii hu ni baagbala jwɛŋmɔ ni esaaa kɛba wɔnɔ lɛ, wɔtsɔɔ akɛ Abonsam lɛ, amalelɔ ni. Kɛji akɛ wɔsɔmɔɔ, ni wɔkɛ bulɛ haa ‘mɛi ni nyiɛɔ hiɛ’ yɛ wɔteŋ lɛ, ni wɔkaseɔ amɛhemɔkɛyeli, shi wɔkpoɔ akɛ wɔɔtsɔmɔ gbɔmɛi ni ‘kwɛɔ gbɔmɛi ahiɛŋtsei anɔ kɛha wɔ diɛŋtsɛ wɔsɛɛnamɔ’ lɛ, wɔhaa Yehowa tsui nyaa. (Heb. 13:7; Yuda 16) Kɛ wɔna bulɛ ni ja wɔha Yehowa gbɛjianɔtoo lɛ ni wɔjɛ wɔtsuiŋ fɛɛ wɔtsu nitsumɔ ni ekudɔɔ lɛ, wɔyeɔ odase akɛ Yehowa ji wɔ-Nyɔŋmɔ lɛlɛŋ, ni akɛ wɔfee ekome yɛ ejamɔ mli.—1 Kor. 15:58.

[Shishigbɛ niŋmai]

Sanegbaa Ni Akɛtiɔ Mli

● Mɛni ji Yehowa gbɛjianɔtoo ni anaa ŋmɛnɛ lɛ? Mɛni ji eyiŋtoo?

● Namɔ ji asafo lɛ yitso ni ahala lɛ? Mɛɛ gbɛjianɔtoi ni anaa nɔ etsɔɔ ekɛ gbɛtsɔɔmɔ ni suɔmɔ yɔɔ mli haa wɔ ŋmɛnɛ?

● Mɛɛ sui kpakpai ni kɔɔ gbɛnaa nii kɛ gbɔmɛi ni yɔɔ gbɛjianɔtoo lɛ mli lɛ ahe esa akɛ wɔna?