Mɛni Yehowa Odasefoi Heɔ Yeɔ?

“Wɔmiisumɔ akɛ wɔɔbo ojwɛŋmɔ lɛ toi; ejaakɛ nɛkɛ kuu fã nɛɛ wɔle akɛ awieɔ he efɔŋ yɛ he fɛɛ he.” (Bɔfoi lɛ Asaji 28:22) Nɛkɛ akutseiaŋ hiɛnyiɛlɔi ni hi shi yɛ klɛŋklɛŋ afii oha lɛ mli yɛ Roma lɛ fee nɔkwɛmɔnɔ kpakpa. Amɛmiisumɔ ni amɛnu sane lɛ kɛjɛ ejɛɛhe diɛŋtsɛ moŋ fe nɔ ni amɛaanu kɛaajɛ mɛi ni yɔɔ sɛɛ ni wieɔ shiɔ mɛi lɛ aŋɔɔ.

Nakai nɔŋŋ hu ŋmɛnɛ, awieɔ ashiɔ Yehowa Odasefoi shii abɔ, ni ebaafee tɔmɔ akɛ ooosumɔ ni ole anɔkwale ni kɔɔ amɛhe lɛ kɛaajɛ mɛi ni bɛ amɛhe jwɛŋmɔ kpakpa lɛ aŋɔɔ. No hewɔ lɛ eŋɔɔ wɔnaa akɛ wɔɔtsɔɔ bo wɔhemɔkɛyelii titrii lɛ ekomɛi amli.

Biblia lɛ, Yesu Kristo, kɛ Nyɔŋmɔ

Wɔheɔ wɔyeɔ akɛ “Ŋmalɛ fɛɛ Ŋmalɛ jɛ Nyɔŋmɔ mumɔ lɛŋ ni ehe yɛ sɛɛnamɔ.” (2 Timoteo 3:16, New World Translation) Eyɛ mli akɛ mɛi komɛi ewie akɛ wɔjeee Kristofoi diɛŋtsɛ moŋ, shi enɛ jeee anɔkwale. Wɔkpɛlɛɔ bɔfo Petro odaseyeli ni kɔɔ Yesu Kristo he lɛ nɔ kwraa kɛmɔɔ shi akɛ: “Gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.”—Bɔfoi lɛ Asaji 4:12.

Shi, akɛni Yesu kɛɛ eji ‘Nyɔŋmɔ Bi’ ni ákɛ ‘Tsɛ lɛ tsu mi’ hewɔ lɛ, Yehowa Odasefoi heɔ yeɔ akɛ Nyɔŋmɔ da fe Yesu. (Yohane 10:36; 6:57) Yesu diɛŋtsɛ kpɛlɛ nɔ akɛ: “Mitsɛ da fe mi.” (Yohane 14:28; 8:28) No hewɔ lɛ, wɔheee wɔyeee akɛ Yesu kɛ Tsɛ lɛ yeɔ egbɔ, taakɛ Triniti tsɔɔmɔ lɛ kɛɔ lɛ. Shi moŋ, wɔheɔ wɔyeɔ akɛ Nyɔŋmɔ bɔ lɛ, ni ákɛ ebaa ehe shi ehaa Lɛ.—Kolosebii 1:15; 1 Korintobii 11:3.

Nyɔŋmɔ gbɛi ji Yehowa yɛ Ga wiemɔ mli. Biblia lɛ kɛɔ akɛ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” (Lala 83:19) Yɛ nɛkɛ sanejajemɔ nɛɛ kɛ nitsumɔ naa lɛ, Yesu ma Nyɔŋmɔ gbɛi lɛ nɔ mi babaoo, ni etsɔɔ ekaselɔi lɛ ni amɛsɔle akɛ: “Wɔtsɛ ni yɔɔ ŋwɛi, ogbɛi lɛ he atse.” Ni lɛ diɛŋtsɛ esɔle eha Nyɔŋmɔ akɛ: “Mijie ogbɛi lɛ ashi mitsɔɔ gbɔmɛi ni oŋɔ amɛ . . . oha mi lɛ.”—Mateo 6:9; Yohane 17:6.

Yehowa Odasefoi heɔ yeɔ akɛ esa akɛ amɛtamɔ Yesu yɛ Nyɔŋmɔ gbɛi kɛ yiŋtoi ni amɛjieɔ lɛ kpo amɛtsɔɔ mɛi krokomɛi lɛ mli. No hewɔ lɛ wɔŋɔ gbɛi Yehowa Odasefoi, ejaakɛ wɔkaseɔ Yesu, “odasefonyo anɔkwafo lɛ.” (Kpojiemɔ 1:5; 3:14) No hewɔ lɛ, Yesaia 43:10 kɛɔ Nyɔŋmɔ najiaŋdamɔlɔi lɛ yɛ gbɛ ni ja nɔ, akɛ: “Yehowa kɛɛ, nyɛ ji midasefoi, kɛ mitsulɔ ni mihala.”

Nyɔŋmɔ Maŋtsɛyeli Lɛ

Yesu tsɔɔ esɛɛnyiɛlɔi lɛ ni amɛsɔle akɛ, “Ha omaŋtsɛyeli lɛ aba,” ni eha nakai Maŋtsɛyeli lɛ fee enitsɔɔmɔ lɛ saneyitso titri. (Mateo 6:10; Luka 4:43, NW) Yehowa Odasefoi heɔ yeɔ akɛ Maŋtsɛyeli lɛ ji nɔyeli diɛŋtsɛ ni jɛ ŋwɛi, ákɛ ebaaye shikpɔŋ lɛ nɔ, ni ákɛ Yesu Kristo ji enɔ Maŋtsɛ ni ahala lɛ ni anaaa lɛ. Biblia lɛ kɛɔ akɛ, “Elumɔyeli lɛ aaakã ekɔŋ nɔ . . . Elumɔyeli lɛ shweremɔ kɛ hejɔlɛ lɛ sɛɛ efoŋ.”—Yesaia 9:5, 6.

Shi Yesu Kristo efeŋ Nyɔŋmɔ nɔyeli lɛ nɔ maŋtsɛ kome pɛ ni yɔɔ. Ebaaná hefatalɔi nɔyelɔi babaoo yɛ ŋwɛi. Bɔfo Paulo ŋma akɛ: “Kɛ wɔmia wɔhiɛ yɛ amanehulu mli lɛ, wɔkɛ lɛ aaaye maŋtsɛ hu.” (2 Timoteo 2:12) Biblia lɛ tsɔɔ akɛ adesai ni ateeɔ amɛ shi koni amɛkɛ Kristo ayaye maŋtsɛ yɛ ŋwɛi lɛ ayibɔ ji “mɛi akpei oha-kɛ-nyɔŋmai-ejwɛ-kɛ-ejwɛ lɛ ni ahe kɛjɛ shikpɔŋ lɛ nɔ lɛ” kɛkɛ.—Kpojiemɔ 14:1, 3.

Eji anɔkwale akɛ esa akɛ nɔyeli fɛɛ nɔyeli aná eshishibii, ni Yehowa Odasefoi heɔ yeɔ akɛ gbɔmɛi akpekpei toi akpei abɔ baaná naanɔ wala kɛfata nɛkɛ ŋwɛi nɔyelɔi nɛɛ ahe. Yɛ naagbee lɛ nɛkɛ Nyɔŋmɔ Maŋtsɛyeli lɛ shishibii ni sa nɛɛ baahi shikpɔŋ ni atsake lɛ afee lɛ paradeiso fɛfɛo lɛ nɔ, ni amɛ fɛɛ amɛbaaba amɛhe shi amɛha Kristo kɛ ehefatalɔi nɔyelɔi lɛ. No hewɔ lɛ Yehowa Odasefoi yɛ nɔmimaa ni ma shi shiŋŋ akɛ afiteŋ shikpɔŋ lɛ kɔkɔɔkɔ ni ákɛ Biblia mli shiwoo lɛ baaba mli akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29; 104:5.

Shi mɛɛ gbɛ nɔ Nyɔŋmɔ Maŋtsɛyeli lɛ baatsɔ aba? Kɛtsɔ gbɔmɛi fɛɛ ni amɛaajɛ amɛsuɔmɔ mli amɛba amɛhe shi amɛha Nyɔŋmɔ nɔyeli lɛ nɔ? Jeee nakai kwraa, Biblia lɛ tsɔɔ diɛŋtsɛ akɛ Maŋtsɛyeli ni baa lɛ baabi ni Nyɔŋmɔ diɛŋtsɛ kɛ ehe awo adesai asaji amli: “Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ . . . Eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:44, wɔma efã ko nɔ mi.

Mɛɛ be Nyɔŋmɔ Maŋtsɛyeli lɛ baaba? Yehowa Odasefoi heɔ yeɔ akɛ, yɛ Biblia mli gbalɛi ni baa mli bianɛ lɛ hewɔ lɛ, etsɛŋ kwraa ni ebaaba. Wɔmiifɔ bo nine ni osusu gbalɛi komɛi ni kɔɔ yiwalɛ nibii agbɛjianɔtoo nɛɛ “naagbee gbii lɛ” ahe lɛ ekomɛi ahe. Aŋmala enɛɛmɛi yɛ Mateo 24:3-14; Luka 21:7-13, 25-31; kɛ 2 Timoteo 3:1-5.

Akɛni ‘wɔsumɔɔ Yehowa wɔ-Nyɔŋmɔ lɛ kɛ wɔtsui, wɔsusuma, wɔjwɛŋmɔ kɛ hewalɛ fɛɛ kɛ wɔnaanyo hu tamɔ wɔ diɛŋtsɛ wɔhe’ hewɔ lɛ, maŋ, hewolonɔ su kɛ kwasafoŋ shihilɛ ko gbalako wɔmli. (Marko 12:30, 31) Ale wɔ jogbaŋŋ yɛ he fɛɛ he yɛ suɔmɔ ni wɔnyɛmimɛi Kristofoi lɛ jieɔ lɛ kpo yɛ amɛteŋ ni anaa yɛ maji fɛɛ nɔ lɛ hewɔ. (Yohane 13:35; 1 Yohane 3:10-12) No hewɔ lɛ wɔkɛ wɔhe wooo nakai jeŋmaji lɛ amaŋkwramɔŋ saji amli. Wɔbɔɔ mɔdɛŋ ni wɔtamɔ Yesu shishijee kaselɔi lɛ, mɛi ni ewie amɛhe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli” lɛ. (Yohane 17:16) Wɔheɔ wɔyeɔ akɛ, he ni aaatsi kɛaajɛ je lɛ he lɛ tsɔɔ je lɛ jeŋba shara ni egbɛ eshwã waa ŋmɛnɛ lɛ ni aaakwa, kɛ emli amale, juu, ajwamaŋbɔɔ, gbalafitemɔ, hii kɛ hii kɛ yei kɛ yei ni kɛ amɛhe feɔ yakayaka nii, lá ni akɛtsuɔ nii yɛ gbɛ fɔŋ nɔ, wɔŋjamɔ, kɛ nibii krokomɛi ni tamɔ nɛkɛ ni Biblia lɛ wieɔ shiɔ lɛ.—1 Korintobii 6:9-11; Efesobii 5:3-5; Bɔfoi lɛ Asaji 15:28, 29.

Hiɛnɔkamɔ Kɛha Wɔsɛɛ Be

Yehowa Odasefoi heɔ yeɔ akɛ wɔŋmɛnɛŋmɛnɛ shihilɛ yɛ je nɛɛ mli lɛ jeee nɔ fɛɛ nɔ ni yɔɔ. Wɔheɔ wɔyeɔ akɛ Yehowa tsu Kristo kɛba shikpɔŋ nɔ koni ebafɔse ewala ni ji elá eshwie shi akɛ kpɔmɔnɔ koni adesai anyɛ aná jalɛ shidaamɔ yɛ Nyɔŋmɔ hiɛ ni amɛnine ashɛ naanɔ wala nɔ yɛ nibii agbɛjianɔtoo hee ko mli. Taakɛ Yesu bɔfo ko kɛɛ lɛ: “Abu wɔ bem yɛ elá lɛ hewɔ.” (Romabii 5:9; Mateo 20:28) Yehowa Odasefoi ahiɛ sɔɔ Nyɔŋmɔ kɛ e-Bi lɛ jogbaŋŋ diɛŋtsɛ yɛ nɛkɛ kpɔmɔnɔ he gbɛjianɔtoo ni haa wɔsɛɛ be shihilɛ feɔ nɔ ni baanyɛ aba lɛ hewɔ.

Yehowa Odasefoi yɛ hekɛnɔfɔɔ ni yeɔ emuu yɛ wɔsɛɛ be shihilɛ lɛ mli, nɔ ni damɔ shitee kɛmiijɛ gbohii ateŋ yɛ Nyɔŋmɔ Maŋtsɛyeli lɛ shishi lɛ nɔ. Wɔheɔ wɔyeɔ taakɛ Biblia lɛ tsɔɔ lɛ, ákɛ kɛ gbɔmɔ gbo lɛ ebɛ shihilɛ mli dɔŋŋ, ni ákɛ “nakai gbi lɛ nɔŋŋ eyiŋtoi laajeɔ.” (Lala 146:3, 4; Ezekiel 18:4; Jajelɔ 9:5) Hɛɛ, wɔsɛɛ be shihilɛ kɛha gbohii lɛ damɔ kaimɔ ni Nyɔŋmɔ aaakai amɛ yɛ gbohiiashitee lɛ mli lɛ nɔ.—Yohane 5:28, 29.

Shi Yehowa Odasefoi yɛ hekɛnɔfɔɔ akɛ mɛi pii yɛ shihilɛ mli bianɛ ni amɛyi baana wala yɛ be mli ni Nyɔŋmɔ Maŋtsɛyeli lɛ kɛ ŋmɛnɛŋmɛnɛ nɔyelii lɛ fɛɛ baa amɛnaagbee lɛ, ni taakɛ Noa kɛ eweku lɛ je Nu Afua lɛ mli lɛ, amɛbaahi shi ni amɛná wala mli ŋɔɔmɔ yɛ shikpɔŋ ni nɔ tse nɔ kɛya naanɔ. (Mateo 24:36-39; 2 Petro 3:5-7, 13) Shi wɔheɔ wɔyeɔ akɛ yibaamɔ damɔ Yehowa taomɔ nii ni wɔnine aaashɛ nɔ lɛ nɔ, taakɛ Biblia lɛ kɛɔ lɛ: “Je lɛ hoɔ eyaa . . . , shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17; Lala 37:11; Kpojiemɔ 7:9, 13-15; 21:1-5.

Eka shi faŋŋ akɛ wɔnyɛŋ wɔwie Yehowa Odasefoi ahemɔkɛyelii lɛ fɛɛ he yɛ biɛ, no hewɔ lɛ, wɔmiifɔ bo nine ni obi mli lolo.

Kɛ okadi ko etsɔɔɔ lɛ, belɛ Biblia mli ŋmalɛi ni atsɛ lɛ fɛɛ jɛ Ga Biblia lɛ mli.

[Wiemɔ ni akɔ ni akɛmiitsu nii ni yɔɔ baafa 4]

Wɔŋɔ gbɛi Yehowa Odasefoi, ejaakɛ wɔkaseɔ Yesu