Shihilɛ yɛ Toiŋjɔlɛ Jeŋ Hee ko Mli

Te onuɔ he ohaa tɛŋŋ kɛ okwɛ mfoniri ni yɔɔ dɛhiɛmɔ wolo nɛɛ hiɛ lɛ? Ani otsui eshweee toiŋjɔlɛ, miishɛɛ kɛ shweremɔ ni onaa yɛ jɛmɛ lɛ? Hɛɛ eshweɔ. Shi ani eji lamɔ aloo adesã ko kɛkɛ ákɛ aaahe shihilɛi ni tamɔ nɛkɛ aye akɛ ebaaba shikpɔŋ lɛ nɔ gbi ko?

Ekolɛ gbɔmɛi pii susuɔ nakai. Nɔ ni gbɔmɛi naa ŋmɛnɛ ji tawuu, efɔŋfeemɔ, hɔmɔ, hela, gbɔlɛ—kɛ wɔɔtsi fioo nɛɛ tã lɛ. Shi nɔ ni wɔɔnyɛ wɔdamɔ nɔ wɔná hiɛnɔkamɔ yɛ. Yɛ be mli ni Biblia lɛ wieɔ wɔsɛɛ be he lɛ, ekɛɛ akɛ, “yɛ [Nyɔŋmɔ] eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”—2 Petro 3:13; Yesaia 65:17.

Taakɛ Biblia lɛ tsɔɔ lɛ, nɛkɛ “ŋwɛi hee” kɛ “shikpɔŋ hee” nɛɛ jeee ŋwɛi diɛŋtsɛ ni wɔnaa nɛɛ aloo shikpɔŋ diɛŋtsɛ ni wɔnyiɛ nɔ nɛɛ ehee ni akɛbaaba. Abɔ shikpɔŋ ni wɔnyiɛ nɔ lɛ kɛ ŋwɛi nɛɛ akɛ nɔ ni yeɔ emuu, ni Biblia lɛ tsɔɔ akɛ amɛbaahi shi kɛya naanɔ. (Lala 89:37, 38; 104:5) “Shikpɔŋ hee” lɛ baafee adesai jalɔi ni baahi shikpɔŋ lɛ nɔ, ni “ŋwɛi hee” lɛ baafee ŋwɛi maŋtsɛyeli aloo nɔyeli ni yeɔ emuu ni baaye nɛkɛ shikpɔŋ nɔ gbɔmɛi nɛɛ anɔ. Shi ani jwɛŋmɔ yɛ mli akɛ aaahe aye akɛ “shikpɔŋ hee” aloo anunyam jeŋ hee ko baanyɛ aba?

Ojogbaŋŋ, susumɔ anɔkwale ni eji akɛ nɛkɛ shihilɛi kpakpai nɛɛ fata Nyɔŋmɔ shishijee yiŋtoo kɛha shikpɔŋ lɛ he lɛ he okwɛ. Ekɛ klɛŋklɛŋ adesai enyɔ lɛ to shikpɔŋ nɔ Paradeiso lɛ mli yɛ Eden ni eha amɛ nitsumɔ ko ni yɔɔ naakpɛɛ: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ.” (1 Mose 1:28) Hɛɛ, Nyɔŋmɔ yiŋtoo kɛha amɛ ji ni amɛfɔ bii koni yɛ naagbee lɛ amɛlɛɛ amɛ Paradeiso lɛ mli kɛbɔle shikpɔŋ muu lɛ fɛɛ nɔ. Eyɛ mli akɛ yɛ naagbee lɛ amɛhala akɛ amɛboŋ Nyɔŋmɔ toi, ni amɛjie amɛhe kpo akɛ amɛsaaa mɛi ni hiɔ shi kɛyaa naanɔ moŋ, shi Nyɔŋmɔ shishijee yiŋtoo lɛ tsakeko. Ni esa akɛ eba mli yɛ jeŋ hee ko mli!—Yesaia 55:11.

Yɛ anɔkwale mli lɛ, kɛji akɛ okɛ Nuŋtsɔ lɛ Sɔlemɔ lɛ aloo Wɔ-Tsɛ ni Yɔɔ Ŋwɛi Sɔlemɔ lɛ sɔle, ni obi ni Nyɔŋmɔ Maŋtsɛyeli aba lɛ, belɛ oosɔle ni ŋwɛi nɔyeli lɛ abajie efɔŋfeemɔ ni yɔɔ shikpɔŋ lɛ nɔ lɛ ni eye jeŋ hee nɛɛ nɔ. (Mateo 6:9, 10) Ni wɔbaanyɛ wɔná hekɛnɔfɔɔ akɛ Nyɔŋmɔ baaha nakai sɔlemɔ lɛ hetoo, ejaakɛ e-Wiemɔ lɛ woɔ shi akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

Shihilɛ yɛ Nyɔŋmɔ Jeŋ Hee lɛ Mli

Nyɔŋmɔ Maŋtsɛyeli lɛ kɛ shikpɔŋ nɔ sɛɛnamɔi ni anyɛŋ akɛ nɔ ko ato he lɛ baaba, ni ebaatsu nɔ fɛɛ nɔ ni hi ni Nyɔŋmɔ wo shi kɛjɛ shishijee kɛha ewebii koni amɛná mli ŋɔɔmɔ yɛ shikpɔŋ nɔ lɛ he nii. Nyɛɛ kɛ gbɔmɛi ahe jwɛŋmɔ fɔŋ ni anáa ehiŋ shi dɔŋŋ, ni yɛ naagbee lɛ mɔ fɛɛ mɔ ni yɔɔ shikpɔŋ nɔ lɛ baafee shieŋtsɛ diɛŋtsɛ aha mɔ fɛɛ mɔ. Nyɔŋmɔ woɔ shi yɛ Biblia lɛ mli akɛ, ‘ebaaha tai asɛɛ afo kɛyashi shikpɔŋ lɛ naagbeehei lɛ.’ “Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Lala 46:10; Yesaia 2:4.

Yɛ naagbee lɛ abaaha shikpɔŋ muu lɛ fɛɛ atsɔ paradeiso ni tamɔ abɔɔ. Biblia lɛ kɛɔ akɛ: “Ŋã kpataa kɛ shikpɔŋ gbiŋ lɛ aaanya, ŋã kplanaa lɛ hu mli aaafili lɛ, ni eeegba afofro tamɔ fɔfɔi! . . . Ejaakɛ nui aaatue yɛ ŋã kpataa nɔ, ni faai aaaho yɛ ŋã olɛŋlɛ nɔ. Shia ŋã ní nɔ edɔ aaatsɔ kpaakpo, ni shikpɔŋ ní nu bɛ nɔ aaatsɔ nui ní baa sɔŋŋ.”—Yesaia 35:1, 6, 7.

Wɔyɛ nɔ ni wɔɔdamɔ nɔ wɔná miishɛɛ yɛ shikpɔŋ nɔ Paradeiso lɛ mli. Hɔmɔ yeŋ mɔ ko yɛ niyenii ni bɛ dɔŋŋ hewɔ. Biblia lɛ kɛɔ akɛ: “Shikpɔŋ lɛ eba enii.” (Lala 67:7; 72:16) Amɛ fɛɛ amɛbaaná amɛ diɛŋtsɛ amɛdeŋmegbomɔ mli nii lɛ amli ŋɔɔmɔ taakɛ wɔ-Bɔlɔ lɛ woɔ shi lɛ: “Amɛaafee weintromi, ni amɛaaye mli yibii! . . . ni amɛhuŋ hu, ní mɔ kroko aye.”—Yesaia 65:21, 22.

Yɛ Nyɔŋmɔ jeŋ hee lɛ mli lɛ, abuaŋ gbɔmɛi babaoo anaa awoŋ tsũi wujiwuji amli aloo ni amɛaahi tsukoi amli dɔŋŋ, ejaakɛ Nyɔŋmɔ eto eyiŋ akɛ: “Amɛaamamɔ tsũi, ni amɛaahi mli . . . Amɛmamɔŋ tsũi, ní mɔ kroko ahi mli.” Biblia lɛ woɔ shi hu akɛ: “Amɛgboŋ deŋme yakatswaa.” (Yesaia 65:21-23) No hewɔ lɛ, gbɔmɛi baatsu nitsumɔi ni woɔ yibii ni haa mɔ tsui nyɔɔ emli. Shihilɛ etɔŋ mɔ.

Yɛ be ni sa mli lɛ, Nyɔŋmɔ Maŋtsɛyeli lɛ baaku sɛɛ ekɛ toiŋjɔlɛ tsakpaa ni yɔɔ Eden trom lɛ mli yɛ kooloi ateŋ kɛ agbɛnɛ yɛ kooloi kɛ gbɔmɛi ateŋ lɛ aba ekoŋŋ. Biblia lɛ kɛɔ akɛ: “Klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ní ewo fɔ fɛɛ aaahi he kome, ni gbekɛ bibioo aaakpala amɛ.”—Yesaia 11:6-9; Hoshea 2:20.

Bo lɛ susumɔ enɛ he okwɛ, yɛ Paradeiso shikpɔŋ lɛ nɔ lɛ, abaatsa helai kɛ gbɔmɔtsoŋ gbɔjɔmɔi fɛɛ! Nyɔŋmɔ Wiemɔ lɛ maa nɔ mi kɛhaa wɔ akɛ: “Maŋbii lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24) “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.

Bɔ ni Obaanyɛ Oná Mli Ŋɔɔmɔ

Yɛ anɔkwale mli lɛ, Nyɔŋmɔ shiwoi ni kɔɔ shihilɛ yɛ ejalɛ jeŋ hee lɛ mli lɛ he lɛ baaha otsui akanya bo. Ni yɛ be mli ni ekolɛ mɛi komɛi baasusu nɛkɛ jɔɔmɔi nɛɛ ahe akɛ amɛhi fe bɔ ni eeenyɛ efee anɔkwale lɛ, amɛjeee nɔ ni hi tsɔ ni ewa akɛ eeenyɛ eba kɛaajɛ wɔ-Bɔlɔ ni yɔɔ suɔmɔ lɛ ŋɔɔ.—Lala 145:16; Mika 4:4.

Shi taomɔ nii komɛi yɛ ni esa akɛ wɔnine ashɛ nɔ kɛ́ wɔɔnyɛ wɔhi shi kɛya naanɔ yɛ shikpɔŋ nɔ Paradeiso ni baa lɛ mli. Yesu tsɔɔ emli titri kome beni esɔle eha Nyɔŋmɔ akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.”—Yohane 17:3, New World Translation.

No hewɔ lɛ kɛji akɛ wɔmiisumɔ ni wɔhi shi yɛ Nyɔŋmɔ jeŋ hee lɛ mli lɛɛlɛŋ lɛ, esa akɛ klɛŋklɛŋ lɛ wɔkase Nyɔŋmɔ suɔmɔnaa nii ni wɔfee no. Ejaakɛ eji anɔkwale akɛ: “Je lɛ hoɔ eyaa kɛ emli sɛɛdii nii lɛ, shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ” koni eyaná jɔɔmɔi ni wɔsuɔmɔ Bɔlɔ lɛ baafɔse ashwie shi lɛ mli ŋɔɔmɔ kɛya naanɔ.—1 Yohane 2:17.

Kɛ okadi ko etsɔɔɔ lɛ, belɛ Biblia mli ŋmalɛi ni atsɛ lɛ fɛɛ jɛ Ga Biblia lɛ mli.