Yitso 4
Ena Musu Shi Eboteko Gbalashihilɛ Mli
MARIA ena musu nyɔji etɛ. Obaakai akɛ eyasara Elizabet beni emusu nɛɛ je shishi lɛ sɛɛ, shi amrɔ nɛɛ eku esɛɛ kɛtee shia yɛ Nazaret. Etsɛŋ ni emusu lɛ baaje kpo ni abaana yɛ maŋ lɛ mli. Yɛ anɔkwale mli lɛ, enɛ haaa ena miishɛɛ kwraa!
Nɔ ni fiteɔ sane nɛɛ kwraa fe fɛɛ ji akɛ atsɛ Maria he baa aha kapintɛfonyo Yosef. Ni ele akɛ yɛ Nyɔŋmɔ mla ni akɛha Israel lɛ naa lɛ, yoo ni atsɛ ehe baa aha nuu ko, ni eeeje ewu lɛ sɛɛ ekɛ nuu kroko ana bɔlɛ lɛ, esa akɛ atswia lɛ tɛi kɛyashi beni eeegbo. Mɛɛ gbɛ nɔ ebaatsɔ etsɔɔ Yosef bɔ ni fee ni ena musu lɛ?
Akɛni Maria fa gbɛ nyɔji etɛ sɔŋŋ hewɔ lɛ, wɔle akɛ Yosef baasumɔ ni ena lɛ. Beni amɛkpe lɛ, eka shi faŋŋ akɛ Maria bɔ lɛ amaniɛ. Ekolɛ ebaabɔ mɔdɛŋ ni eha enu shishi akɛ Nyɔŋmɔ mumɔ krɔŋkrɔŋ lɛ ji nɔ ni ha ena musu lɛ. Shi, taakɛ obaanyɛ osusu he lɛ, ebaawa kɛha Yosef akɛ ebaahe sane nɛɛ eye.
Yosef le gbɛi kpakpa ni Maria yɔɔ. Ni eka shi faŋŋ akɛ esumɔɔ lɛ waa diɛŋtsɛ. Shi, yɛ nɔ ni ekɛɔ nɛɛ fɛɛ sɛɛ lɛ, etamɔ nɔ ni nuu ko kɛ̃ kɛ lɛ ena musu lɛ. Shi yɛ fɛɛ sɛɛ lɛ, Yosef sumɔɔɔ ni atswia lɛ tɛi ni egbo aloo akɛ ebaashwie ehiɛ shi yɛ maŋ. No hewɔ lɛ, eto eyiŋ akɛ ekɛ lɛ baafo mli yɛ teemɔ mli. Yɛ nakai gbii lɛ amli lɛ, abuɔ mɛi ni atsɛ amɛhe baa lɛ akɛ mɛi ni ebote gbalashihilɛ mli, ni ebiɔ gbala mli tsemɔ diɛŋtsɛ dani anyɛ akɛ enɛ aba naagbee.
Yɛ sɛɛ mli, beni Yosef ka he esusuɔ sane nɛɛ he lolo lɛ, eyaka shi ni ewɔ. Ni Yehowa bɔfo ko ba eŋɔɔ yɛ lamɔ mli ni ekɛɛ lɛ akɛ: “Kaashe oŋa lɛ ŋɔɔ gbeyei, shi hɔ ni ehiɛ nɛɛ ejɛ mumɔ krɔŋkrɔŋ lɛŋ; ebaafɔ binuu, ni ooowo lɛ gbɛi akɛ Yesu, ejaakɛ lɛ ebaahere emaŋ lɛ yiwala kɛjɛ amɛhe eshai lɛ amli.”
Beni Yosef te shi lɛ, mɛɛ miishɛɛ po ena nɛkɛ! Amrɔ nɔŋŋ kɛkɛ ni efee taakɛ bɔ ni ŋwɛibɔfo lɛ kɛɛ lɛ lɛ. Eŋɔ Maria kɛtee shia. Nakai maŋ nifeemɔ lɛ baafee tamɔ egbala mlibotemɔ lɛ he nyamɔ ni tsɔɔ akɛ Yosef kɛ Maria ebote gbalashihilɛ mli kwraa. Shi Yosef kɛ Maria naaa bɔlɛ yɛ be mli ni ehiɛ Yesu musu lɛ.
Naa! Maria musu eda waa, shi kɛlɛ Yosef kɛ lɛ miita teji nɔ. Nɛgbɛ amɛyaa, ni mɛni hewɔ amɛfaa gbɛ beni eshwɛ fioo ni Maria baafɔ lɛ? Luka 1:39-41, 56; Mateo 1:18-25; 5 Mose 22:23, 24.
▪ Mɛni ji Yosef jwɛŋmɔ beni ena ele akɛ Maria hiɛ musu lɛ, ni mɛni hewɔ?
▪ Te Yosef baafee tɛŋŋ ekɛ Maria afo gbala mli beni amɛboteko gbalashihilɛ mli lɛ?
▪ Mɛɛ nifeemɔ yɛ faŋŋ mli bafee Yosef kɛ Maria gbalashihilɛ mlibotemɔ lɛ he nifeemɔ?