Yitso 6

Shiwoo Gbekɛ Lɛ

NI AMƐAAKU amɛsɛɛ amɛya Nazaret moŋ lɛ, Yosef kɛ Maria hi shi yɛ Betlehem. Ni beni Yesu ye gbii kpaanyɔ lɛ, amɛha afolɛ ketia taakɛ Nyɔŋmɔ Mla ni akɛha Mose lɛ fa lɛ. Nɔ ni afɔɔ feemɔ yɛ faŋŋ mli hu ji ni awo gbekɛ nuu lɛ gbɛi yɛ gbi ni ji kpaanyɔ lɛ nɔ. No hewɔ lɛ, amɛtsɛ amɛbi lɛ akɛ Yesu, taakɛ bɔfo Gabriel fa kɛtsɔ hiɛ akɛ amɛtsɛ lɛ lɛ.

Nɔ ni fe nyɔŋ kome ho, ni Yesu baye gbii 40. Nɛgbɛ efɔlɔi lɛ kɛ lɛ tee agbɛnɛ? Amɛkɛ lɛ tee Yerusalem sɔlemɔ we lɛ, ni kɛ amɛteŋ jɛkɛmɔ aaafee shitooi fioo ko lɛ. Taakɛ Nyɔŋmɔ Mla ni ekɛha Mose lɛ tsɔɔ lɛ, kɛ yoo ko fɔ ni ebinuu lɛ ye gbii 40 lɛ, esa akɛ nyɛ lɛ kɛ hetsuumɔ afɔleshaa abaha yɛ sɔlemɔ we lɛ.

Maria fee nakai. Ni ekɛ loofɔji bibii enyɔ ba akɛ afɔleshaa nii. Enɛ tsɔɔ shika gbɛfaŋ shihilɛ mli ni Yosef kɛ Maria yɔɔ. Mose Mla lɛ tsɔɔ akɛ esa akɛ akɛ gwantɛŋ pɛmpɛoo aha, ni enɛ jara wa kwraa fe loofɔji. Shi kɛji nyɛ lɛ nyɛŋ ahe lɛ, no lɛ okpoi bibii enyɔ baahi.

Beni amɛshɛ sɔlemɔ we lɛ pɛ kɛkɛ ni nuumo ko he Yesu ni ehiɛ lɛ. Atsɛɔ lɛ Simon. Nyɔŋmɔ ejie kpo etsɔɔ lɛ akɛ egboŋ ja ena Yehowa shiwoo Kristo lɛ aloo Mesia lɛ dã. Beni Simon ba sɔlemɔ tsu lɛ mli yɛ nɛkɛ gbi nɛɛ nɔ lɛ, mumɔ krɔŋkrɔŋ lɛ kpala lɛ kɛtee gbekɛ ni Yosef kɛ Maria hiɛ lɛ lɛ ŋɔɔ.

Beni Simon he Yesu pɛ kɛkɛ ni eda Nyɔŋmɔ shi ni ekɛɛ: “Agbɛnɛ ha otsulɔ aya, Owura, yɛ owiemɔ lɛ naa, yɛ hejɔlɛ mli; ejaakɛ mihiŋmɛii ena owalaheremɔ lɛ, nɔ ni osaa oma jeŋmaji fɛɛ ahiɛ lɛ, la ni aaatɛje jeŋmaji lɛ ahiɛ ni eeewo omaŋ Israel hiɛ nyam lɛ.”

Efee Yosef kɛ Maria naakpɛɛ waa diɛŋtsɛ beni amɛnu enɛ lɛ. Kɛkɛ ni Simon jɔɔ amɛ ni ekɛɛ Maria akɛ akɛ ebinuu lɛ “edamɔ shi eha mɛi pii ashigbeemɔ kɛ shitee yɛ Israel,” ni akɛ awerɛho baatsurɔ lɛ nyɛ lɛ susuma mli tamɔ tsi ni naa ba.

Mɔ ni yɔɔ jɛmɛ yɛ nɛkɛ be nɛɛ mli hu ji gbalɔyoo ni atsɛɔ lɛ Hana ni eye afii 84 lɛ. Yɛ anɔkwale mli lɛ, anaa lɛ yɛ sɔlemɔ we lɛ be fɛɛ be. Eba jɛmɛ yɛ nakai ŋmɛlɛtswaa lɛ mli nɔŋŋ ni eje shishi ekɛ shidaa ha Nyɔŋmɔ ni ewie Yesu he etsɔɔ mɛi fɛɛ ni baabo toi lɛ.

Kwɛ bɔ ni Yosef kɛ Maria na nibii ni ba yɛ sɔlemɔ we lɛ he miishɛɛ amɛha! Yɛ anɔkwale mli lɛ, enɛɛmɛi fɛɛ maa nɔ mi ehaa amɛ akɛ gbekɛ lɛ ji Mɔ ni Nyɔŋmɔ Ewo Shi yɛ Ehe lɛ. Luka 2:21-38; 3 Mose 12:1-8.

▪ Mɛɛ be mli ebafeɔ faŋŋ akɛ esa akɛ awo Israel gbekɛ nuu gbɛi?

▪ Mɛni ataoɔ yɛ Israel yoo he yɛ be mli ni ebinuu eye gbii 40 lɛ, ni mɛɛ gbɛ nɔ enɛ he nitsumɔ tsɔɔ shika gbɛfaŋ shihilɛ mli ni Maria yɔɔ?

▪ Namɛi yoo mɔ ni Yesu ji yɛ nɛkɛ be nɛɛ mli lɛ, ni mɛɛ gbɛ nɔ amɛha ale enɛ yɛ?