Yitso 54

“Anɔkwa Aboloo ni Jɛɔ Ŋwɛi”

EJI anɔkwale akɛ afee nibii pii yɛ gbi ni tsɔ hiɛ lɛ mli. Yesu lɛ mɛi akpei abɔ yɛ naakpɛɛ gbɛ nɔ kɛkɛ ni ejo foi kɛjɛ gbɔmɛi lɛ adɛŋ beni amɛbɔɔ mɔdɛŋ ni amɛmɔ lɛ ni amɛwo lɛ maŋtsɛ lɛ. Nakai gbɛkɛ lɛ enyiɛ Galilea ŋshɔ ni efee hamahama lɛ hiɛ; ehere Petro yiwala, beni ebɔi nu lɛ shishi yaa yɛ be mli ni enyiɛ ŋshɔ ni ahum eha ekuɔ waa lɛ hiɛ lɛ; ni eha ŋshɔkei lɛ kpa kuumɔ koni ekɛbaa ekaselɔi lɛ ayi ni amɛlɛlɛ lɛ akabutu.

Agbɛnɛ gbɔmɛi ni Yesu lɛ amɛ yɛ naakpɛɛ gbɛ nɔ yɛ Galilea Ŋshɔ lɛ kooyi-bokagbɛ lɛ yana lɛ yɛ Kapernaum masɛi, ni amɛbi lɛ akɛ: “Te be ni oba biɛŋ?” Ni Yesu ka amɛhiɛ, ni ekɛɛ amɛ akɛ amɛba ni amɛbatao lɛ ejaakɛ amɛmiitao niyenii amɛye yaka ekoŋŋ. Ewo amɛ hewalɛ ni amɛtsu nii, jeee kɛha niyenii ni hiɛ kpataa lɛ, shi moŋ kɛha niyenii ni hiɔ shi kɛyaa naanɔ wala mli lɛ. No hewɔ lɛ gbɔmɛi lɛ bi lɛ akɛ: “Te wɔɔfee tɛŋŋ ni wɔtsu Nyɔŋmɔ nitsumɔi lɛ?”

Yesu etsiii nɔ ko ta fe nitsumɔ kome ni sɛɛnamɔ yɔɔ he fe fɛɛ lɛ. Etsɔɔ mli akɛ: “Nyɔŋmɔ nitsumɔ lɛ nɛ, akɛ nyɛhe mɔ ni E-tsu lɛ lɛ nɔ nyɛye.”

Shi gbɔmɛi lɛ naaa hemɔkɛyeli yɛ Yesu mli, yɛ naakpɛɛ nii ni efee lɛ fɛɛ sɛɛ. Yɛ naakpɛɛ nibii ni efee lɛ fɛɛ sɛɛ lɛ, amɛnaaa emli hemɔkɛyeli, ni amɛbi lɛ akɛ: “Belɛ mɛɛ okadi ofeɔ, ni wɔna koni wɔheo wɔye? Mɛni otsuɔ? Wɔtsɛmɛi lɛ ye mana lɛ yɛ ŋa lɛ nɔ, taakɛ bɔ ni aŋma akɛ: ‘Eha amɛ aboloo kɛjɛ ŋwɛi amɛye’ lɛ.”

Yesu tsɔɔ naakpɛɛ nii lɛ Jɛɛhe yɛ faŋŋ mli, ni ekɛha okadi ni amɛbi lɛ lɛ hetoo ni ekɛɛ: “Jeee Mose ji mɔ ni ha nyɛ aboloo lɛ kɛjɛ ŋwɛi lɛ, shi mi-Tsɛ moŋ ha nyɛ anɔkwa aboloo ni jɛɔ ŋwɛi lɛ. Ejaakɛ Nyɔŋmɔ aboloo lɛ ji mɔ ni jɛɔ ŋwɛi kpelekeɔ shi ni eŋɔɔ wala ehaa je lɛ.”

Ni gbɔmɛi lɛ kɛɛ: “Nuŋtsɔ, ha wɔ aboloo nɛɛ daa.”

Yesu tsɔɔ mli akɛ: “Miji wala aboloo lɛ; mɔ ni baa miŋɔɔ lɛ, hɔmɔ yeŋ lɛ gbi ko gbi ko, ni mɔ ni heɔ minɔ eyeɔ lɛ, kumai hu yeŋ lɛ gbi ko gbi ko. Shi miikɛɛ nyɛ akɛ nyɛnami, ni kɛlɛ nyɛheee nyɛyeee. Mɛi fɛɛ ni Tsɛ lɛ ŋɔhaa mi lɛ aaaba miŋɔɔ, ni mɔ ni baa miŋɔɔ lɛ, mishwieŋ lɛ kɔkɔɔkɔ. Ejaakɛ jeee mi diɛŋtsɛ misuɔmɔnaa nii feemɔ hewɔ mijɛ ŋwɛi miba, shi moŋ mɔ ni tsu mi lɛ suɔmɔnaa nifeemɔ. Shi enɛ ji Tsɛ ni tsu mi lɛ suɔmɔnaa nii lɛ, akɛ mɛi fɛɛ ni eŋɔha mi lɛ, mikaha amɛteŋ mɔ ko miilaaje, shi moŋ mitee lɛ shi ekoŋŋ yɛ naagbee gbi lɛ nɔ. Ejaakɛ enɛ ji mi-Tsɛ suɔmɔnaa nii lɛ, akɛ mɔ fɛɛ mɔ ni kwɛɔ Bi lɛ, ni eheɔ enɔ eyeɔ lɛ ana naanɔ wala.”

Enɛ hewɔ lɛ Yudafoi lɛ bɔi huhuuhu wiemɔ kɛ Yesu shimɔ ejaakɛ ekɛɛ, “Miji aboloo ni jɛ ŋwɛi lɛ.” Amɛnaaa nɔ ko nɔ ko kwraa yɛ emli fe adesai fɔlɔi abinuu, no hewɔ lɛ amɛte shi amɛwo lɛ tamɔ Nazaretbii lɛ fee lɛ pɛpɛɛpɛ, ni amɛkɛɛ: “Ani jeee Yosef bi Yesu lɛ, ni wɔle etsɛ kɛ enyɛ lɛ nɛ? Te tɛŋŋ mɔ ni ekɛɔ akɛ: ‘Mijɛ ŋwɛi lɛ’?”

Yesu ha amɛ hetoo akɛ: “Nyɛkawiea huhuuhu yɛ nyɛteŋ. Mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ da, ni mi lɛ matee lɛ shi yɛ naagbee gbi lɛ nɔ. Aŋma yɛ Gbalɔi lɛ amli akɛ: ‘Amɛ fɛɛ amɛaafee Nyɔŋmɔ kaselɔi.’ Mɔ fɛɛ mɔ ni enu yɛ Tsɛ lɛ naa ni ekase hu lɛ, ebaa miŋɔɔ. Jeee akɛ mɔ ko ena Tsɛ lɛ pɛŋ, ja mɔ ni jɛ Nyɔŋmɔ ŋɔɔ lɛ, lɛ ena Tsɛ lɛ. Lɛlɛŋ, lɛlɛŋ, miikɛɛ nyɛ akɛ: Mɔ ni heɔ minɔ yeɔ lɛ eyɛ naanɔ wala.”

Yesu tee nɔ eti mli ekoŋŋ akɛ: “Miji wala aboloo lɛ. Nyɛtsɛmɛi lɛ ye mana yɛ ŋa lɛ nɔ ni amɛgboi. Enɛ ji aboloo ni jɛɔ ŋwɛi baa lɛ, koni gbɔmɔ aye ni ekagbo. Miji aboloo ni hiɛ ka ni jɛ ŋwɛi ba lɛ; kɛji mɔ ko ye aboloo nɛɛ eko lɛ, ehiɛ aaaka kɛaatee naanɔ.” Hɛɛ, kɛji gbɔmɛi lɛ na hemɔkɛyeli yɛ Yesu, mɔ ni Nyɔŋmɔ tsu lɛ lɛ mli lɛ, amɛbaanyɛ amɛna naanɔ wala. Mana, loo aboloo kroko ko nyɛŋ ekɛ enɛ aha!

Eka shi faŋŋ akɛ aboloo ni jɛ ŋwɛi lɛ he sanegbaa lɛ je shishi yɛ be mli ni gbɔmɛi lɛ na Yesu yɛ Kapernaum masɛi lɛ sɛɛ etsɛɛɛ. Shi sanegbaa lɛ tee nɔ, ni eyashɛ enaagbee yɛ sɛɛ mli beni Yesu tsɔɔ nii yɛ kpeehe ko yɛ Kapernaum lɛ. Yohane 6:25-51, 59; Lala 78:24; Yesaia 54:13; Mateo 13:55-57.

▪ Mɛɛ nibii ni ba tsɔ Yesu sanegbaa ni kɔɔ aboloo ni jɛ ŋwɛi lɛ he lɛ hiɛ?

▪ Yɛ nɔ ni Yesu efee yɛ be nɛɛ mli lɛ hewɔ lɛ, mɛni hewɔ okadi ni amɛbi lɛ ni efee etsɔɔ amɛ lɛ he ehiaaa lɛ?

▪ Mɛni hewɔ Yudafoi lɛ wie huhuuhu amɛshi nɔ ni Yesu wie akɛ lɛ ji anɔkwa aboloo ni jɛ ŋwɛi lɛ?

▪ Nɛgbɛ aboloo ni jɛ ŋwɛi lɛ he sanegbaa lɛ ba mli yɛ?