Yitso 72

Yesu Tsu Mɛi 70 Lɛ

AFI 32 Ŋ.B. mli gbo be mli, afii etɛ pɛpɛɛpɛ kɛjɛ be mli ni abaptisi Yesu lɛ. Etsɛko tsɔ ni ekɛ ekaselɔi lɛ yaye Asesei Agbijurɔ lɛ yɛ Yerusalem, ni eka shi faŋŋ akɛ amɛyɛ jɛi niiaŋ lolo. Yɛ anɔkwale mli lɛ, Yesu ye nyɔji ekpaa ni eshwɛ ni ekɛbaatsu esɔɔmɔ nitsumɔ lɛ mli be babaoo yɛ Yudea loo yɛ Yordan Faa lɛ sɛɛ nɔŋŋ, yɛ Perea kpokpaa nɔ. Esa akɛ etsu shikpɔŋkuku nɛɛ hu mli nii.

Eji anɔkwale, yɛ afi 30 Ŋ.B. Hehoo lɛ sɛɛ lɛ, Yesu kɛ nɔ ni miihe ashɛ nyɔji kpaanyɔ shiɛ yɛ Yudea. Shi yɛ be mli ni Yudafoi lɛ bɔ mɔdɛŋ ni amɛgbe lɛ yɛ afi 31 Ŋ.B. Hehoo lɛ mli sɛɛ lɛ, eye no sɛɛ afi kɛ fa ni nyiɛ sɛɛ lɛ ni ekɛtsɔɔ nii yɛ Galilea pɛ. Yɛ nakai be lɛ mli lɛ, eje kuu agbo ko, ni ji shiɛlɔi agbɛjianɔtoo ni atsɔse amɛ jogbaŋŋ, ni tsutsu lɛ ebɛ nɔ ko tamɔ nakai kɛtsɔ hiɛ lɛ shishi. No hewɔ lɛ agbɛnɛ eje naagbee odaseyeli ni mɔɔ shi lɛ he tafaa shishi yɛ Yudea.

Yesu je nɛkɛ tafaa nɛɛ shishi kɛtsɔ kaselɔi 70 ni ehala amɛ ni etsu amɛ enyɔnyɔ lɛ nɔ. No hewɔ lɛ, fɛɛ bafee Maŋtsɛyeli shiɛlɔi akui 35 ni baashiɛ yɛ nakai shikpɔŋkuku lɛ mli. Mɛnɛɛmɛi tsɔ hiɛ ni amɛtee maŋ fɛɛ maŋ kɛ he fɛɛ he ni eka shi faŋŋ akɛ Yesu kɛ ebɔfoi ni fata ehe lɛ miito gbɛjianɔ ni amɛya lɛ.

Yɛ nɔ najiaŋ ni eeefa mɛi 70 lɛ ni amɛya kpee hei lɛ, Yesu kɛɛ amɛ ni amɛya mɛi ashiai amli, ni etsɔɔ mli akɛ: “Ni shia fɛɛ shia ni nyɛaabote lɛ, klɛŋklɛŋ lɛ nyɛkɛa akɛ: Hejɔlɛ aba shia nɛɛ. Ni kɛji hejɔlɛ bi ko yɛ jɛi lɛ, nyɛ hejɔlɛ lɛ aaahi enɔ.” Mɛni ji amɛ shɛɛ sane lɛ? Yesu kɛɛ amɛ akɛ: “Ni nyɛkɛa amɛ akɛ: Nyɔŋmɔ Maŋtsɛyeli lɛ ebɛŋkɛ nyɛ.” Matthew Henry’s Commentary lɛ bɔɔ amaniɛ yɛ mɛi 70 lɛ anitsumɔ he akɛ: “He fɛɛ he ni amɛyasaraa lɛ, amɛshiɛɔ kɛjɛɔ shia kɛyaa shia, tamɔ amɛ-Nuŋtsɔ lɛ.”

Famɔi ni Yesu kɛha mɛi 70 lɛ tamɔ nɔ ni ekɛha mɛi 12 lɛ yɛ be mli ni etsu amɛ yɛ shiɛmɔ he tafaa ko mli yɛ Galilea aaafee afi ni eho lɛ. Jeee shitee-kɛ-woo ni mɛi 70 lɛ kɛbaakpe lɛ he kɔkɔ kɛkɛ ebɔ amɛ, koni ekɛsaa amɛ ni amɛkɛ sane lɛ aha shiatsɛmɛi lɛ, shi moŋ eha amɛ hewalɛ ni amɛtsa helatsɛmɛi hu. No hewɔ lɛ, beni Yesu bashɛ jɛmɛ yɛ no sɛɛ etsɛɛɛ lɛ, mɛi babaoo baasumɔ ni amɛna Nuŋtsɔ ni ekaselɔi feɔ naakpɛɛ nii nɛɛ.

Mɛi 70 lɛ ashiɛmɔ nitsumɔ lɛ kɛ nɔ ni Yesu hu tsu kɛnyiɛ amɛsɛɛ lɛ sɛɛ etsɛɛɛ. Etsɛɛɛ kɛkɛ ni kui 35 ni shiɛɔ Maŋtsɛyeli lɛ he sane lɛ bɔi amɛsɛɛkuu kɛ Yesu ŋɔɔ baa. Amɛkɛ miishɛɛ bakɛɛ lɛ akɛ: “Nuŋtsɔ, ogbɛi lɛ ahewɔ lɛ daimonioi tete baa amɛhe shi amɛhaa wɔ.” Eka shi faŋŋ akɛ amɛsɔɔmɔ he amaniɛbɔɔ fɛfɛo nɛɛ ha Yesu na miishɛɛ, ejaakɛ ehere nɔ akɛ: “Mina Satan tamɔ srawa jɛ ŋwɛi bagbee shi. Naa, miiha nyɛ hegbɛ ni nyɛnaanaa onufui kɛ nyɔŋmɔŋkrakroi kɛ henyɛlɔ lɛ hewalɛ fɛɛ nɔ.”

Yesu le akɛ yɛ be mli ni afɔ Nyɔŋmɔ Maŋtsɛyeli lɛ yɛ naagbee be nɛɛ mli sɛɛ lɛ, abaashɛrɛ Satan kɛ edaimonioi lɛ ashwie kɛjɛ ŋwɛi. Shi amrɔ nɛɛ, adesai foji kɛkɛ ni famɔɔ daimonioi ni anaaa amɛ nɛɛ feɔ nɔ ni gbeɔ yi haa nɔmimaa akɛ nakai nifeemɔ lɛ baaba mli. No hewɔ lɛ, Yesu wie bɔ ni abaashɛ Satan afɔ kɛjɛ ŋwɛi yɛ wɔsɛɛ lɛ he akɛ nɔ ko ni baaba mli lɛlɛŋ. No hewɔ lɛ, mfonirifeemɔ gbɛ nɔ akɛ hewalɛ haa mɛi 70 lɛ yɛ koni amɛkɛnaanaa onufui kɛ nyɔŋmɔŋkrakroi anɔ lɛ. Shi, Yesu kɛɛ: “Kɛlɛ nyɛkanaa enɛ he miishɛɛ, akɛ mumɔi lɛ baa amɛhe shi amɛhaa nyɛ lɛ; shi moŋ nyɛnaa miishɛɛ akɛ aŋma nyɛgbɛi yɛ ŋwɛi.”

Yesu na miishɛɛ waa ni ejie e-Tsɛ lɛ yi yɛ faŋŋ mli akɛni ekɛ nɛkɛ etsuji heshibalɔi nɛɛ etsu nii yɛ gbɛ ni hewalɛ yɔɔ mli nɔ nɛɛ hewɔ. Ni etsɔ ehe ni ekɛɛ ekaselɔi lɛ akɛ: “Ajɔɔ hiŋmɛii ni naa nibii ni nyɛnaa lɛ. Ejaakɛ miikɛɛ nyɛ akɛ gbalɔi kɛ maŋtsɛmɛi pii etao akɛ amɛna nii ni nyɛnaa nɛɛ, ni amɛyanaaa, ni asaŋ amɛnu nii ni nyɛnuɔ nɛɛ, ni amɛyanuuu.” Luka 10:1-24; Mateo 10:1-42; Kpojiemɔ 12:7-12.

▪ Nɛgbɛ Yesu shiɛ yɛ yɛ esɔɔmɔ lɛ mli klɛŋklɛŋ afii etɛ lɛ mli, ni mɛɛ shikpɔŋkuku mli nii etsu yɛ enaagbee nyɔji ekpaa lɛ mli?

▪ Nɛgbɛ Yesu tsɔɔ mɛi 70 lɛ ni amɛyatao mɛi yɛ?

▪ Mɛni hewɔ ni Yesu kɛɛ akɛ ena Satan jɛ ŋwɛi bagbee shi lɛ?

▪ Mɛɛ shishinumɔ naa mɛi 70 lɛ baanyɛ anaanaa onufui kɛ nyɔŋmɔŋkrakroi anɔ yɛ?