Yitso 76

Ekɛ Farisifonyo ko Ye Nii

BENI Yesu ha mɛi ni wieɔ shiɔ lɛ ni bi lɛ he ni ena ehewalɛ lɛ kɛjɛ ni ekatsa nuu ni nyɛɛɛ awie lɛ hetoo sɛɛ lɛ, Farisifonyo ko fɔ lɛ nine ni ekɛ lɛ abaye nii. Kɛ amɛbaaye nii lɛ, Farisifoi lɛ feɔ kusum ko ni ji amɛniji ahe ni amɛfɔɔ kɛbashiɔ amɛnikutso shishi. Amɛfeɔ enɛ dani amɛyeɔ nii kɛ niyenii lɛ sɛɛ fɛɛ kɛ be mli ni amɛyeɔ nii lɛ po. Eyɛ mli akɛ kusum nɛɛ ekuuu Nyɔŋmɔ mla ni aŋma lɛ mli moŋ, shi etekeɔ nɔ ni Nyɔŋmɔ biɔ yɛ mla naa hetsemɔ he lɛ.

Akɛni Yesu efeee nɛkɛ kusum nɛɛ hewɔ lɛ, mɔ ni fɔ lɛ nine lɛ naa kpɛ ehe. Eyɛ mli akɛ ewieee bɔ ni enaa ekpɛ ehe lɛ yɛ faŋŋ moŋ, shi Yesu na ejwɛŋmɔ ni ekɛɛ: “Ŋmɛnɛ ŋmɛnɛ nyɛ Farisifoi lɛ nyɛtsumɔɔ kpulu he kɛ kã sɛɛ, shi nyɛmli eyi obɔ kɛ juu kɛ fɔ. Kwashiai! Ani mɔ ni fee sɛɛ lɛ, jeee lɛ nɔŋŋ efee mli lɛ hu?”

No hewɔ lɛ Yesu jie Farisifoi lɛ ni fɔɔ amɛniji ahe yɛ kusum naa shi amɛfɔɔɔ amɛtsuii amli kɛjɛɛɛ efɔŋfeemɔ mli lɛ asatofeemɔ lɛ kpo yɛ faŋŋ mli. Ewo amɛ ŋaa akɛ: “Moŋ lɛ, nyɛŋɔa nibii ni yɔɔ mli lɛ nyɛfea ejurɔ, ni naa, nibii fɛɛ he aaatse aha nyɛ.” Esa akɛ tsui ni yɔɔ suɔmɔ atsirɛ nikee ni amɛhaa lɛ, ni jeee ni amɛmiishwe ni amɛkɛ amɛjalɛ nii ni amɛkwaa amɛfeɔ lɛ asa mɛi krokomɛi ahiɛ.

Yesu tee nɔ akɛ: “Kpoo ha nyɛ, Farisifoi, akɛ nyɛhaa kowɛ kɛ shwie kɛ baai sɔrɔtoi fɛɛ mlijaa nyɔŋma nyɔŋma, ni nyɛshiɔ jalɛsaneyeli kɛ Nyɔŋmɔ suɔmɔ lɛ! Kulɛ eja akɛ nyɛfeɔ enɛɛmɛi, ni nyɛkashi eko lɛ hu.” Nyɔŋmɔ Mla ni ekɛha Israel lɛ biɔ ni aha mlijaa nyɔŋma loo akɛ ŋmɔshi nibii fɛɛ amlijaa nyɔŋma mli ekome abaha. Kowɛ kɛ shwie ji kwɛ̃ɛ nii bibii komɛi loo baai ni akɛhaa niyenii jeɔ ŋma. Farisifoi lɛ kwɛɔ jogbaŋŋ akɛ amɛwo mlijaa nyɔŋma lɛ kɛyashi baai ni he ehiaaa tsɔ nɛɛ fɛɛ nɔ, shi Yesu bu amɛ fɔ yɛ taomɔ nii ni he hiaa tamɔ suɔmɔ, mlihilɛ ni amɛaajie kpo amɛtsɔɔ, kɛ heshibaa ni amɛku amɛhiɛ amɛshwie nɔ lɛ hewɔ.

Yesu tee nɔ lolo ni ebu amɛ fɔ akɛ: “Kpoo ha nyɛ, Farisifoi, akɛ nyɛsumɔɔ onukpai ashitaramɔ hei yɛ kpeehei lɛ kɛ ŋamɔi yɛ jaji anɔ. Kpoo ha nyɛ, woloŋmalɔi kɛ Farisifoi, osatofoi, akɛ nyɛtamɔ gbohii afuuhei ni ejeee shi, ni mɛi ni nyiɛɔ nɔ lɛ leee!” Anaaa bɔ ni amɛhe tseee ha lɛ faŋŋ. Farisifoi ajamɔ lɛ kponɔgbɛ nifeemɔ yɛ fɛo, shi nɔ kpakpa ko bɛ mligbɛ! Edamɔ osatofeemɔ nɔ.

Beni mlalelɔi, ni ji mɛi ni ekase Nyɔŋmɔ Mla lɛ jogbaŋŋ lɛ ateŋ mɔ kome nu nɛkɛ fɔbuu wiemɔi nɛɛ, ekɛ dɔlɛ kɛɛ: “Tsɔɔlɔ, nii ni okɛɔ nɛɛ okɛmiibɔ wɔ hu ahora.”

Yesu kɛ sɔ fɔ mɛi ni kɛɔ akɛ amɛle Mla lɛ jogbaŋŋ lɛ hu anɔ, ni ekɛɛ: “Nyɛ Mla tsɔɔlɔi lɛ hu, kpoo ha nyɛ! akɛ nyɛkɛ jatsui ni teremɔ jaraa tereɔ mɛi, ni nyɛ diɛŋtsɛ lɛ, nyɛkɛ nyɛwao kome etaaa jatsui lɛ ahe. Kpoo ha nyɛ! akɛ nyɛmamɔɔ gbalɔi lɛ afuuhei lɛ; shi nyɛtsɛmɛi gbe amɛ.”

Jatsui ni Yesu tsiɔ ta yɛ biɛ lɛ ji blemasaji lɛ, shi nɛkɛ mlalelɔi nɛɛ efeŋ he nɔ ko ni ji mla lɛ mli bibioo po ni amɛaawo nɔ fioo ni efee mlɛo eha gbɔmɛi lɛ. Yesu jie lɛ kpo po akɛ amɛji mɛi ni kpɛlɛ nɔ ni agbe gbalɔi lɛ, ni ebɔ amɛ kɔkɔ akɛ: “Gbalɔi lɛ fɛɛ ala ni afɔse ashwie shi kɛjɛ jeŋ shishitoo mli lɛ, [abaabi] shi yɛ yinɔbii nɛɛ adɛŋ; kɛjɛ Habel la lɛ nɔ kɛyashi Zakaria, mɔ ni agbe lɛ yɛ afɔleshaa latɛ lɛ kɛ sɔlemɔ tsu lɛ teŋ lɛ la lɛ nɔ. Hɛɛ, miikɛɛ nyɛ akɛ, aaabi shi yɛ nɛkɛ yinɔbii nɛɛ adɛŋ!”

Adesai ni abaanyɛ akpɔ̃ amɛ lɛ aje lɛ je shishi yɛ be mli ni Adam kɛ Hawa fɔ bii lɛ; no hewɔ lɛ Habel hi shi “kɛjɛ jeŋ shishitoo mli.” Yɛ yiwaa gbɛ ni atsɔ nɔ agbe Zakaria lɛ sɛɛ nɔŋŋ lɛ, Siriabii atai bakpata Yuda hiɛ. Shi Yesu gba hiɛkpatamɔ ko ni mli wa fe nakai efɔ shi yɛ eyinɔbii lɛ ahe yɛ amɛyiwalɛ babaoo lɛ hewɔ. Nakai hiɛkpatamɔ lɛ ba aaafee afii 38 sɛɛ, yɛ afi 70 Ŋ.B.

Ni Yesu tee nɔ ebu amɛ fɔ lolo, ni ekɛɛ: “Kpoo ha nyɛ, Mla tsɔɔlɔi, ejaakɛ nyɛkɔ nilee lɛ naa samfele! Nyɛ diɛŋtsɛ lɛ nyɛboteee mli, ni mɛi ni taoɔ mli amɛbote lɛ hu, nyɛtsiɔ amɛ gbɛ.” Eji gbɛnaa nii ni ka mɛi ni le Mla lɛ jogbaŋŋ lɛ anɔ akɛ amɛtsɔɔ Nyɔŋmɔ Wiemɔ lɛ mli amɛha gbɔmɛi lɛ, ni amɛjie eshishinumɔ kpo faŋŋ. Shi amɛfeee enɛ, ni amɛsaa amɛshɔɔ hegbɛ lɛ kɛjɛɔ gbɔmɛi lɛ adɛŋ hu koni amɛkanu shishi.

Farisifoi lɛ kɛ mlalelɔi lɛ amli fu waa yɛ bɔ ni Yesu kpa amɛhe mama nɛɛ hewɔ. Beni eshi shia lɛ, amɛje shishi amɛte shi amɛwo lɛ waa, ni amɛkɛ sanebimɔi wo ehe ka. Amɛbɔ mɔdɛŋ ni amɛtsɔ lɛ tsɔne koni ewie nɔ ko ni amɛaanyɛ amɛdamɔ nɔ ni amɛha amɔ lɛ. Luka 11:37-54; 5 Mose 14:22; Mika 6:8; 2 Kronika 24:20-25.

▪ Mɛni hewɔ ni Yesu bu Farisifoi lɛ kɛ mɛi ni le Mla lɛ jogbaŋŋ lɛ fɔ lɛ?

▪ Mɛɛ jatsui mlalelɔi lɛ kɛshwie gbɔmɛi lɛ anɔ?

▪ Mɛɛ be ji “jeŋ shishitoo mli” lɛ?