Yitso 83

Farisifonyo ko Ŋmɛ lɛ Okpɔlɔ

YESU yɛ nakai Farisifonyo ni ale lɛ waa lɛ shia lɛ lolo ni etsɛko tsɔ ni etsa nuu ni yeɔ fuumɔ hela lɛ. Be mli ni ekwɛɔ mɛi krokomɛi ni afɔ amɛ nine lɛ ni amɛtaraa onukpai ashitaramɔ hei yɛ okpɔlɔŋmɛɛ lɛ shishi lɛ, etsɔɔ amɛ nikasemɔ ko ni kɔɔ heshibaa he.

Kɛkɛ ni Yesu tsɔɔ mli akɛ: “Kɛ mɔ ko bakpeeo kɛtee yookpeemɔ okpɔlɔ he lɛ, kaayata yitso gbɛ, ekolɛ aleee nɔ ekpee mɔ ko ni hiɛ yɔɔ nyam feo, ni mɔ ni bakpee okɛ lɛ fɛɛ lɛ akaba ni ebakɛɛo akɛ: ‘Ha mɔ nɛ gbɛ!’ ni no lɛ okɛ hiɛgbele ayata shishi gbɛ.”

No hewɔ lɛ Yesu wo ŋaa akɛ: “Shi moŋ, kɛji akpeeo lɛ, yaa ni oyata shishi gbɛ, koni, kɛ mɔ ni bakpeeo lɛ ba lɛ, ni ebakɛɛo akɛ: ‘Shieŋtsɛ, ba yitso gbɛ.’ No lɛ ohiɛ aaaba nyam yɛ mɛi ni okɛtara shi lɛ fɛɛ hiɛ.” Kɛkɛ ni Yesu mu naa ni ekɛɛ: “Ejaakɛ mɔ fɛɛ mɔ ni woɔ ehe nɔ lɛ, aaaba lɛ shi, ni mɔ ni baa ehe shi lɛ, aaawo enɔ.”

No sɛɛ lɛ, Yesu kɛ Farisifonyo ni fɔ lɛ nine lɛ wie ni etsɔɔ lɛ bɔ ni eeefee eŋmɛ okpɔlɔ ni baasa Nyɔŋmɔ hiɛ. “Kɛ oŋmɛ shwane loo gbɛkɛ okpɔlɔ lɛ, kaatsɛ oshieŋtsɛmɛi loo onyɛmimɛi loo owekumɛi loo okutsoŋ niiatsɛmɛi, koni aleee nɔ amɛ hu amɛkpeeo eko amɛto najiaŋ. Shi kɛ oŋmɛ okpɔlɔ lɛ, kpeemɔ ohiafoi kɛ kpajelɔi kɛ akpakei kɛ shwilafoi moŋ, ni aaajɔɔo, akɛni amɛ lɛ amɛbɛ nɔ ko ni amɛkɛaatoo najiaŋ lɛ.”

Kɛji mɔ ko ŋmɛ okpɔlɔ eha mɛi ni bɛ nɔ ko lɛ, ehaa lɛ mɔ ni ŋmɛ okpɔlɔ lɛ naa miishɛɛ, ejaakɛ, taakɛ Yesu tsɔɔ mli eha mɔ ni fɔ lɛ nine lɛ, “aaatoo najiaŋ yɛ jalɔi ashitee lɛ mli.” Bɔ ni Yesu tsɔɔ okpɔlɔŋmɛɛ ni yɔɔ nyam nɛɛ mli eha lɛ ha mɛi ni afɔ amɛ nine lɛ ateŋ mɔ kome kai okpɔlɔŋmɛɛ kroko ko. Nɛkɛ mɔ nɛɛ tee nɔ ni ekɛɛ: “Ajɔɔ mɔ ni yeɔ aboloo yɛ Nyɔŋmɔ maŋtsɛyeli lɛ mli!” Shi kɛlɛ, jeee mɛi fɛɛ buɔ gbɛkpamɔ ni miishɛɛ yɔɔ mli waa nɛɛ, taakɛ Yesu tee nɔ etsɔɔ kɛtsɔ abɛbua ko nɔ lɛ.

“Nuu ko ŋmɛ okpɔlɔ kpeteŋkpele, ni ekpee mɛi pii; ni . . . etsu etsulɔ akɛ eyakɛɛ mɛi ni akpee lɛ akɛ: ‘Nyɛbaa, ejaakɛ agbe nibii fɛɛ naa.’ Ni amɛ fɛɛ tswɛm amɛbɔi lakpa kome too. Klɛŋklɛŋ mɔ lɛ kɛɛ lɛ akɛ: ‘Mihe abɔɔ ko ni efi mi akɛ matee ni mayakwɛ; miikpao fai ni ona ohã mi.’ Ni mɔ kroko kɛɛ: ‘Mihe tsinai ŋtai enumɔ ni miiya mayaka amɛ makwɛ; miikpao fai ni ona ohã mi.’ Ni mɔ kroko hu kɛɛ: ‘Mikpee yoo, ni no hewɔ lɛ minyɛŋ maba.’ ”

Mɛɛ naajiemɔi gbohii nɛ! Akwɛɔ abɔɔ loo tsinai jogbaŋŋ dani aheɔ, no hewɔ lɛ ehe ehiaaa titri ko akɛ aaakwɛ enɛɛmɛi yɛ sɛɛ mli dɔŋŋ. Nakai nɔŋŋ, esaaa ni mɔ ko gbalashihilɛ tsiɔ lɛ gbɛ ni ekakpɛlɛ ninefɔɔ ni he hiaa tamɔ nɛkɛ nɔ. No hewɔ lɛ beni Nuŋtsɔ lɛ nu nɛkɛ naajiemɔi nɛɛ lɛ, emli fu ni ekɛɛ etsulɔ lɛ akɛ:

“ ‘Jee kpo mramra kɛya maŋ lɛŋ blohui lɛ kɛ fɔji lɛ amli, ni oyaŋɔ ohiafoi kɛ kpajelɔi kɛ shwilafoi kɛ akpakei kɛba biɛ.’ Ni tsulɔ lɛ kɛɛ: ‘Nuŋtsɔ, afee bɔ ni okɛɛ lɛ, shi kɛlɛ gbɛ yɛ lolo.’ Ni Nuŋtsɔ lɛ kɛɛ tsulɔ lɛ akɛ: ‘Jee kpo oya gbɛjegbɛi lɛ kɛ afabaŋi lɛ amli ni oyanyɛ amɛnɔ, ni amɛba, koni miwe lɛ ayi tɔ. . . . Kɛ mɛi ni akpee lɛ ateŋ mɔ ko aaasa miniyenii lɛ anaa, fii!’ ”

Mɛɛ shihilɛ ji nɔ ni nɛkɛ abɛbua nɛɛ wieɔ he lɛ? Ojogbaŋŋ, “nuŋtsɔ lɛ” ni ŋmɛ niyeli okpɔlɔ lɛ ji Yehowa Nyɔŋmɔ; “tsulɔ” ni atsu lɛ ni eyatsɛ mɛi lɛ kɛba lɛ ji Yesu Kristo; ni “okpɔlɔ kpeteŋkpele” lɛ ji hegbɛi ni akɛha koni ana ŋwɛi Maŋtsɛyeli lɛ mli gbɛfaŋnɔ lɛ.

Mɛi ni nine shɛ ninefɔɔ lɛ nɔ klɛŋklɛŋ akɛ amɛbana Maŋtsɛyeli lɛ mli gbɛ ji, Yudafoi jamɔ mli hiɛnyiɛlɔi ni hi shi yɛ Yesu gbii lɛ amli lɛ titri. Shi kɛlɛ, amɛkpoo ninefɔɔ lɛ. No hewɔ lɛ, akɛ ninefɔɔ ni ji enyɔ ha Yudafoi amaŋ lɛ mli mɛi ni abuuu amɛ ni amɛbaa shi lɛ, titri lɛ yɛ Pentekoste yɛ afi 33 Ŋ.B. Shi mɛi ni kpɛlɛ nɔ lɛ ayi faaa bɔ ni eeeha gbɛhei 144,000 ni yɔɔ Nyɔŋmɔ ŋwɛi Maŋtsɛyeli lɛ mli lɛ ayimɔ. No hewɔ lɛ, afii etɛ kɛ fã sɛɛ, yɛ afi 36 Ŋ.B. lɛ, akɛ ninefɔɔ ni ji etɛ kɛ naagbee nɔ lɛ ha mɛi ni afolɔko amɛ ketia ni amɛjeee Yudafoi lɛ, ni nɛkɛ mɛi nɛɛ anaabuamɔ etee nɔ aahu kɛbashi wɔgbii nɛɛ amli. Luka 14:1-24.

▪ Mɛɛ nikasemɔ ko ni kɔɔ heshibaa he Yesu tsɔɔ?

▪ Mɛɛ gbɛ nɔ shiatsɛ ko aatsɔ eŋmɛ okpɔlɔ ni saa Nyɔŋmɔ hiɛ yɛ, ni mɛni hewɔ enɛ aaaha lɛ miishɛɛ lɛ?

▪ Mɛni hewɔ naajiemɔi ni mɛi ni afɔ amɛ nine lɛ kɛha lɛ ji naajiemɔi gbohii lɛ?

▪ Mɛni ji nɔ ni Yesu abɛbua ni kɔɔ “okpɔlɔ kpeteŋkpele” ni aŋmɛ lɛ he lɛ damɔ shi kɛha?