Yitso 91

Beni Atee Lazaro Shi Lɛ

AGBƐNƐ Yesu kɛ mɛi ni fata ehe lɛ fɛɛ bashɛ Lazaro kaimɔ bu lɛ naa. Yɛ anɔkwale mli lɛ, eji tɛkplo ni akɛ tɛ etsi enaabu. Ni Yesu kɛɛ: “Nyɛjiea tɛ lɛ.”

Shi Marta ekpɛlɛɛɛ, ejaakɛ enuko nɔ ni Yesu taoɔ afee lɛ shishi. Ekɛɛ: “Nuŋtsɔ, be nɛ mli lɛ esha, ejaakɛ eye gbii ejwɛ.”

Shi Yesu bi lɛ akɛ: “Ani mikɛɛɛo akɛ: Kɛji ohe oye lɛ, ooona Nyɔŋmɔ anunyam lɛ?”

No hewɔ lɛ ajie tɛ lɛ. Kɛkɛ ni Yesu hole ehiŋmɛii anɔ ni esɔle akɛ: “Ataa, miidao shi akɛ obo mi toi. Shi mi lɛ, mile akɛ daa oboɔ mi toi; shi asafo lɛ ni damɔ shi lɛ hewɔ mikɛɔ, koni amɛhe amɛye akɛ bo otsu mi.” Yesu sɔle yɛ faŋŋ mli koni gbɔmɛi lɛ ale akɛ ebaanyɛ efee nɔ ni ebaafee lɛ kɛtsɔ hewalɛ ni enine baashɛ nɔ kɛjɛ Nyɔŋmɔ ŋɔɔ lɛ nɔ. Kɛkɛ ni ebo kɛ gbee ni wa akɛ: “Lazaro ee, jee kpo!”

Amrɔ lɛ nɔŋŋ ni Lazaro je kpo. Afimɔ eniji kɛ enaji yɛ fuu mama lɛ mli lolo, ni akɛ mama hu efi ehiɛ. Ni Yesu kɛɛ: “Nyɛfɛnea lɛ ni nyɛhaa eyaa.”

Beni Yudafoi ni eba Maria kɛ Marta miishɛjemɔ lɛ na naakpɛɛ nii nɛɛ, amɛteŋ mɛi babaoo na hemɔkɛyeli yɛ Yesu mli. Shi kɛlɛ, mɛi krokomɛi lɛ tee koni amɛyakɛɛ Farisifoi lɛ nɔ ni eba lɛ. Amrɔ nɔŋŋ kɛkɛ ni amɛ kɛ osɔfonukpai lɛ to gbɛjianɔ koni Yudafoi akojomɔ he wulu, ni ji Sanhedrin lɛ akpe.

Mɛi ni fata Sanhedrin lɛ he ji osɔfonukpa ni yɔɔ yɛ nakai beaŋ lɛ, Kaiafa, kɛ Farisifoi lɛ kɛ Sadukifoi lɛ, kɛ osɔfonukpai lɛ, kɛ tsutsu osɔfonukpai lɛ fɛɛ. Amɛye ŋkɔmɔ akɛ: “Te wɔfeɔ tɛŋŋ, shi nuu nɛɛ miifee okadii pii? Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye, ni Romabii lɛ aaaba ni amɛbashɔ wɔmaŋ kɛ wɔshikpɔŋ lɛ fɛɛ.”

Eyɛ mli akɛ jamɔ mli hiɛnyiɛlɔi lɛ kpɛlɛ nɔ akɛ Yesu “fee okadii sɔrɔtoi pii” moŋ, shi nɔ pɛ ni amɛjwɛŋɔ he ji amɛgbɛhe kɛ hegbɛ ni amɛyɔɔ lɛ. Akɛni Sadukifoi lɛ heee gbohiiashitee lɛ amɛyeee hewɔ lɛ, shi ni etee Lazaro kɛjɛ gbohii ateŋ lɛ ye amɛ awui waa.

Agbɛnɛ, Kaiafa, ni ekolɛ eji Sadukifonyo lɛ wie, ni ekɛɛ: “Nyɛ lɛ nyɛleee nɔ ko kwraa, ni nyɛsaa nyɛjwɛŋŋ hu akɛ ehi ha wɔ akɛ mɔ kome agbo yɛ maŋ lɛ najiaŋ, fe nɔ ni maŋbii lɛ fɛɛ hiɛ aaakpata lɛ.”

Nyɔŋmɔ tsirɛ Kaiafa koni ewie enɛ, ejaakɛ yɛ sɛɛ mli lɛ bɔfo Yohane ŋma akɛ: “Shi enɛ lɛ, jeee lɛ diɛŋtsɛ [Kaiafa] eto eyiŋ ewie.” Nɔ ni Kaiafa tsɔɔ diɛŋtsɛ ji esa akɛ agbe Yesu koni amɛkɛtsi E-naa koni ekabutu amɛgbɛhei kɛ hewalɛ ni amɛyɔɔ yɛ mɛi lɛ anɔ lɛ. Shi kɛlɛ, taakɛ Yohane tsɔɔ lɛ, ‘Kaiafa gba akɛ Yesu baagbo, ni jeee yɛ maŋ lɛ kɛkɛ najiaŋ, shi moŋ bɔni afee ni abua Nyɔŋmɔ bii lɛ anaa afee amɛ ekome.’ Ni, lɛlɛŋ, eji Nyɔŋmɔ yiŋtoo akɛ e-Bi lɛ agbo akɛ kpɔmɔ nɔ kɛha mɛi fɛɛ.

Agbɛnɛ Kaiafa ye omanye ni ena Sanhedrin lɛ nɔ hewalɛ ni amɛkpɛ amɛyiŋ koni amɛgbe Yesu. Shi akɛni Yesu na ele enɛ, ekolɛ kɛjɛ Nikodemo, ni ji Sanhedrin lɛ mlibii lɛ ateŋ mɔ kome ni ji enaanyo lɛ ŋɔɔ hewɔ lɛ, eshi jɛmɛ. Yohane 11:38-54.

▪ Mɛni hewɔ ni Yesu sɔle yɛ faŋŋ mli dani etee Lazaro shi lɛ?

▪ Mɛi ni na nɛkɛ shitee nɛɛ fee amɛnii yɛ mɛɛ gbɛ nɔ?

▪ Mɛni tsɔɔ bɔ ni Sanhedrin lɛ mlibii lɛ ayitsoŋ wa ha?

▪ Mɛni ji Kaiafa yiŋtoo, shi mɛni Nyɔŋmɔ kɛ lɛ tsu koni egba efɔ shi?