Yitso 96

Yesu kɛ Obalanyo Nɔyelɔ Niiatsɛ Ko

BENI Yesu nyiɛ gbɛ yɛ Perea kpokpaa lɛ nɔ kɛbɛŋkɛɔ Yerusalem lɛ, obalanyo ko jo foi kɛbanina lɛ ni eho ekula enakutsei anaa yɛ ehiɛ. Atsɛɔ nuu nɛɛ akɛ nɔyelɔ, ekolɛ etsɔɔ akɛ ehiɛ gbɛhe ni nɔ kwɔ waa yɛ amɛkpeehe lɛ eko mli aloo ekolɛ eji Sanhedrin lɛ mlinyo. Agbɛnɛ hu, eyɛ nii waa diɛŋtsɛ. Ebabi akɛ: “Tsɔɔlɔ Kpakpa, mɛni mafee ni mana naanɔ wala?”

Yesu here lɛ nɔ akɛ: “Mɛɛba otsɛɔ mi mɔ kpakpa? Mɔ kpakpa ko bɛ akɛ ja Nyɔŋmɔ kome kɛkɛ.” Ekolɛ obalanyo lɛ kɛ wiemɔ “[e]kpakpa” lɛ miitsu nii akɛ sabala kɛkɛ, no hewɔ lɛ Yesu ha ele akɛ sabala ni tamɔ nakai ji Nyɔŋmɔ pɛ nɔ.

Yesu tee nɔ akɛ: “Shi kɛji akɛ ootao akɛ oboteɔ wala mli lɛ, ye kitai lɛ anɔ.”

Ni nuu lɛ bi lɛ akɛ: “Te nii ni jiŋ?”

Ni Yesu tsi Kitai Nyɔŋma lɛ amli enumɔ tã, ni ekɛɛ lɛ akɛ: “Kaagbe gbɔmɔ; kaafite gbala; kaaju; kaaye amale odase; wo otsɛ kɛ onyɛ.” Ni Yesu kɛ kita ni he hiaa waa lɛ hu fataa he ni ekɛɛ: “Suɔmɔ onaanyo gbɔmɔ tamɔ bɔ ni osumɔɔ bo diɛŋtsɛ ohe lɛ.”

Kɛkɛ ni nuu lɛ ha hetoo kɛ anɔkwayeli fɛɛ akɛ: “Enɛɛmɛi fɛɛ lɛ miye nɔ kɛjɛ migbekɛbiiashi; mɛni shwɛɔ mi lolo?”

Beni Yesu boɔ nuu lɛ nibimɔ ni mli wa, ni ekaa yɔɔ mli lɛ toi lɛ, ena suɔmɔ kɛha lɛ. Shi Yesu na bɔ ni nuu lɛ kɛ ehe kpɛtɛɔ heloonaa nibii ahe gbagbalii lɛ, no hewɔ lɛ etsɔɔ lɛ nɔ ni he hiaa lɛ lɛ akɛ: “Eshwɛo nɔ kome lolo. Yaahɔɔ nibii fɛɛ ni oyɔɔ lɛ ni oŋɔja ohiafoi, ni ooona jwetri yɛ ŋwɛi; ni oba obanyiɛ misɛɛ.”

Ŋwanejee ko bɛ he akɛ Yesu kwɛ lɛ, ni enii fee lɛ mɔbɔ, beni nuu lɛ te shi ni etsɔ ehe etee ni ewerɛ eho ehe babaoo lɛ. Eninamɔ lɛ eshwila lɛ ni enaaa bɔ ni anɔkwa ninamɔ lɛ jara wa ha lɛ. Yesu wie akɛ: “Kwɛ bɔ ni ewa ha mɛi ni yɔɔ nii akɛ amɛaabote Nyɔŋmɔ maŋtsɛyeli lɛ mli!”

Yesu wiemɔi lɛ ha ekaselɔi lɛ anaa kpɛ amɛhe. Shi efee amɛ naakpɛɛ waa po beni etee nɔ ni ejaje shishitoo mla nɛɛ etsɔɔ amɛ lɛ: “Ejaakɛ ejaraaa haaa yooma akɛ eeetsɔ abui hiŋmɛi mli tamɔ bɔ ni ejaraa haa niiatsɛ akɛ eeebote Nyɔŋmɔ maŋtsɛyeli lɛ mli lɛ.”

Ekaselɔi lɛ miitao amɛle, ni amɛbi lɛ akɛ: “Belɛ namɔ yiwala aaanyɛ ahere mɔ?”

Yesu kwɛ amɛhiɛ tɛɛ, ni eha amɛ hetoo akɛ: “Gbɔmɛi agbɛfaŋ lɛ, anyɛŋ enɛ afee; shi Nyɔŋmɔ gbɛfaŋ lɛ aaanyɛ nii fɛɛ afee.”

Ni amɛna akɛ amɛhala nɔ ko ni esoro no kwraa yɛ nɔ ni obalanyo nɔyelɔ niiatsɛ lɛ ehala lɛ he lɛ, Petro kɛɛ: “Naa, wɔ lɛ wɔshi nii fɛɛ ni wɔbanyiɛ osɛɛ.” No hewɔ lɛ ebi akɛ: “Belɛ mɛni wɔbaana?”

Yesu wo shi akɛ: “Lɛlɛŋ, miikɛɛ nyɛ akɛ, nyɛ mɛi ni nyɛnyiɛ misɛɛ nɛɛ, beni gbɔmɔ Bi lɛ aaata enunyam sɛi lɛ nɔ yɛ jeŋ hee lɛ mli lɛ, nyɛ hu nyɛaatara sɛii nyɔŋma kɛ enyɔ nɔ, ni nyɛaakojo Israel akutsei nyɔŋma kɛ enyɔ lɛ.” Hɛɛ, Yesu miitsɔɔ akɛ abasaa afee nibii ehee yɛ shikpɔŋ nɔ koni nibii afee tamɔ bɔ ni amɛji yɛ Eden trom lɛ mli lɛ. Ni Petro kɛ kaselɔi krokomɛi lɛ fɛɛ anine baashɛ nyɔmɔwoo ni ji maŋtsɛmɛi ni amɛkɛ Kristo aaaye yɛ nɛkɛ jeŋ muu fɛɛ Paradeiso nɛɛ nɔ lɛ nɔ. Eka shi faŋŋ akɛ nyɔmɔwoo kpele ni tamɔ nɛkɛ sa afɔleshaa fɛɛ afɔleshaa ni akɛaaha yɛ he!

Shi kɛlɛ, amrɔ nɛɛ po nyɔmɔwoi yɛ, taakɛ Yesu kɛɛ kɛ nɔmimaa lɛ: “Mɔ ko bɛ ni eshi shia loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo abɔɔi yɛ mi kɛ sanekpakpa lɛ hewɔ, ni enaŋ shiai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ abɔɔi toi oha yɛ benɛbe nɛɛ mli beebe, kɛ yiwalɛ hu, ni jeŋ ni baaba lɛŋ hu eeena naanɔ wala.”

Taakɛ Yesu wo shi lɛ, he fɛɛ he ni ekaselɔi lɛ aaaya yɛ je lɛŋ lɛ, amɛnaa amɛkɛ amɛnanemɛi Kristofoi awekukpaa ni bɛŋkɛ kpaakpa ni sɛɛnamɔ yɔɔ he hu fe amɛkɛ amɛ heloonaa wekumɛi anɔ lɛ mli ŋɔɔmɔ. Eka shi faŋŋ akɛ obalanyo nɔyelɔ niiatsɛ lɛ nine nyɛ shi yɛ nyɔmɔwoo nɛɛ kɛ naanɔ wala ni eeena yɛ Nyɔŋmɔ ŋwɛi Maŋtsɛyeli lɛ mli lɛ fɛɛ mli.

No sɛɛ lɛ, Yesu kɛfata he akɛ: “Shi klɛŋklɛŋbii pii aaatsɔmɔ sɛɛkpelɔi, ni sɛɛkpelɔi aaatsɔmɔ klɛŋklɛŋbii.” Mɛni etsɔɔ lɛ?

Eetsɔɔ akɛ mɛi pii ni ji “klɛŋklɛŋbii” yɛ jamɔ mli hegbɛi ni amɛnaa mli ŋɔɔmɔ hewɔ, tamɔ obalanyo nɔyelɔ niiatsɛ lɛ boteŋ Maŋtsɛyeli lɛ mli. Amɛbaafee “sɛɛkpelɔi.” Shi mɛi pii, ni Yesu kaselɔi heshibalɔi lɛ fata he, ni Farisifoi ni buɔ amɛhe jalɔi lɛ ebuuu amɛ akɛni amɛbuɔ amɛ “sɛɛkpelɔi”—akɛ shikpɔŋ nɔ bii, loo ‛am ha·’aʹrets—lɛ baatsɔmɔ “klɛŋklɛŋbii.” “Klɛŋklɛŋbii” ni amɛtsɔmɔɔ lɛ tsɔɔ akɛ amɛnine baashɛ hegbɛ nɔ akɛ amɛaatsɔmɔ Kristo hefatalɔi nɔyelɔi yɛ Maŋtsɛyeli lɛ mli. Marko 10:17-31; Mateo 19:16-30; Luka 18:18-30.

▪ Eka shi faŋŋ akɛ, mɛɛ nɔyelɔ nɛkɛ obalanyo niiatsɛ nɛɛ ji?

▪ Mɛni hewɔ ni Yesu kpoo akɛ aaatsɛ lɛ mɔ kpakpa lɛ?

▪ Mɛɛ gbɛ nɔ obalanyo nɔyelɔ lɛ niiashikpamɔ lɛ feɔ oshara ni yɔɔ ninamɔ he lɛ he nɔkwɛmɔ nɔ yɛ?

▪ Mɛɛ nyɔmɔwoo Yesu wo ekaselɔi lɛ shi yɛ he?

▪ Mɛɛ gbɛ nɔ klɛŋklɛŋbii lɛ batsɔmɔɔ sɛɛkpelɔi, ni sɛɛkpelɔi lɛ batsɔmɔɔ klɛŋklɛŋbii yɛ?