Yitso 122

Ajɛ Pilato Ŋɔɔ Kɛtee Herode Ŋɔɔ ni Aku Sɛɛ Aba Ekoŋŋ

EYƐ mli akɛ Yesu ebɔɔɔ mɔdɛŋ akɛ ekɛ maŋtsɛ ni eji lɛ aaatee Pilato moŋ, shi etsɔɔ mli akɛ e-Maŋtsɛyeli lɛ wooo Roma he gbeyei. Yesu kɛɛ akɛ: “Mimaŋtsɛyeli lɛ jɛɛɛ je nɛŋ. Mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛɛ lɛ mimaŋtsɛyeli lɛ jɛɛɛ biɛ.” No hewɔ lɛ Yesu kpɛlɛ nɔ shii etɛ sɔŋŋ akɛ eyɛ Maŋtsɛyeli, eyɛ mli akɛ ejɛɛhe bɛ shikpɔŋ nɛɛ nɔ.

Shi kɛlɛ, Pilato tee nɔ ebi lɛ sane ekoŋŋ akɛ: “Belɛ maŋtsɛ jio kɛ̃?” Ni ji akɛ, maŋtsɛ jio kɛji akɛ o-Maŋtsɛyeli lɛ jɛɛɛ je nɛɛ mli po lɛ?

Yesu ha Pilato le akɛ emu sane naa yɛ gbɛ ni ja nɔ, kɛkɛ ni eha hetoo akɛ: “Okɛɛ. Ejaakɛ maŋtsɛ ji mi. Mi lɛ enɛ hewɔ afɔ mi, ni enɛ hewɔ nɔŋŋ miba je lɛ mli, koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.”

Hɛɛ, yiŋtoo ni yɔɔ Yesu shihilɛ yɛ shikpɔŋ nɔ lɛ sɛɛ ji ni ebaye “anɔkwale lɛ” he odase, titri lɛ, anɔkwale ni kɔɔ e-Maŋtsɛyeli lɛ he lɛ. Yesu esaa ehe akɛ ebaaye nakai anɔkwale lɛ he odase kɛ no baaha elaaje ewala po. Eyɛ mli akɛ Pilato bi lɛ akɛ: “Mɛni ji anɔkwale?” lɛ moŋ, shi emɛɛɛ emlitsɔɔmɔ lɛ. Enu bɔ ni sa ni aaaha ekojo.

Pilato ku esɛɛ eba gbɔmɛi asafoi babaoo ni mɛɔ yɛ maŋtsɛ we lɛ sɛɛ lɛ ŋɔɔ. Eka shi faŋŋ akɛ no mli lɛ Yesu yɛ emasɛi, ni ekɛɛ osɔfonukpai lɛ kɛ mɛi ni kɛ amɛ yɔɔ lɛ akɛ: “Mi lɛ minaaa fɔbuu sane ko kwraa yɛ ehe.”

Akɛni yiŋkpɛɛ nɛɛ wo amɛmli la hewɔ lɛ, asafoi lɛ je shishi amɛma nɔ mi akɛ: “Ewoɔ ma lɛŋ hirihiri kɛ enii ni etsɔɔ yɛ Yudea fɛɛ, ni ebɔi kɛjɛ Galilea kɛbashi biɛ lɛ.”

Yudafoi ajamɔ he sɛkɛyeli ni asusuuu nɔ ko he lɛ baaha Pilato naa akpɛ ehe. No hewɔ lɛ beni osɔfonukpai lɛ kɛ ma lɛŋ onukpai lɛ yaa nɔ amɛbolɔɔ lɛ, Pilato tsɔ ehiɛ eha Yesu ni ebi lɛ akɛ: “Ani onuuu saji sɔŋŋ ni amɛkɛshwieɔ onɔ nɛɛ?” Ni kɛlɛ Yesu ebɔɔɔ mɔdɛŋ akɛ eeeha hetoo. Bɔ ni eto etsui shi diŋŋ yɛ nɛkɛ naafolɔmɔi ni bɛ mli nɛɛ ashishi lɛ ha Pilato naa kpɛ ehe.

Beni Pilato na le akɛ Yesu ji Galileanyo lɛ, ena he ni ebaatsɔ ejo gbɛnaa nii ni ka enɔ lɛ naa foi. Galilea nɔyelɔ, Herode Antipa (Herode Kpeteŋkple lɛ binuu), eba Yerusalem kɛha Hehoo lɛ yeli, no hewɔ lɛ Pilato tsu ni akɛ Yesu aya eŋɔɔ. No mli lɛ Herode Antipa etsɔ hiɛ eha afo Yohane Baptisilɔ lɛ yitso, ni enɛ ha Herode she gbeyei beni enu naakpɛɛ nibii ni Yesu feɔ lɛ he lɛ, eeshe gbeyei akɛ Yesu ji Yohane diɛŋtsɛ ni atee lɛ shi kɛjɛ gbohii ateŋ.

Agbɛnɛ Herode na miishɛɛ babaoo beni ena hegbɛ akɛ eeena Yesu lɛ. Enɛ jeee Yesu hilɛ-kɛhamɔ he ni esusuɔ hewɔ aloo akɛ eesumɔ ni ebɔ mɔdɛŋ diɛŋtsɛ ni ele kɛji akɛ enaafolɔmɔ lɛ ji anɔkwale loo amale. Shi moŋ eetao nɔ ko ena kɛkɛ, ni ehiɛ ka nɔ akɛ Yesu baafee naakpɛɛ nɔ ko yɛ ehiɛ.

Shi Yesu haaa nɔ ni Herode taoɔ nɛɛ aba mli. Yɛ anɔkwale mli lɛ, Herode bi lɛ saji, shi etswaaa esɛŋ. Akɛni ehiɛnɔkamɔ lɛ efee efolo hewɔ lɛ, Herode kɛ esraafoi ni buɔ ehe lɛ ye Yesu he fɛo. Amɛkɛ atade yuu ko ni kpɛlɛɔ wo lɛ ni amɛli lɛ. Kɛkɛ ni amɛku sɛɛ amɛkɛ le tee Pilato ŋɔɔ ekoŋŋ. Nɔ ni jɛ mli ba ji akɛ, Herode kɛ Pilato ni tsutsu lɛ amɛji henyɛlɔi lɛ batsɔmɔ nanemɛi kpakpai.

Beni Yesu ku esɛɛ lɛ, Pilato tsɛ osɔfonukpai lɛ kɛ Yudafoi a-nɔyelɔi lɛ kɛ gbɔmɛi lɛ fɛɛ kɛba ni ekɛɛ amɛ akɛ: “Nyɛkɛ nɛkɛ nuu nɛɛ baha mi, akɛ eewo maŋ lɛ yiŋ; ni naa, mitao sane lɛ mli yɛ nyɛhiɛ nɛɛ, minaaa fɔbuu sane ko yɛ ehe yɛ saji ni nyɛkɛbafolɔ enaa lɛ eko eko mli. Ni Herode hu enaaa eko; ejaakɛ ekpala lɛ kɛba, akɛni efeko nɔ ko ni sa gbele lɛ. No hewɔ lɛ mibaha ayi lɛ ni maŋmɛɛ ehe.”

No hewɔ lɛ Pilato ewie shii enyɔ akɛ Yesu yeee fɔ. Eesumɔ kɛkɛ ni eŋmɛɛ ehe, ejaakɛ eyɔse akɛ hetsɛ̃ hewɔ ni osɔfoi lɛ kɛ lɛ baha lɛ lɛ. Shi beni Pilato yaa nɔ ebɔɔ mɔdɛŋ ni eŋmɛɛ Yesu he lɛ, enine shɛ kanyamɔ ko ni mli wa nɔ koni efee nakai. Beni eta ekojomɔ sɛi lɛ nɔ lɛ, eŋa tsu koni akɛ shɛɛ sane ko abaha lɛ, ni miiwo lɛ hewalɛ akɛ: “Okɛ jalɔ nɛɛ akaye sane ko, ejaakɛ ehewɔ lɛ mihe ejara mi babaoo yɛ wɔlamɔ mli ŋmɛnɛ [eka shi faŋŋ akɛ ŋwɛi ejɛ].”

Ni kɛlɛ, te Pilato aaafee tɛŋŋ aŋmɛɛ nɛkɛ nuu ni yeee fɔ nɛɛ he, taakɛ ele hu akɛ esa akɛ efee lɛ? Yohane 18:36-38; Luka 23:4-16; Mateo 27:12-14, 18, 19; 14:1, 2; Marko 15:2-5.

▪ Te Yesu ha sanebimɔ ni kɔɔ emaŋtsɛyeli lɛ he lɛ hetoo eha tɛŋŋ?

▪ Mɛni ji “anɔkwale lɛ” ni Yesu kɛ eshikpɔŋ nɔ shihilɛ fɛɛ ye he odase lɛ?

▪ Mɛni ji Pilato kojomɔ lɛ, te gbɔmɛi lɛ here nɔ amɛha tɛŋŋ, ni mɛni Pilato fee Yesu?

▪ Namɔ ji Herode Antipa, mɛni hewɔ ena miishɛɛ babaoo akɛ eeena Yesu lɛ, ni mɛni efee lɛ?

▪ Mɛni hewɔ Pilato he tswaa shi akɛ eeeŋmɛɛ Yesu he lɛ?