Nikasemɔ 5
Shihilɛ Yɛ Yiŋtoo Ko Ni Yɔɔ Nyam
1, 2. Te wɔɔfee tɛŋŋ wɔle akɛ Nyɔŋmɔ susuɔ wɔhe lɛ, ni nɛgbɛ esa akɛ wɔya kɛha shihilɛ mli sanebimɔi lɛ ahetooi?
1 Bɔ ni afee shikpɔŋ lɛ kɛ emli nibii ni wala yɔɔ amɛmli lɛ aha lɛ tsɔɔ akɛ amɛ-Bɔlɔ lɛ ji Nyɔŋmɔ ni yɔɔ suɔmɔ ni esusuɔ amɛhe lɛlɛŋ. Ni e-Wiemɔ, ni ji Biblia lɛ tsɔɔ akɛ esusuɔ wɔhe; ehaa wɔ hetooi ni hi fe fɛɛ yɛ nɛkɛ sanebimɔi nɛɛ ahe: Mɛni hewɔ wɔyɔɔ biɛ yɛ shikpɔŋ nɛɛ nɔ? kɛ, Mɛni yɔɔ wɔsɛɛ be mli kɛha wɔ?
2 Esa akɛ wɔtao Biblia lɛ mli kɛha nakai hetooi lɛ. Nyɔŋmɔ Wiemɔ lɛ kɛɔ akɛ: “Kɛji nyɛtao esɛɛ gbɛ lɛ, eeeha nyɛna lɛ, shi kɛ nyɛkwa lɛ lɛ, lɛ hu eeekwa nyɛ.” (2 Kronika 15:2) No hewɔ lɛ, belɛ mɛni Nyɔŋmɔ Wiemɔ lɛ mli taomɔ jieɔ lɛ kpo yɛ eyiŋtoo kɛha wɔ lɛ he?
Nɔ Hewɔ ni Nyɔŋmɔ Bɔ Adesai
3. Mɛni hewɔ Nyɔŋmɔ bɔ shikpɔŋ lɛ?
3 Biblia lɛ tsɔɔ akɛ Nyɔŋmɔ saa shikpɔŋ lɛ eto yɛ gbɔmɛi adesai ahewɔ titri. Yesaia 45:18 wieɔ yɛ shikpɔŋ lɛ he akɛ Nyɔŋmɔ “ebɔɔɔ lɛ efolo, shi eshɔ̃ lɛ ni ahi nɔ.” Ni ekɛ nibii fɛɛ ni he baahia gbɔmɛi, jeee ni amɛhi shi kɛkɛ, shi moŋ ni amɛna wala mli ŋɔɔmɔ kɛmɔ shi lɛ eko wo shikpɔŋ lɛ nɔ.—1 Mose, yitso 1 kɛ 2.
4. Mɛni hewɔ Nyɔŋmɔ bɔ klɛŋklɛŋ adesai lɛ?
4 Nyɔŋmɔ gbaa wɔ bɔ ni ebɔ klɛŋklɛŋ adesai, Adam kɛ Hawa, ni ejie nɔ ni yɔɔ ejwɛŋmɔ mli kɛha adesai aweku lɛ kpo yɛ e-Wiemɔ lɛ mli. Ekɛɛ: “Nyɛhaa wɔfea gbɔmɔ yɛ wɔsubaŋ nɔ, tamɔ wɔhenɔ, ni amɛye ŋshɔŋ looi kɛ ŋwɛi loofɔji kɛ shia kooloi kɛ shikpɔŋ lɛ fɛɛ kɛ waamɔ nibii fɛɛ ni wamɔɔ yɛ shikpɔŋ lɛ nɔ lɛ nɔ.” (1 Mose 1:26) Aha gbɔmɔ hegbɛ akɛ ekwɛ “shikpɔŋ lɛ fɛɛ” kɛ enɔ kooloi ni abɔ lɛ anɔ.
5. Nɛgbɛ akɛ klɛŋklɛŋ adesai lɛ wo?
5 Nyɔŋmɔ fee trom agbo ko ni tamɔ abɔɔ yɛ he ko ni atsɛɔ jɛmɛ Eden, yɛ Boka Teŋgbɛ. Kɛkɛ ni “[e]ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he.” Eji paradeiso ko ni nɔ fɛɛ nɔ ni he hiaa klɛŋklɛŋ adesai lɛ ni amɛaaye lɛ eko yɔɔ mli. Amɛteŋ ekomɛi ji “tsei fɛɛ ni kɛ akwɛ ni aaaba mɔ tsine ni amɛhi ha yeli,” kɛ agbɛnɛ kwɛ̃ɛnii krokomɛi hu ni fata he, kɛ kooloi sɔrɔtoi hu ni yɔɔ wala mli.—1 Mose 2:7-9, 15.
6. Mɛɛ jwɛŋmɔŋ kɛ gbɔmɔtsoŋ sui komɛi akɛbɔ gbɔmɛi adesai?
6 Abɔ klɛŋklɛŋ adesai lɛ agbɔmɔtsei akɛ nɔ ni eye emuu, no hewɔ lɛ hela mɔŋ amɛ, amɛgbɔlɔŋ, ni amɛgboiŋ hu. Akɛ sui krokomɛi hu duro amɛ, tamɔ heyeli ni amɛkɛaahala nɔ ni amɛsumɔɔ. Atsɔɔ bɔ ni afee amɛ lɛ mli yɛ 1 Mose 1:27 lɛ akɛ: “Nyɔŋmɔ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.” Akɛni abɔ wɔ yɛ Nyɔŋmɔ subaŋ nɔ hewɔ lɛ, jeee gbɔmɔtsoŋ kɛ jwɛŋmɔŋ sui kɛkɛ akɛha wɔ, shi moŋ jeŋba kɛ mumɔŋ nɔ hu, ni kɛji wɔɔna miishɛɛ lɛlɛŋ lɛ, no lɛ esa akɛ wɔna enɛɛmɛi fɛɛ. Nyɔŋmɔ kɛ gbɛ ni wɔɔtsɔ nɔ wɔnine ashɛ nakai hiamɔ nii lɛ anɔ lɛ baaha wɔ, kɛ agbɛnɛ hiamɔ hu kɛha niyenii, nu, kɛ kɔɔyɔɔ. Taakɛ Yesu Kristo kɛɛ lɛ, “jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ [Yehowa] Nyɔŋmɔ daaŋ lɛ.”—Mateo 4:4.
7. Mɛɛ hegbɛ ko akɛha klɛŋklɛŋ mɛi enyɔ lɛ?
7 Kɛfata he lɛ, Nyɔŋmɔ kɛ hegbɛ ko ni yɔɔ nyam ha klɛŋklɛŋ mɛi enyɔ lɛ beni amɛyɔɔ Eden lɛ akɛ: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ.” (1 Mose 1:28) No hewɔ lɛ amɛbaanyɛ amɛfɔ bii ni eye emuu kɛba shihilɛ mli. Ni beni adesai ayifalɛ yaa hiɛ lɛ, amɛbaana nitsumɔ ni yɔɔ miishɛɛ ni ji shishijee abɔɔ, ni ji Eden paradeiso shikpɔŋ lɛ mli ni amɛaalɛɛ. Yɛ naagbee lɛ, shikpɔŋ muu lɛ fɛɛ baatsake fiofio ni etsɔ paradeiso, ni mɛi ni yɔɔ nɔ ji gbɔmɛi ni eye emuu, ni yɔɔ miishɛɛ, ni baanyɛ ahi shi kɛya naanɔ. Biblia lɛ kɛɔ wɔ akɛ beni éje nɛkɛ nibii nɛɛ fɛɛ ashishi lɛ sɛɛ lɛ, “Nyɔŋmɔ kwɛ nibii fɛɛ ni efee lɛ, ni naa, ehi naakpa.”—1 Mose 1:31; kwɛmɔ Lala 118:17 hu.
8. Te esa akɛ kulɛ adesai akwɛ shikpɔŋ lɛ nɔ amɛha tɛŋŋ?
8 Anaa faŋŋ akɛ adesai baanyɛ amɛkɛ shikpɔŋ ni amɛyeɔ nɔ lɛ atsu nii kɛha amɛsɛɛnamɔ. Shi esa akɛ atsu enɛ he nii yɛ nilee mli. Esa akɛ adesai afee nɔkwɛlɔi ni kwɛɔ shikpɔŋ lɛ nɔ kɛ bulɛ, jeee mɛi ni baakpata hiɛ. Shikpɔŋ lɛ hiɛkpatamɔ ni wɔnaa ŋmɛnɛ nɛɛ teɔ shi ewoɔ Nyɔŋmɔ suɔmɔnaa nii, ni mɛi ni kɛ amɛhe woɔ nakai feemɔ mli lɛ miite shi amɛmiiwo yiŋtoo ni yɔɔ wala he yɛ shikpɔŋ lɛ nɔ lɛ. Amɛbaawo nakai nifeemɔ lɛ he nyɔmɔ, ejaakɛ Biblia lɛ kɛɔ akɛ Nyɔŋmɔ “baafite mɛi ni fiteɔ shikpɔŋ lɛ.”—Kpojiemɔ 11:18.
Eji Nyɔŋmɔ Yiŋtoo Lolo
9. Mɛni hewɔ wɔyɔɔ hekɛnɔfɔɔ akɛ Nyɔŋmɔ yiŋtoo baaba mli lɛ?
9 Enɛ hewɔ lɛ, kɛjɛ shishijee lɛ, eji Nyɔŋmɔ yiŋtoo akɛ adesai aweku ni eye emuu ahi shikpɔŋ lɛ nɔ kɛya naanɔ yɛ paradeiso mli. Ni eka he eji eyiŋtoo lolo! Nakai yiŋtoo lɛ baaba mli, ni enine enyɛŋ shi. Biblia lɛ kɛɔ akɛ: “Yehowa Zebaot eka kita akɛ: ‘Lɛlɛŋ, bɔ ni misusu lɛ, nakai ebaaba mli, ni bɔ ni mito miyiŋ lɛ, nakai ebaama shi.’” “Mi miwie, ni mi nɔŋŋ maha aba mli; mito miyiŋ, ni mafee hu.”—Yesaia 14:24; 46:11.
10, 11. Mɛɛ gbɛ nɔ Yesu, Petro, kɛ lalatsɛ David wie Paradeiso he yɛ?
10 Yesu Kristo wie Nyɔŋmɔ yiŋtoo ni kɔɔ paradeiso ni ekɛaaba shikpɔŋ nɔ ekoŋŋ lɛ he beni ekɛɛ nuu ko ni taoɔ hiɛnɔkamɔ kɛha wɔsɛɛ lɛ akɛ: “Okɛ mi aaahi Paradeiso” lɛ. (Luka 23:43) Bɔfo Petro hu wie jeŋ hee ni baa lɛ he beni egba efɔ shi akɛ: “Yɛ [Nyɔŋmɔ] eshiwoo lɛ naa lɛ, wɔmiikwɛ ŋwɛi hee [nɔyeli hee ni baaye nɔ kɛjɛ ŋwɛi] kɛ shikpɔŋ hee [shikpɔŋ nɔ gbɔmɛi asafo hee] ni jalɛ hiɔ mli lɛ gbɛ.”—2 Petro 3:13.
11 Lalatsɛ David hu ŋma yɛ jeŋ hee ni baa lɛ kɛ bɔ ni ebaahi shi daa lɛ he. Egba efɔ shi akɛ: “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:29) No hewɔ ni Yesu wo shi akɛ: “Ajɔɔ mɛi ni he jɔ lɛ, shi amɛaaye shikpɔŋ lɛ nɔ.”—Mateo 5:5.
12, 13. Tsɔɔmɔ nɔ ni ji Nyɔŋmɔ yiŋtoo kɛha adesai lɛ kuku.
12 Mɛɛ gbɛkpamɔ ni yɔɔ nyam nɛ, ni oohi shi kɛmiiya naanɔ yɛ paradeiso shikpɔŋ nɔ, ni yiwalɛ, awuiyeli, helai, awerɛho, kɛ piŋmɔ ko bɛ dɔŋŋ! Nyɔŋmɔ gbalɛ Wiemɔ lɛ muaa eyiŋtoo ni yɔɔ nyam nɛɛ naa yɛ enaagbee wolo lɛ mli kɛtsɔ nɔ ni ejaje nɛɛ nɔ, akɛ: “Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Ekɛfataa he hu akɛ: “Ni Mɔ ni ta maŋtsɛsɛi lɛ nɔ lɛ kɛɛ: Naa, miifee nii fɛɛ ehee. Ni ekɛɛ mi akɛ: Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi shiŋŋ ni.”—Kpojiemɔ 21:4, 5.
13 Hɛɛ, Nyɔŋmɔ yɛ yiŋtoo ko ni yɔɔ nyam yɛ ejwɛŋmɔ mli. Ebaafee jeŋ hee ni jalɛ hiɔ mli, naanɔ paradeiso, ni Mɔ ni baanyɛ etsu eshiwoi ahe nii, ni ebaatsu he nii hu lɛ eha agba afɔ shi, ejaakɛ ewiemɔi lɛ “anɔkwa wiemɔi ni ma shi shiŋŋ ni.”
[Mfoniri ni yɔɔ yɔɔ baafa 20, 21]
Nyɔŋmɔ to eyiŋ akɛ adesai ahi shi kɛya naanɔ yɛ paradeiso shikpɔŋ nɔ. Nakai ji eyiŋtoo lolo
[Mfoniri ni yɔɔ yɔɔ baafa 22]
Shiatsɛ lɛ baanyɛ atsɛ mɛi ni fiteɔ eshia lɛ ni ekɛ amɛ abu akɔntaa