Nikasemɔ 2
Namɔ Ji Nyɔŋmɔ?
Namɔ ji anɔkwa Nyɔŋmɔ lɛ, ni mɛni ji egbɛi? (1, 2)
Mɛɛ gbɔmɔtso nɛkɛ eyɔɔ? (3)
Mɛni ji esui ni nɔ kwɔlɔ lɛ? (4)
Ani esa akɛ wɔkɛ amagai kɛ okadii atsu nii yɛ ejamɔ mli? (5)
Mɛɛ gbɛi sɔrɔtoi enyɔ yɔɔ ni wɔɔtsɔ nɔ wɔkase Nyɔŋmɔ he nii? (6)
1. Gbɔmɛi jaa nibii pii. Shi Biblia lɛ kɛɔ wɔ akɛ ANƆKWA Nyɔŋmɔ kome pɛ yɔɔ. Lɛ ebɔ nɔ fɛɛ nɔ ni yɔɔ ŋwɛi kɛ shikpɔŋ nɔ. Akɛni lɛ eha wɔ wala hewɔ lɛ, lɛ pɛ ji Mɔ ni esa akɛ wɔja lɛ.—1 Kor. 8:5, 6; Kpoj. 4:11.
2. Nyɔŋmɔ yɛ sabalai pii, shi eyɛ gbɛi kome pɛ. Nakai gbɛi lɛ ji YEHOWA. Ajie Nyɔŋmɔ gbɛi kɛjɛ Bibliai pii amli ni akɛ sabalai tamɔ NUNTSƆ loo NYƆŊMƆ eto najiaŋ. Shi beni aŋma Biblia lɛ, no mli lɛ gbɛi Yehowa lɛ je kpo yɛ mli aaashɛ shii 7,000!—2 Mose 3:15; Lala 83:19.
3. Yehowa yɛ gbɔmɔtso, shi etamɔɔɔ wɔnɔ̃ lɛ. Biblia lɛ kɛɔ akɛ, “Nyɔŋmɔ lɛ Mumɔŋ.” (Yoh. 4:24) Mumɔ ji wala su ko ni nɔ kwɔ babaoo fe wɔnɔ̃ lɛ. Adesa ko kwraa enako Nyɔŋmɔ pɛŋ. Ŋwɛi Yehowa yɔɔ, shi ebaanyɛ ena nɔ fɛɛ nɔ. (Lala 11:4, 5; Yoh. 1:18) Belɛ, mɛni ji mumɔ krɔŋkrɔŋ lɛ? Ejeee mɔ ko tamɔ Nyɔŋmɔ. Shi moŋ, Nyɔŋmɔ nitsumɔ hewalɛ ni.—Lala 104:30.
4. Biblia lɛ jieɔ Yehowa su kɛ ebaŋ kpo etsɔɔ wɔ. Etsɔɔ akɛ esui ni nɔ kwɔlɔ ji suɔmɔ, jalɛsaneyeli, nilee, kɛ hewalɛ. (5 Mose 32:4; Hiob 12:13; Yes. 40:26; 1 Yoh. 4:8) Biblia lɛ kɛɔ wɔ akɛ enaa mɔ mɔbɔ, emli hi, ekɛ tɔmɔ keɔ, ekɛ nibii keɔ, ni etoɔ etsui shi hu. Wɔ, ákɛ bii ni feɔ toiboo lɛ, esa akɛ wɔbɔ mɔdɛŋ wɔkase lɛ.—Efe. 5:1, 2.
5. Ani esa akɛ wɔkula shi wɔha amagai, mfonirii, loo okadii loo ni wɔkɛ sɔlemɔ aha amɛ yɛ wɔjamɔ mli? Dabi! (2 Mose 20:4, 5) Yehowa kɛɛ esa akɛ wɔja ekome too pɛ. Ekɛ mɔ kroko loo nɔ kroko naŋ enunyam lɛ mli gbɛfaŋnɔ. Amagai bɛ hewalɛ ko kwraa ni amɛkɛaaye amɛbua wɔ.—Lala 115:4-8; Yes. 42:8.
6. Te ooofee tɛŋŋ ona ole Nyɔŋmɔ jogbaŋŋ? Gbɛ kome ni oootsɔ nɔ ji ni okwɛ nibii ni ebɔ lɛ ni osusu nɔ ni amɛkɛɔ wɔ lɛ he jogbaŋŋ diɛŋtsɛ. Nyɔŋmɔ nibɔɔi lɛ tsɔɔ wɔ akɛ eyɛ hewalɛ kɛ nilee babaoo. Wɔnaa esuɔmɔ lɛ yɛ nɔ fɛɛ nɔ ni efee lɛ mli. (Lala 19:2-7; Rom. 1:20) Gbɛ kroko ni wɔɔnyɛ wɔtsɔ nɔ wɔkase Nyɔŋmɔ he nii ji kɛtsɔ Biblia lɛ kasemɔ nɔ. Ekɛɔ wɔ nibii babaoo ni tsɔɔ nɔ̃ Nyɔŋmɔ ni eji lɛ yɛ mli. Ekɛɔ wɔ eyiŋtoo kɛ nɔ ni etaoɔ ni wɔfee lɛ hu he sane.—Amos 3:7; 2 Tim. 3:16, 17.
[Mfonirii ni yɔɔ baafa 5]
Wɔkaseɔ Nyɔŋmɔ he nii kɛjɛɔ bɔɔ nii kɛ Biblia lɛ mli