Nikasemɔ 9
Esa akɛ Nyɔŋmɔ Tsuji Ahe Atse
Mɛni hewɔ esa akɛ wɔhe atse yɛ gbɛ fɛɛ gbɛ nɔ? (1)
Te atsɔɔ tɛŋŋ, kɛ́ mɔ ko he aaatse yɛ mumɔŋ? (2) yɛ jeŋba mli? (3) yɛ jwɛŋmɔŋ? (4) yɛ gbɔmɔtsoŋ? (5)
Mɛɛ wiemɔi ni he tseee esa akɛ wɔkwa? (6)
1. Yehowa Nyɔŋmɔ he tse ni eyɛ krɔŋkrɔŋ. Eekpa ejalɔi agbɛ akɛ amɛaahi shi akɛ mɛi ni he tse—yɛ mumɔŋ, jeŋba mli, jwɛŋmɔŋ, kɛ gbɔmɔtsoŋ. (1 Pet. 1:16) Ebiɔ mɔdɛŋbɔɔ diɛŋtsɛ koni anyɛ ahi shi yɛ hetsemɔ mli yɛ Nyɔŋmɔ hiɛ. Wɔyɛ jeŋ ni he tseee mli. Wɔwuɔ wɔshiɔ wɔ diɛŋtsɛ wɔ akɔnɔi ni haa wɔfeɔ esha lɛ hu. Shi esaaa akɛ wɔnijiaŋ jeɔ wui.
2. Mumɔŋ Hetsemɔ: Kɛ wɔmiisumɔ ni wɔsɔmɔ Yehowa lɛ, wɔnyɛŋ wɔya nɔ wɔhiɛ apasa jamɔ tsɔɔmɔi loo emli kusumii lɛ eko kwraa mli. Esa akɛ wɔje apasa jamɔ mli ni wɔkafi esɛɛ yɛ gbɛ ko kwraa nɔ. (2 Kor. 6:14-18; Kpoj. 18:4) Kɛ wɔná wɔkase Nyɔŋmɔ he anɔkwale pɛ lɛ, esa akɛ wɔkwɛ jogbaŋŋ ni mɛi ni tsɔɔ apasa tsɔɔmɔi akalaka wɔ.—2 Yoh. 10, 11.
3. Jeŋba Mli Hetsemɔ: Yehowa miisumɔ ni ejalɔi aba amɛjeŋ akɛ anɔkwa Kristofoi yɛ bei fɛɛ mli. (1 Pet. 2:12) Enaa nɔ fɛɛ nɔ ni wɔfeɔ, yɛ teemɔŋ tete po. (Heb. 4:13) Esa akɛ wɔkwa bɔlɛnamɔ mli jeŋba shara kɛ je nɛŋ nifeemɔi krokomɛi ni he tseee lɛ.—1 Kor. 6:9-11.
4. Jwɛŋmɔŋ Hetsemɔ: Kɛ wɔha susumɔi kpakpai ni he tse yi wɔjwɛŋmɔi amli obɔ lɛ, wɔjeŋba hu he baatse. (Fil. 4:8) Shi kɛ wɔjwɛŋ nibii ni he tseee nɔ lɛ, nifeemɔi fɔji baajɛ mli aba. (Mat. 15:18-20) Esa akɛ wɔkwa hiɛtserɛjiemɔi sɔrɔtoi ni baanyɛ afite wɔjwɛŋmɔi. Wɔbaanyɛ wɔha susumɔi ni he tse ayi wɔjwɛŋmɔi amli obɔ kɛtsɔ Nyɔŋmɔ Wiemɔ lɛ kasemɔ nɔ.
5. Gbɔmɔtsoŋ Hetsemɔ: Akɛni Kristofoi damɔ Nyɔŋmɔ najiaŋ hewɔ lɛ, esa akɛ amɛha amɛgbɔmɔtsei kɛ atadei ahe atse. Esa akɛ wɔfɔ wɔdɛ beni wɔtee nii asɛɛ wɔgbe naa, ni esa akɛ wɔfɔ wɔniji ahe dani wɔye nii loo wɔta niyenii ahe. Kɛ obɛ nɔ ko ni ato he gbɛjianɔ ni wamɔ tsɔɔ mli kɛyaa lɛ, no lɛ esa akɛ afu wamɔ lɛ. (5 Mose 23:12, 13) Gbɔmɔtsoŋ hetsemɔ ni aaahi shi yɛ naa lɛ haa anaa gbɔmɔtsoŋ hewalɛ kpakpa. Esa akɛ Kristofonyo shia mli kɛ ehe fɛɛ afee falefale ni emli kɛ ehe atse. Esa akɛ efee nɔ ni esoro no kwraa yɛ akutso lɛ mli akɛ nɔkwɛmɔ nɔ kpakpa.
6. Wiemɔ ni He Tse: Esa akɛ Nyɔŋmɔ tsuji awie anɔkwale daa. Amalelɔi boteŋ Nyɔŋmɔ Maŋtsɛyeli lɛ mli. (Efe. 4:25; Kpoj. 21:8) Kristofoi kɛ wiemɔ shara tsuuu nii. Amɛbooo yakayaka wiemɔi atoi loo ni amɛaawie nakai hu. Yɛ amɛwiemɔ ni he tse hewɔ lɛ, esoro amɛ kwraa yɛ nitsumɔ hé loo yɛ skul kɛ akutso lɛ mli hu.—Efe. 4:29, 31; 5:3.
[Mfonirii ni yɔɔ baafa 19]
Esa akɛ Nyɔŋmɔ tsuji ahe atse yɛ gbɛi sɔrɔtoi fɛɛ nɔ