Nikasemɔ 16

Oyiŋkpɛɛ akɛ Ooosɔmɔ Nyɔŋmɔ

Mɛni esa akɛ ofee ni otsɔ Nyɔŋmɔ naanyo? (1, 2)

Mɛɛ gbɛ otsɔɔ ojɔɔ owala nɔ ohaa Nyɔŋmɔ? (1)

Mɛɛ be esa akɛ abaptisi bo? (2)

Te ooofee tɛŋŋ ona hewalɛ ni ohi shi akɛ anɔkwafo oha Nyɔŋmɔ? (3)

1. Bɔni afee ni otsɔ Nyɔŋmɔ naanyo lɛ, esa akɛ ona Biblia mli anɔkwale lɛ he nilee kpakpa (1 Tim. 2:3, 4), ona hemɔkɛyeli yɛ nibii ni okase lɛ mli (Heb. 11:6), otsake otsui yɛ ohe eshai amli (Bɔf. 17:30, 31), ni okwa ohe yɛ oshihilɛ gbɛ lɛ mli. (Bɔf. 3:19) Kɛkɛ lɛ esa akɛ suɔmɔ ni oyɔɔ kɛha Nyɔŋmɔ lɛ atsirɛ bo ni ojɔɔ ohe nɔ oha lɛ. Enɛ tsɔɔ akɛ bo diɛŋtsɛ okɛɔ lɛ yɛ sɔlemɔ mli yɛ teemɔŋ akɛ okɛ ohe miiha lɛ ni ofee esuɔmɔnaa nii.—Mat. 16:24; 22:37.

2. Beni ojɔɔ ohe nɔ oha Nyɔŋmɔ sɛɛ lɛ, esa akɛ abaptisi bo. (Mat. 28:19, 20) Baptisimɔ haa mɔ fɛɛ mɔ leɔ akɛ ojɔɔ ohe nɔ oha Yehowa. No hewɔ lɛ baptisimɔ yɛ kɛha mɛi pɛ ni edara bɔ ni sa ni amɛaanyɛ amɛkpɛ amɛyiŋ akɛ amɛaasɔmɔ Nyɔŋmɔ. Kɛ aabaptisi mɔ ko lɛ, esa akɛ akɛ egbɔmɔtso muu lɛ fɛɛ awo nu lɛ shishi be kuku.a—Mar. 1:9, 10; Bɔf. 8:36.

3. Beni ojɔɔ ohe nɔ sɛɛ lɛ, Yehowa baakpa gbɛ akɛ ooohi shi yɛ oshiwoo lɛ naa. (Lala 50:14; Jaj. 5:4, 5) Abonsam baabɔ mɔdɛŋ akɛ eeetsi onaa koni okasɔmɔ Yehowa. (1 Pet. 5:8) Shi bɛŋkɛmɔ Nyɔŋmɔ yɛ sɔlemɔ mli. (Fil. 4:6, 7) Kasemɔ e-Wiemɔ lɛ daa gbi. (Lala 1:1-3) Okɛ ohe abɔ asafo lɛ he gbagbalii. (Heb. 13:17) Kɛtsɔ enɛ fɛɛ feemɔ nɔ lɛ, obaana hewalɛ ni okɛhi shi akɛ anɔkwafo oha Nyɔŋmɔ. Obaanyɛ otsɔ nɛkɛ gbɛ nɔ ofee nɔ fɛɛ nɔ ni Nyɔŋmɔ kpaa gbɛ kɛjɛɔ odɛŋ lɛ kɛya naanɔi fɛɛ mli!

[Shishigbɛ niŋmaa]