Ná Shihilɛ Ni Yɔɔ Miishɛɛ Mli Ŋɔɔmɔ—Kɛjɛ Ŋmɛnɛ Kɛya Naanɔ!

ABRAHAM, nuu ni abuɔ lɛ waa ni yɔɔ hemɔkɛyeli, ní ehe sane eje kpo yɛ Biblia yinɔsane mli lɛ shĩ shihilɛ ni ŋɔɔ ni yɔɔ Ur maŋtiase ni shwereɔ lɛ mli lɛ. Beni ekɛ be saŋŋ ehi Haran lɛ, ehi shi akɛ shikpalɔ yɛ ewala be ni eshwɛ lɛ mli yɛ buui amli, ni ebɛ shia ko ni ehiɔ mli daa. (1 Mose 12:1-3; Bɔfoi lɛ Asaji 7:2-7; Hebribii 11:8-10) Ni kɛlɛ, aŋma akɛ: “Abraham gbɔ kotokoto ni egbo yɛ gbɔlɛ kpakpa mli, nuumoŋ ni eye afii pii.” (1 Mose 25:8) Mɛni ha ewala bafee nɔ ni ha emii shɛ ehe? Ejeee nuumo ní etsui enyɔ emli beni eshwɛ fioo ni ebaagbo yɛ nibii ni enyɛ etsu yɛ ewala be mli hewɔ lɛ kɛkɛ. Atsɛ Abraham yɛ sɛɛ mli akɛ “Nyɔŋmɔ shieŋtsɛ” loo naanyo yɛ hemɔkɛyeli ni mli wa ni ená yɛ Nyɔŋmɔ mli lɛ hewɔ. (Yakobo 2:23; Yesaia 41:8) Wekukpaa kpakpa ni Abraham ná yɛ ekɛ e-Bɔlɔ lɛ teŋ lɛ ji nɔ ni ha eshihilɛ fee nɔ ni ha emii shɛ ehe.

² Taakɛ Abraham fee aaafee afii 4,000 ni eho nɛɛ lɛ, bo hu obaanyɛ oná shihilɛ kpakpa ni haa mɔ mii shɛɔ ehe ŋmɛnɛ, kɛ́ otao okɛ Nyɔŋmɔ teŋ naanyobɔɔ. Susumɔ ni ji akɛ oji jeŋ muu fɛɛ Bɔlɔ lɛ shieŋtsɛ loo naanyo lɛ baanyɛ aná onɔ hewalɛ waa, shi ebaanyɛ eba mli. Yɛ mɛɛ gbɛ nɔ? Ehe baahia ni ole lɛ ni osumɔ lɛ. (1 Korintobii 8:3; Galatabii 4:9) Wekukpaa ni tamɔ nɛkɛ ni okɛ o-Bɔlɔ lɛ baaná lɛ baanyɛ aha oshihilɛ afee nɔ ni shishinumɔ yɔɔ mli kɛ miishɛɛ.

³ Yɛ mɛi ni sumɔɔ ni amɛkpɛlɛ Yesu Kristo kpɔmɔ afɔleshaa lɛ nɔ lɛ agbɛfaŋ lɛ, Yehowa kɛ gbɛtsɔɔmɔi eha koni amɛná miishɛɛ shihilɛ. (Yesaia 48:17) Kaimɔ akɛ, Adam tse atua eshi Nyɔŋmɔ kɛtsɔ eyiŋ ni ekpɛ eha lɛ diɛŋtsɛ ehe yɛ nɔ ni hi kɛ nɔ ni ehiii he lɛ. Eyɛ mli akɛ Yehowa tsɔ e-Bi lɛ kpɔmɔ afɔleshaa lɛ nɔ ehé adesai aweku lɛ, ni eha amɛ gbɛ ni amɛaatsɔ nɔ amɛná kpɔmɔ kɛjɛ esha kɛ gbele mli moŋ, shi esa akɛ mɔ aŋkro fɛɛ mɔ aŋkro akpɛlɛ kpɔmɔnɔ lɛ nɔ ni ekafolɔ lɛ diɛŋtsɛ etɛi eshwie shi dɔŋŋ yɛ ekpakpa kɛ efɔŋ he. Esa akɛ wɔba wɔhe shi wɔha mlai kɛ shishitoo mlai ni Nyɔŋmɔ kɛhaa mɛi ni kpɛlɛɔ Yesu kpɔmɔ afɔleshaa lɛ nɔ lɛ.

⁴ Yɛ be mli ni oyaa nɔ okaseɔ Biblia lɛ ni okɛ shishitoo mlai ni yɔɔ mli lɛ tsuɔ nii lɛ, ŋwanejee ko bɛ he akɛ ohiɛ baasɔ sɛɛnamɔ ni yɔɔ tɛi ni Nyɔŋmɔ efolɔ eshwie shi yɛ ekpakpa kɛ efɔŋ he lɛ he. (Lala 19:8-10) Ebaatsirɛ bo koni okɛɛ Nyɔŋmɔ tamɔ bɔ ni Yehowa gbalɔ Mose kɛɛ lɛ, akɛ: “Agbɛnɛ, miikpao fai, kɛ́ mihiɛ eba nyam yɛ ohiɛ lɛ, tsɔɔmɔ mi ogbɛ lɛ ko, beni afee ni maleo.” (2 Mose 33:13; Lala 25:4) Biblia lɛ kɛ shishitoo mlai ni baatsɔɔ bo gbɛ kɛtsɔ “jaramɔ bei” nɛɛ amli naagbai lɛ amli lɛ haa. (2 Timoteo 3:1) Hiɛsɔɔ ni oyɔɔ lɛ baada, ni ebaaha ole Yehowa jogbaŋŋ ni ewaje okɛ lɛ teŋ naanyobɔɔ lɛ.

⁵ Abraham gbo akɛ ‘nuumo ni eye afii pii,’ shi bei abɔ ni esa akɛ adesa agbo nɛɛ, shihilɛ kã he eji nɔ ni sɛɛ kɛɛɛ kwraa. Suɔmɔ ni ayɔɔ akɛ aaahi shi lɛ yɛ wɔ fɛɛ wɔmli, ekɔɔɔ he eko bɔ ni wɔɔgbɔlɔ wɔha. Nɔ hewɔ ji akɛ “[Nyɔŋmɔ] eŋɔ naanɔ hu ewo gbɔmɛi atsuii amli; ni kɛlɛ amɛnyɛɛɛ amɛna nɔ ni Nyɔŋmɔ efee kɛjɛ shishijee kɛyaa naagbee lɛ mli.” (Jajelɔ 3:11, New International Version) Kɛ wɔmiihi shi kɛya naanɔ po lɛ, wɔnyɛŋ wɔna Yehowa nibɔɔ nii lɛ fɛɛ mli. Nɔ ni wɔbaanyɛ wɔyɔse, wɔkase, ní wɔná mli ŋɔɔmɔ yɛ Yehowa naakpɛɛ nitsumɔi lɛ amli lɛ bɛ naagbee!​—Lala 19:2-5; 104:24; 139:14.

⁶ Ekolɛ efeŋ bo miishɛɛ akɛ ooohi shi kɛya naanɔ kɛji akɛ shikpɔŋ nɔ baaya nɔ ayi obɔ kɛ naagbai ni tamɔ nɛkɛ ni wɔnaa ŋmɛnɛ lɛ. Shi kɛlɛ, esaaa akɛ no bafeɔ naagba kwraa. Biblia lɛ woɔ shi akɛ: “Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Wiemɔ ni ji “ŋwɛi hee” lɛ miiwie ŋwɛi nɔyeli gbɛjianɔtoo hee lɛ he—Nyɔŋmɔ Maŋtsɛyeli ni baaye shikpɔŋ muu lɛ fɛɛ nɔ lɛ. “Shikpɔŋ hee” lɛ ji adesai aweku hee ni ji mɛi ni feɔ toiboo amɛhaa nakai Maŋtsɛyeli nɔyeli lɛ. Bɔni afee ni Yehowa aha enɛ aba mli lɛ, etsɛŋ ni ebaafee nii eshi mɛi ni “fiteɔ shikpɔŋ lɛ.”​—Kpojiemɔ 11:18; 2 Petro 3:10.

⁷ Mɛɛ mra be kwraa enɛ baaba? Yesu Kristo kɛ tawuui ni kɔɔ majimaji ahe, “hɔ̃ji . . . kɛ shikpɔŋhosomɔi [ni] aaaba hei srɔtoi fɛɛ,” “gbele helai” kɛ “mlakwamɔ [ni] baafá” fata he akɛ “je nɛŋ naagbee lɛ he okadi.” (Mateo 24:3-13; Luka 21:10, 11; 2 Timoteo 3:1-5) Kɛkɛ ni egba akɛ: “Beni nyɛaana akɛ nibii nɛɛ etsɔ naa shi lɛ, nyɛnáa nyɛlea akɛ Nyɔŋmɔ maŋtsɛyeli lɛ eshɛ etã.” (Luka 21:31) Lɛɛlɛŋ, be ni Yehowa kɛbaakpata mɛi fɔ̃ji lɛ ahiɛ lɛ miibɛŋkɛ oyayaayai.a

⁸ Yɛ “Nyɔŋmɔ Ofe lɛ gbi wulu lɛ” sɛɛ beni Yehowa baajie efɔŋfeemɔ kɛjɛ shikpɔŋ lɛ nɔ lɛ, abaaha wɔshikpɔŋ lɛ atsɔ paradeiso. (Kpojiemɔ 16:14, 16; Yesaia 51:3) Kɛkɛ lɛ, “jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” (Lala 37:29) Ni mɛi ni egboi lɛ hu? Yesu kɛɛ akɛ, “enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaanii lɛ aaate shi kɛaatee kojomɔ lɛ mli.” (Yohane 5:28, 29) Yehowa ni yɔɔ mɔ aŋkro fɛɛ mɔ aŋkro he miishɛɛ lɛ miisumɔ ni ekɛ mɛi ni wɔɔ yɛ gbele mli lɛ aba wala mli ekoŋŋ. Ekolɛ jeŋ nilelɔi baasumɔ ni amɛfee adesai ahenɔ kɛtsɔ fɔmɔsu he nilee nɔ, shi ehe ehiaŋ ni Bɔlɔ lɛ kɛ adesai ahenɔ feemɔ atsu nii. Enyɛɔ ekaiɔ adesa fɛɛ adesa ni abaanyɛ akpɔ̃ lɛ lɛ he nɔ fɛɛ nɔ, ní ekɛ mɛi ni tamɔ nakai lɛ aba wala mli ekoŋŋ. Hɛɛ, oyɛ gbɛkpamɔ akɛ okɛ osuɔlɔi ni egboi lɛ baakpe yɛ paradeiso shikpɔŋ nɔ!

⁹ Te shihilɛ baatamɔ aha tɛŋŋ yɛ Paradeiso? Shikpɔŋ nɔ baayi obɔ kɛ hii kɛ yei ni yɔɔ miishɛɛ ni kɛ ekomefeemɔ jieɔ Bɔlɔ lɛ yi. “Maŋbii lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24; 54:13) Hela ni piŋɔ mɔ lɛ mɔŋ mɔ ko mɔ ko loo mɔ ko kwraa naŋ henumɔŋ kɛ jwɛŋmɔŋ naagbai. Mɛi fɛɛ baaná niyenii babaoo aye, ni amɛmii baashɛ amɛhe yɛ nitsumɔ kpakpa mli yɛ Nyɔŋmɔ yiŋtoo lɛ kɛ gbeekpamɔ naa. (Lala 72:16; Yesaia 65:23) Amɛbaaná amɛkɛ kooloi ateŋ toiŋjɔlɛ, amɛkɛ nanemɛi adesai ateŋ toiŋjɔlɛ, kɛ nɔ ni fe fɛɛ lɛ, “kɛ Nyɔŋmɔ teŋ . . . hejɔlɛ” mli ŋɔɔmɔ.​—Romabii 5:1; Lala 37:11; 72:7; Yesaia 11:6-9.

¹⁰ Mɛni esa akɛ ofee ni ohi nakai Paradeiso lɛ mli ni oná wala mli ŋɔɔmɔ ni omii ashɛ ohe kwraa kɛmɔ shi? Yesu Kristo kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) No hewɔ lɛ, yaa nɔ oná Yehowa kɛ Yesu Kristo he nilee, ní okase nɔ ni Nyɔŋmɔ taoɔ yɛ odɛŋ. Kɛkɛ lɛ obaanyɛ osa Yehowa Nyɔŋmɔ hiɛ, ni enɛ baaha omii ashɛ ohe jogbaŋŋ diɛŋtsɛ yɛ oshihilɛ mli.