Miishɛɛ

MIISHƐƐ yeɔ ebuaa ni ehaa wiemɔ ko ŋɔɔ. Yɛ be mli ni ehe miihia ni adafitswaa ahi sane ko mli lɛ, wiemɔ ni ŋɔɔ ni miishɛɛ yɔɔ mli ji nɔ ni mɔɔ toibolɔi lɛ ajwɛŋmɔ. Ekɔɔɔ he eko he ni ojɛ kɛ bɔ ni osu yɔɔ ha lɛ, obaanyɛ oná miishɛɛ.

Wiemɔ kɛ Henumɔ. Beni Yesu kɛ Samaria yoo ko wieɔ lɛ, ekɛɛ akɛ mɛi ni jáa Yehowa lɛ, esa akɛ amɛfee nakai yɛ “mumɔ kɛ anɔkwale mli.” (Yoh. 4:24) Esa akɛ hiɛsɔɔ tsuii akanya jamɔ ni amɛkɛhaa lɛ, koni ekɛ anɔkwale ni anaa yɛ Nyɔŋmɔ Wiemɔ lɛ mli lɛ akpã gbee. Kɛ́ mɔ ko yɛ nakai hiɛsɔɔ ni mli kwɔ lɛ, ebaaje kpo yɛ bɔ ni ewieɔ ehaa lɛ mli. Ebaasumɔ ni egba mɛi krokomɛi Yehowa suɔmɔ nikeenii lɛ he sane. Ehiɛ su, ninefɔɔ ni ekɛmaa sane nɔ mi, kɛ egbee baajie bɔ ni enuɔ he diɛŋtsɛ lɛ kpo.

Belɛ, mɛni hewɔ wielɔ ní sumɔɔ Yehowa ní heɔ nɔ ni ekɛɔ lɛ eyeɔ lɛ baanyɛ afee mɔ ni bɛ miishɛɛ beni ewieɔ lɛ? Efaaa akɛ eeesaa ehe yɛ nɔ ni ebaakɛɛ lɛ mli kɛkɛ. Esa akɛ esane lɛ aná enɔ hewalɛ, ekɛ henumɔ awo mli. Ŋɔɔ lɛ akɛ aha lɛ nifeemɔ koni ebawie Yesu Kristo kpɔmɔ afɔleshaa lɛ he sane. Kɛ́ wielɔ lɛ miiha ewiemɔ lɛ, esaaa akɛ ekɛ susumɔi babaoo woɔ eyitsoŋ obɔ, shi moŋ hiɛsɔɔ kɛha nɔ ni Yesu afɔleshaa lɛ tsɔɔ kɛha wielɔ lɛ diɛŋtsɛ kɛ etoibolɔi lɛ fɛɛ. Ehe miihia ni ekai shidaa henumɔi ni eyɔɔ kɛha Yehowa Nyɔŋmɔ kɛ Kristo Yesu yɛ nɛkɛ naakpɛɛ nikeenii nɛɛ hewɔ. Ehe miihia ni esusu shihilɛ mli gbɛkpamɔi wuji ní naa gbeleɔ kɛha adesai aweku lɛ—naanɔ miishɛɛ yɛ gbɔmɔtsoŋ hewalɛ ní eye emuu mli yɛ shikpɔŋ nɔ paradeiso ni aku sɛɛ akɛba ekoŋŋ lɛ mli lɛ he! No hewɔ lɛ, ehe miihia ni ekɛ etsui awo mli.

Biblia lɛ wieɔ yɛ woloŋmalɔ Ezra, ni ji tsɔɔlɔ yɛ Israel lɛ he akɛ ekɛ “etsui efɔ̃ nɔ akɛ eeetao Yehowa mla lɛ sɛɛgbɛ ní eye nɔ, ni etsɔɔ mɛi akpɔi lɛ kɛ mlai lɛ yɛ Israel.” (Ezra 7:10) Kɛ́ wɔfee nakai nɔŋŋ—jeee akɛ wɔmiisaa wɔhe yɛ sane lɛ mli kɛkɛ, shi moŋ kɛ wɔtsuii hu—lɛ, no lɛ wɔbaawie kɛjɛ wɔtsui mli. Anɔkwale lɛ ní wɔjɛɔ wɔtsui mli wɔwieɔ he nakai lɛ baanyɛ aye abua mɛi ní wɔwieɔ wɔtsɔɔ lɛ babaoo koni amɛná suɔmɔ diɛŋtsɛ kɛha anɔkwale lɛ.

Susumɔ Otoibolɔi lɛ Ahe. Nɔ kroko ni he hiaa yɛ miishɛɛ kpojiemɔ mli ji nɔmimaa ni oooná akɛ ehe miihia ni otoibolɔi lɛ anu nɔ ni oyɔɔ kɛɛmɔ lɛ. Enɛ tsɔɔ akɛ kɛji oosaa ohe yɛ wiemɔ ni obaaha mli lɛ, esaaa akɛ obuaa saji ni he hiaa lɛ pɛ kɛkɛ naa, shi moŋ esa akɛ osɔle obi Yehowa gbɛtsɔɔmɔ hu ni okɛtsu nii ni okɛye obua mɛi ni oyaawie otsɔɔ lɛ. (Lala 32:8; Mat. 7:7, 8) Pɛimɔ nɔ hewɔ ni ehe hiaa ni otoibolɔi lɛ anu sane nɛɛ, bɔ ni amɛbaaná he sɛɛ, kɛ bɔ ni obaanyɛ okɛha yɛ gbɛ ní baaha amɛná hiɛsɔɔ amɛha bɔ ni ehe hiaa ha lɛ mli.

Tsu osane lɛ he nii kɛyashi obaana nɔ ko ní obaaná he miishɛɛ. Ehe ehiaaa ni efeɔ sane hee, shi bɔ ni obaatsu sane lɛ he nii oha lɛ baanyɛ afee ehee. Kɛ́ onyɛ oto nɔ ko he gbɛjianɔ ni baanyɛ aye abua otoibolɔi lɛ diɛŋtsɛ ni ewaje amɛkɛ Yehowa teŋ wekukpaa lɛ, ni amɛhiɛ asɔ enikeenii lɛ, ni amɛkpee gbɛjianɔtoo momo nɛɛ mli shihilɛ mli nɔnyɛɛi lɛ anaa yɛ omanyeyeli lɛ mli, loo ni amɛhe asa yɛ amɛshiɛmɔ nitsumɔ lɛ mli lɛ, no lɛ oyɛ yiŋtoo ni ooodamɔ nɔ ni oná owiemɔ lɛ he miishɛɛ.

Ni kɛ́ onifeemɔ lɛ ji ní okane nii yɛ mɛi ahiɛ hu? Bɔni afee ni ofee enɛ yɛ miishɛɛ mli lɛ, babaoo he miihia fe tsɛmɔ ni oootsɛ wiemɔi lɛ jogbaŋŋ ni obua amɛnaa jogbaŋŋ kɛkɛ. Kasemɔ sane lɛ. Kɛ́ oyaakane Biblia lɛ fã ko lɛ, no lɛ taomɔ nibii amli yɛ he. Ná nɔmimaa akɛ onuɔ eshishijee yiŋtoo lɛ shishi. Susumɔ bɔ ni ehe yɔɔ sɛɛnamɔ kɛha bo kɛ otoibolɔi lɛ he, ni okane kɛ yiŋtoo akɛ okɛbaaha mɛi ni boɔ bo toi lɛ.

Ani oosaa ohe kɛha shiɛmɔ nitsumɔ lɛ? Tĩi saneyitso kɛha sanegbaa lɛ kɛ ŋmalɛi ní oto akɛ okɛbaatsu nii lɛ mli. Agbɛnɛ hu, susumɔ nɔ ni yɔɔ gbɔmɛi lɛ ajwɛŋmɔ mli lɛ he. Mɛni saji eje kpo yɛ adafitswai lɛ amli? Mɛɛ naagbai amɛkɛkpeɔ? Kɛ́ osaa ohe koni otsɔɔ gbɔmɛi lɛ akɛ naagbai ni amɛsusuɔ he lɛ anaa tsabaa yɛ Nyɔŋmɔ Wiemɔ lɛ mli lɛ, ehaa onuɔ he akɛ ofee nakai, ni miishɛɛ lɛ diɛŋtsɛ baa.

Jiemɔ Miishɛɛ Kpo Kɛtsɔ Wiemɔ ni Haa Mɔ Tsui Nyaa Nɔ. Miishɛɛ jieɔ ehe kpo babaoo yɛ wiemɔ ni haa mɔ tsui nyaa ni ohaa lɛ mli. Esa akɛ enɛ aje kpo yɛ ohiɛ su mli. Esa akɛ oná nɔmimaa yɛ owiemɔ lɛ mli, shi jeee keketee.

Pɛpɛɛpɛ ŋmɛɛ he miihia. Mɛi komɛi baanyɛ aná miishɛɛ yɛ nɔ fɛɛ nɔ he. Ehe miihia ni aye abua amɛ ni amɛyɔse akɛ kɛji mɔ ko wó ehe nɔ tsɔ loo ejie henumɔ babaoo tsɔ kpo lɛ, etoibolɔ lɛ baasusu lɛ moŋ ehe fe shɛɛ sane lɛ. Yɛ gbɛ kroko nɔ lɛ, ehe miihia ni awo mɛi ni hiɛ gboɔ lɛ hewalɛ ni amɛwie kɛ ekãa babaoo.

Miishɛɛ tsɛŋeɔ mɔ. Kɛ́ okɛ toibolɔi lɛ ná tsakpaa jogbaŋŋ, ni oyɛ owiemɔ lɛ he miishɛɛ lɛ, no lɛ otoibolɔi lɛ baanu nakai miishɛɛ lɛ he. Apolo jie henumɔ ni haa mɔ tsui nyaa kpo yɛ ewiemɔ mli, ni awie ehe akɛ wielɔ ni naa tse. Kɛ́ oyɛ Nyɔŋmɔ mumɔ lɛ kanyamɔ lɛ, no lɛ wiemɔ ni haa mɔ tsui nyaa ni oooha lɛ baatsirɛ mɛi ni boɔ bo toi lɛ ni amɛtsu he nii.—Bɔf. 18:24, 25; Rom. 12:11.

Miishɛɛ ní Sa Sane Lɛ. Kwɛmɔ jogbaŋŋ koni okaná miishɛɛ fe nine yɛ wiemɔ ni ohaa lɛ fɛɛ mli aahu akɛ eha etɔ otoibolɔi lɛ. No lɛ hewalɛwoo fɛɛ hewalɛwoo ni okɛbaaha ni atsu nɔ ni osusuɔ he lɛ he nii lɛ baafee wiemɔi ní aanu kɛkɛ. Enɛ maa bɔ ni ehe hiaa akɛ asaa he yɛ saji ni baaha otsake owiemɔ lɛ mli lɛ nɔ mi. Bɔɔ mɔdɛŋ ni okabote su ni jieɔ shikpilikpiifeemɔ kpo lɛ mli. Kɛ́ ohala osaji lɛ jogbaŋŋ lɛ, no lɛ obaaná he miishɛɛ waa diɛŋtsɛ. Shi saji otii lɛ ekomɛi diɛŋtsɛ biɔ miishɛɛ babaoo yɛ wiemɔ lɛ mli fe ekrokomɛi, ni esa akɛ akɛ hesaa afutu enɛ yɛ wiemɔ ni ohaa lɛ fɛɛ mli.

Esa akɛ awie saji otii titrii lɛ ahe kɛ miishɛɛ. Esa akɛ owiemɔ lɛ ana otii ní he hiaa fe fɛɛ ni obaatswa oma nɔ. Akɛni enɛɛmɛi ji saji titrii ni he hiaa yɛ owiemɔ lɛ mli hewɔ lɛ, afɔɔ saji otii lɛ ahe gbɛjianɔtoo koni ekanya otoibolɔi lɛ. Yɛ be mli ni okɔne otoibolɔi lɛ ayiŋ sɛɛ lɛ, ehe miihia ni okanya amɛ, ni otsɔɔ amɛ sɛɛnamɔi ni yɔɔ nɔ ni asusu he lɛ kɛ nitsumɔ mli. Miishɛɛ ni oyɔɔ lɛ baaye abua bo koni oshɛ otoibolɔi lɛ atsui he. Esaaa akɛ akɛ wiemɔ ni haa mɔ tsui nyaa lɛ nyɛɔ mɔ nɔ. Esa akɛ yiŋtoo ko ahi he, ni osane lɛ kɛ nakai yiŋtoo lɛ baaha bo.