Ŋaawoo ni Mɔɔ Shi

ESA akɛ Kristofoi onukpai anyɛ ‘awie atsɔɔ mɛi yɛ nitsɔɔmɔ ni tsaa mɔ lɛ mli.’ (Tito 1:9) Bei komɛi lɛ, esa akɛ ofee enɛ yɛ be mli ni okɛ jaramɔ shihilɛi kpeɔ lɛ. Ehe miihia ni okɛ ŋaawoo ni kɛ Ŋmalɛi amli gbɛtsɔɔmɔi kpãa gbee lɛ aha. No hewɔ lɛ, esa akɛ onukpai abo ŋaawoo nɛɛ toi: “Hĩi . . . ŋaawoo he.” (1 Tim. 4:13) Eyɛ mli akɛ wɔ sanegbaa nɛɛ miikɔ onukpai lɛ loo mɛi ni miishɛ nakai hegbɛ lɛ he lɛ ahe titri moŋ, shi bei komɛi shɛɔ ni esa akɛ fɔlɔi awo amɛbii ŋaa loo ehe miihia ni mɛi ni kwɛɔ Biblia mli nikasemɔi anɔ lɛ awo amɛ Biblia mli nikaselɔi lɛ ŋaa. Yɛ shihilɛi ni tamɔ enɛɛmɛi amli lɛ, abaanyɛ akɛ gbɛtsɔɔmɔi ni tamɔ no nɔŋŋ atsu nii.

Shihilɛi ni Biɔ ni Akɛ Ŋaawoo Aha. Bɔni afee ni ole be ni esa akɛ okɛ ŋaawoo aha lɛ, kɛ́ opɛi shihilɛi amli ni akɛ ŋaawoo ha, ní aŋmala ashwie shi yɛ Biblia lɛ mli lɛ amli lɛ, ebaanyɛ eye ebua. Bɔfo Petro wo onukpai lɛ ŋaa koni amɛkɛ amɛjwɛŋmɔ ama gbɛnaa nii ni kã amɛnɔ akɛ Nyɔŋmɔ tooiku lɛ anɔkwɛlɔi lɛ nɔ. (1 Pet. 5:1, 2) Paulo wo Tito ŋaa koni ewie etsɔɔ oblahii lɛ koni “amɛjwɛŋmɔ akã shi.” (Tito 2:6) Paulo wo nanemɛi Kristofoi hewalɛ koni ‘amɛnaabu afee ekome’ koni amɛtsi amɛhe kɛjɛ mɛi ni sumɔɔ ni amɛkɛ mligbalamɔi aba nyɛmimɛi ateŋ lɛ ahe. (1 Kor. 1:10; Rom. 16:17; Fil. 4:2) Eyɛ mli akɛ Paulo jie asafo ni yɔɔ Tesalonika lɛ mli bii lɛ ayi yɛ nibii kpakpai ni amɛfeɔ lɛ he moŋ, shi ewo amɛ ŋaa koni amɛkɛ tsɔsemɔ ni amɛnine eshɛ nɔ lɛ atsu nii babaoo kɛmɔ shi. (1 Tes. 4:1, 10) Petro kpa nanemɛi Kristofoi lɛ fai koni ‘amɛhĩ heloo lɛ sɛɛdii nii’ lɛ. (1 Pet. 2:11) Yuda wo enyɛmimɛi lɛ ŋaa koni ‘amɛpele hemɔkɛyeli lɛ he’ yɛ hewalɛ ni jɛɔ gbɔmɛi gbohii ni kɛ amɛhe woɔ jeŋba shara mli lɛ aŋɔɔ lɛ hewɔ. (Yuda 3, 4) Awo Kristofoi fɛɛ hewalɛ koni amɛwo mɔ kroko hewalɛ bɔni afee ni eshafeemɔ lakamɔ lɛ akawaje amɛteŋ mɔ ko tsui. (Heb. 3:13) Petro wo Yudafoi ní nako Kristo mli hemɔkɛyeli lɛ ŋaa akɛ: “Nyɛhaa aherea nyɛyiwala kɛjɛa yinɔ kɔdɔŋ nɛɛ mli.”—Bɔf. 2:40.

Mɛɛ sui ahe baahia bɔni afee ni onyɛ okɛ ŋaawoo ni mli wa yɛ shihilɛi ni tamɔ enɛ mli aha? Te mɔ ni woɔ ŋaa lɛ aaafee tɛŋŋ ní eha hiamɔ ahi ehewalɛwoo lɛ mli ni efeee mɔ ni miinyɛ mɔ nɔ loo eyɛ keketee lɛ?

‘Yɛ Suɔmɔ Mli.’ Kɛ́ wɔkɛ wɔŋaawoo lɛ haaa yɛ ‘suɔmɔ mli’ lɛ, no lɛ ebaafee tamɔ nɔ ni eyɛ keketee. (File. 9) Eji anɔkwale akɛ, kɛ́ shihilɛ ko miibi ni afee nɔ ko amrɔ nɔŋŋ lɛ, no lɛ esa akɛ wielɔ lɛ wiemɔ lɛ aha nakai hiamɔ shihilɛ lɛ aje kpo faŋŋ. Kɛ́ owie blɛoo lɛ, no lɛ ebaafee tamɔ nɔ ni ookpa fai. Yɛ nakai beaŋ nɔŋŋ lɛ, esa akɛ hiɛdɔɔ ahi faikpamɔ lɛ mli ni ejie henumɔ ni mli kwɔ kpo. Faikpamɔ ni suɔmɔ yɔɔ mli lɛ baanyɛ akanya toibolɔi lɛ. Beni Paulo wieɔ lɛ diɛŋtsɛ kɛ enanemɛi lɛ ahe lɛ, ekɛɛ Tesalonikabii lɛ akɛ: “Nyɛle akɛ wɔwieɔ wɔtsɔɔ nyɛteŋ mɔ fɛɛ mɔ, tamɔ bɔ ni tsɛ ko wieɔ tsɔɔ ebii.” (1 Tes. 2:11) Nakai Kristofoi nɔkwɛlɔi lɛ wo nyɛmimɛi lɛ hewalɛ yɛ suɔmɔ mli. Ha owiemɔi lɛ afee lɛ faŋŋ akɛ, osusuɔ otoibolɔi lɛ ahe.

Okɛ ŋaa atsu nii. Kaawo mɛi ni obɔɔ mɔdɛŋ koni okanya amɛ ni amɛfee nii lɛ mlifu. Yɛ nakai beaŋ nɔŋŋ lɛ, yaa nɔ ogba otoibolɔi lɛ “Nyɔŋmɔ yiŋtoo muu lɛ fɛɛ.” (Bɔf. 20:27) Mɛi ni sumɔɔ ni amɛbo ŋaawoo toi lɛ amli fuŋ loo amɛnyɛŋ bo akɛni okɛ mlihilɛ miiwo amɛ hewalɛ koni amɛfee nɔ ni ja lɛ hewɔ.—Lala 141:5.

Bei pii lɛ, sɛɛnamɔ yɛ he akɛ okɛ anɔkwa yijiemɔ pɔtɛɛ ko baakpa ŋaawoo lɛ hiɛ. Susumɔ nibii kpakpai ni onyɛmimɛi lɛ feɔ lɛ he—nibii ni Yehowa náa he miishɛɛ jogbaŋŋ lɛ: hemɔkɛyeli ni jeɔ kpo yɛ amɛnitsumɔ mli, suɔmɔ ni tsirɛɔ amɛ koni amɛkanya amɛhe, kɛ amɛtsui shi ni amɛŋmɛɔ yɛ kaa shihilɛi amli lɛ. (1 Tes. 1:2-8; 2 Tes. 1:3-5) Enɛ baaye abua onyɛmimɛi lɛ ni amɛnu he akɛ asumɔɔ amɛ ni anuɔ amɛ shishi, ni enɛ baaye abua amɛ ni amɛbo ŋaawoo fɛɛ ni okɛbaaha amɛ lɛ toi.

‘Yɛ Tsuishitoo Mli.’ Esa akɛ akɛ ŋaawoo aha “yɛ tsuishitoo . . . fɛɛ mli.” (2 Tim. 4:2) Mɛni fata enɛ he? Nɔ ni fata tsuishitoo he ji tsuishiŋmɛɛ ni obaana yɛ efɔŋ loo mlilawoo nɔ ko ni mɔ ko efee lɛ he. Mɔ ni toɔ etsui shi lɛ náa hekɛnɔfɔɔ akɛ etoibolɔi lɛ kɛ nɔ ni ekɛɔ lɛ baatsu nii. Kɛ́ okɛ ŋaawoo ha yɛ shihilɛ ni tamɔ enɛ mli lɛ, ehaŋ ni otoibolɔi lɛ asusu akɛ nɔ ni ehiii yɛ amɛhe kwraa ji nɔ ni osusuɔ lɛ. Hekɛnɔfɔɔ ni oyɔɔ akɛ onyɛmimɛi hii kɛ yei lɛ miisumɔ ni amɛsɔmɔ Yehowa kɛ amɛnyɛmɔ fɛɛ lɛ baaha amɛsumɔ akɛ amɛaafee nɔ ni ja.—Heb. 6:9.

“Yɛ Nitsɔɔmɔ ni Tsaa Mɔ lɛ Mli.” Te aaafee tɛŋŋ ní onukpa ko anyɛ ‘awie atsɔɔ mɛi yɛ nitsɔɔmɔ ni tsaa mɔ lɛ mli’? Kɛtsɔ “mɔ ni hiɛɔ tsɔɔmɔ lɛ naa anɔkwa wiemɔ lɛ mli” ní eeeji lɛ nɔ. (Tito 1:9) Yɛ nɔ najiaŋ ni ooowie bo diɛŋtsɛ ojwɛŋmɔ lɛ, ha ŋaawoo lɛ fɛɛ adamɔ Nyɔŋmɔ Wiemɔ lɛ nɔ. Ha Biblia lɛ aye abua bo koni okɛɛ nɔ ni he hiaa ni okɛɛ. Tsĩi sɛɛnamɔi ni yɔɔ nɔ ni Biblia lɛ kɛɔ yɛ sane ni nyɛsusuɔ he lɛ he ní akɛaatsu nii lɛ tã. Ha nibii ni baajɛ mli aba—bianɛ kɛ wɔsɛɛ fɛɛ—kɛji afeee nɔ ni kɛ Nyɔŋmɔ Wiemɔ lɛ kpãa gbee lɛ ahi ojwɛŋmɔ mli, ni okɛ enɛɛmɛi atsu nii ni okɛkɔne otoibolɔi lɛ ayiŋ ni amɛna bɔ ni ehe hiaa akɛ amɛfee nii yɛ gbɛ ni sa nɔ.

Kwɛmɔ ni otsɔɔ otoibolɔi lɛ nɔ ni esa akɛ amɛfee kɛ bɔ ni esa akɛ amɛfee lɛ amɛha. Ha ni efee faŋŋ akɛ osusumɔi lɛ damɔ Ŋmalɛi lɛ anɔ diɛŋtsɛ. Kɛ́ Ŋmalɛi lɛ ŋmɛɔ gbɛ ni ofee yiŋkpɛɛ ko kɛyashi he ko lɛ, no lɛ tsɔɔmɔ he ni esa akɛ ofee yiŋkpɛɛ lɛ kɛyashi. Kɛkɛ lɛ, yɛ onaamuu wiemɔ lɛ mli lɛ, okɛ wiemɔi ni baawo otoibolɔi lɛ hewalɛ ni amɛfee nii lɛ aha.

Kɛ ‘Wiemɔ Mli Heyeli.’ Bɔni afee ni owo mɛi krokomɛi ŋaa ni emɔ shi lɛ, esa akɛ oná ‘wiemɔ mli heyeli yɛ hemɔkɛyeli lɛ mli.’ (1 Tim. 3:13) Mɛni haa mɔ ko nyɛɔ ewieɔ yɛ heyeli mli? Anɔkwale ni eji akɛ ‘enitsumɔi kpakpai ahe okadi’ lɛ kɛ nɔ̃ hewalɛ ni ewoɔ enyɛmimɛi lɛ ni amɛfee lɛ kpãa gbee lɛ hewɔ. (Tito 2:6, 7; 1 Pet. 5:3) Kɛ́ eba lɛ nakai lɛ, mɛi ni awoɔ amɛ hewalɛ akɛ amɛfee nii lɛ naa akɛ mɔ ni woɔ amɛ hewalɛ lɛ kpaaa gbɛ akɛ amɛbaafee nɔ ko ni lɛ diɛŋtsɛ lɛ enyɛɛɛ efee. Amɛbaana akɛ amɛbaanyɛ amɛkase ehemɔkɛyeli lɛ taakɛ bɔ ni lɛ hu ebɔɔ mɔdɛŋ ni ekase Kristo lɛ.—1 Kor. 11:1; Fil. 3:17.

Ŋaawoo ni damɔ Nyɔŋmɔ Wiemɔ lɛ nɔ, ní akɛhaa yɛ suɔmɔ mli lɛ baanyɛ atsu nibii kpakpai babaoo. Esa akɛ mɛi ni akɛ gbɛnaa nii woɔ amɛdɛŋ koni amɛkɛ nakai ŋaawoo lɛ aha lɛ atsu he nii jogbaŋŋ.—Rom. 12:8.