Mɛni Ji Sane Kpakpa Lɛ?

1. Mɛni ji sane ni jɛ Nyɔŋmɔ ŋɔɔ lɛ?

Nyɔŋmɔ miisumɔ ni adesai kɛ miishɛɛ ahi shikpɔŋ lɛ nɔ. Ebɔ shikpɔŋ lɛ kɛ nɔ fɛɛ nɔ ni yɔɔ nɔ lɛ ejaakɛ esumɔɔ adesai. Etsɛŋ, ebaafee nibii ni baahã adesai ni yɔɔ he fɛɛ he lɛ aná shihilɛ kpakpa wɔsɛɛ. Ebaajie nibii ni hãa adesai piŋɔ lɛ fɛɛ.​—Kanemɔ Yeremia 29:11.

Nɔyeli ko nyɛko afo awuiyeli, hela, loo gbele sɛɛ. Shi sane kpakpa ko yɛ. Etsɛŋ, Nyɔŋmɔ kɛ lɛ diɛŋtsɛ enɔyeli baaye adesai anɔyelii fɛɛ najiaŋ. Enɔyeli lɛ shishi bii lɛ baaná toiŋjɔlɛ kɛ gbɔmɔtsoŋ hewalɛ kpakpa.​—Kanemɔ Yesaia 25:8; 33:24; Daniel 2:44.

2. Mɛni hewɔ sane kpakpa lɛ he hiaa waa ŋmɛnɛ lɛ?

Ja Nyɔŋmɔ ejie mɛi fɔji fɛɛ kɛje shikpɔŋ lɛ nɔ dani piŋmɔ sɛɛ baafo. (Zefania 2:3) Mɛɛ be ebaafee enɛ? Nyɔŋmɔ Wiemɔ lɛ gba naagbai ni adesai kɛkpeɔ amrɔ nɛɛ efɔ̃ shi. Nibii ni yaa nɔ amrɔ nɛɛ tsɔɔ akɛ be ni Nyɔŋmɔ baajie mɛi fɔji kɛje shikpɔŋ lɛ nɔ lɛ ebɛŋkɛ kpaakpa.​—Kanemɔ 2 Timoteo 3:1-5.

3. Mɛni esa akɛ wɔfee?

Esa akɛ wɔkase Nyɔŋmɔ he nii yɛ e-Wiemɔ ni ji Biblia lɛ mli. Biblia lɛ tamɔ wolo ni tsɛ ko ni yɔɔ suɔmɔ eŋma ebii. Etsɔɔ wɔ bɔ ni wɔbaafee wɔná shihilɛ kpakpa amrɔ nɛɛ, kɛ bɔ ni wɔbaafee wɔná naanɔ wala yɛ shikpɔŋ lɛ nɔ wɔsɛɛ. Eji anɔkwale akɛ, ekolɛ mɛi komɛi náŋ he miishɛɛ kɛ́ aaye aabua bo koni onu Biblia lɛ shishi. Shi shihilɛ kpakpa ni obaaná wɔsɛɛ lɛ jara wa aahu akɛ, esaaa ni ohãa mɔ ko tsĩɔ bo gbɛ koni okaná.​—Kanemɔ Abɛi 29:25; Kpojiemɔ 14:6, 7.