Mɛni Ji Nɔ Titri Ni Kɛ Miishɛɛ Baa Weku Shihilɛ Mli?

NƆ NI BIBLIA LƐ KƐƆ

“Mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!”​—Luka 11:28, Jeŋ Hee Shishitsɔɔmɔ.

BƆ NI OBAANYƐ ONÁ HE SƐƐ

Nyɛbaasumɔ nyɛhe waa.—Efesobii 5:28, 29.

Nyɛbaajie bulɛ kpo nyɛtsɔɔ nyɛhe.​—Efesobii 5:33.

Nyɛbaaye nyɛhe anɔkwa.​—Marko 10:6-9.

ANI WƆBAANYƐ WƆHE NƆ NI BIBLIA LƐ KƐƆ LƐ WƆYE LƐƐLƐŊ?

Hɛɛ, kɛ́ hooo lɛ yɛ yiŋtoi enyɔ ahewɔ:

• Nyɔŋmɔ ji mɔ ni to weku shihilɛ shishi. Biblia lɛ kɛɔ akɛ ‘weku fɛɛ weku ná egbɛ́i’ kɛjɛ Yehowa Nyɔŋmɔ ŋɔɔ. (Efesobii 3:14, 15) Kɛ́ wɔɔwie he yɛ gbɛ kroko nɔ lɛ, wekui yɛ shihilɛ mli ejaakɛ Yehowa ji mɔ ni to shishi. Mɛni hewɔ enɛ he hiaa waa lɛ?

  Susumɔ he okwɛ: Kɛ́ oye niyenii ko ni eŋɔɔ onaa waa ni ootao ole nibii ni akɛhoo lɛ, namɔ obaabi? Ekã shi faŋŋ akɛ obaabi mɔ ni hoo lɛ.

  Nakai nɔŋŋ kɛ́ obaale nibii ni hãa miishɛɛ baa weku shihilɛ mli lɛ, ebaahi jogbaŋŋ akɛ obaabi Yehowa ni ji mɔ ni to weku shihilɛ shishi lɛ.​—1 Mose 2:18-24.

• Nyɔŋmɔ susuɔ nyɛhe. Nilee yɛ mli akɛ wekui baatao Yehowa ŋaawoo ní etsɔɔ e-Wiemɔ lɛ nɔ ekɛhãa lɛ sɛɛ gbɛ. Mɛni hewɔ? “Ejaakɛ ejwɛŋɔ nyɛhe.” (1 Petro 5:6, 7) Nyɛhilɛkɛhamɔ kã Yehowa tsui nɔ waa​—ni eŋaawoo he yɛ sɛɛnamɔ kɛhã nyɛ be fɛɛ be!​—Abɛi 3:5, 6; Yesaia 48:17, 18.