NIKASEMƆ 3
Rahab He Yehowa Eye
Ha wɔfee wɔhe tamɔ nɔ ni wɔyɛ Yeriko maŋ lɛ mli. Maŋ nɛɛ yɛ Kanaan shikpɔŋ lɛ nɔ, ni mɛi ni yɔɔ jɛmɛ lɛ heee Yehowa amɛyeee. Yoo ko yɛ maŋ nɛɛ mli ni atsɛɔ lɛ Rahab.
Beni Rahab ji oblayoo fioo lɛ, enu bɔ ni Mose gba Ŋshɔ Tsuru lɛ mli ni enyiɛ Israelbii lɛ ahiɛ kɛshi Mizraim lɛ he. Agbɛnɛ hu, enu bɔ ni Yehowa ye ebua Israelbii lɛ ni amɛye amɛhenyɛlɔi lɛ anɔ kunim lɛ he. Bianɛ lɛ, enu akɛ Israelbii lɛ ebahi shi fioo yɛ he ko ni bɛŋkɛ Yeriko!
Rahab bu saralɔi lɛ ahe ejaakɛ ehe Yehowa eye
Be ko beni je ena lɛ, Israelbii enyɔ tee amɛyasara Yeriko maŋ lɛ. Amɛba Rahab shĩa lɛ. Ehere amɛ ni eha amɛbahi eshĩa lɛ mli. Nyɔɔŋ lɛ mli lɛ, Yeriko maŋtsɛ lɛ ná ele akɛ saralɔi komɛi eba maŋ lɛ mli ni amɛyato Rahab shĩa lɛ. No hewɔ lɛ, maŋtsɛ lɛ tsu ni ayamɔ amɛ kɛba. Rahab tsu lɛ yiteŋ yɛ tɛtrɛɛ, no hewɔ lɛ ekɛ saralɔi enyɔ lɛ yato jɛmɛ. Beni maŋtsɛ lɛ tsuji lɛ ba lɛ, ekɛɛ amɛ akɛ: ‘Saralɔi lɛ ba biɛ moŋ, shi amɛshi maŋ lɛ mli momo. Kɛ́ nyɛtiu amɛ bianɛ nɔŋŋ lɛ, ekolɛ nyɛbaamɔ amɛ!’ Ani ole nɔ hewɔ ni Rahab buɔ saralɔi lɛ ahe lɛ?— Nɔ hewɔ ji akɛ, eheɔ Yehowa eyeɔ ni ele akɛ Yehowa kɛ Kanaan shikpɔŋ lɛ baaha Israelbii lɛ.
Dani saralɔi lɛ baashi Rahab shĩa lɛ, amɛwo lɛ shi akɛ abaabaa lɛ kɛ eweku lɛ fɛɛ yi kɛ́ aakpata Yeriko maŋ lɛ hiɛ lɛ. Ole nɔ ni amɛkɛɛ lɛ akɛ efee?— Amɛkɛɛ lɛ akɛ: ‘Okɛ kpaa tsuru nɛɛ afi osamfɛlɛ lɛ naa. Kɛ́ ofee nakai lɛ, abaabaa mɔ fɛɛ mɔ ni yɔɔ oshĩa lɛ mli lɛ yi.’ Rahab fee nɔ ni saralɔi lɛ kɛɛ lɛ akɛ efee lɛ pɛpɛɛpɛ. No sɛɛ lɛ ole nɔ ni ba?—
Yehowa baa Rahab kɛ eweku lɛ yi
Gbii fioo komɛi asɛɛ lɛ, Israelbii lɛ nyiɛ kɛbɔle Yeriko maŋ lɛ he, shi amɛteŋ mɔ ko mɔ ko ewieee. Daa gbi lɛ, amɛbɔleɔ maŋ lɛ he shi kome, ni amɛfee nakai gbii ekpaa. Shi gbi ni ji gbi kpawo lɛ nɔ lɛ, amɛbɔle maŋ lɛ shii kpawo. Kɛkɛ ni amɛ fɛɛ amɛbo waa. Yehowa ha Yeriko gbogboi lɛ fɛɛ kumɔ eshwie shi. Shi tsũ ni kpaa tsuru lɛ tsotsoro esamfɛlɛ lɛ naa lɛ kumɔɔ! Bɛ oona nakai tsu lɛ yɛ mfoniri lɛ mli?— Abaa Rahab kɛ eweku lɛ yi!
Mɛni okaseɔ kɛjɛɔ Rahab sane lɛ mli?— Rahab he Yehowa eye, ejaakɛ ekase Yehowa naakpɛɛ nifeemɔi lɛ ahe nii. Bo hu ookase Yehowa naakpɛɛ nifeemɔi babaoo ahe nii. Ani oheɔ lɛ oyeɔ tamɔ bɔ ni Rahab he lɛ eye lɛ?— Wɔle akɛ oheɔ lɛ oyeɔ!