NIKASEMƆ 5
Samuel Tee nɔ Efee Nɔ ni Ja
Samuel hi kpee-buu lɛ mli ni esɔmɔ yɛ jɛmɛ kɛjɛ egbekɛbiiashi. Ni jɛmɛ ji he ni mɛi baa amɛbajaa Yehowa yɛ. Ole bɔ ni fee ni Samuel yahi kpee-buu lɛ mli? Dani wɔbaaha sanebimɔ nɛɛ hetoo lɛ, ha wɔkase Samuel mami ni atsɛɔ lɛ Hana lɛ he nii.
Hana tao bi aahu shi enaaa eko. No hewɔ lɛ esɔle ekpa Yehowa fai koni ewa lɛ. Ewo Yehowa shi akɛ kɛ́ efɔ binuu lɛ, ebaaha eyahi kpee-buu lɛ mli ni esɔmɔ lɛ. Yehowa bo esɔlemɔ lɛ toi ni eha efɔ binuu. Ewo lɛ gbɛ́i akɛ Samuel. Ni tamɔ bɔ ni Hana wo Yehowa shi lɛ, beni Samuel eye afii etɛ loo ejwɛ lɛ ekɛ lɛ tee kpee-buu lɛ mli koni eyasɔmɔ yɛ jɛmɛ.
Eli ji osɔfonukpa yɛ kpee-buu lɛ mli. Ebihii enyɔ hu tsu nii yɛ jɛmɛ. Kaimɔ akɛ kpee-buu lɛ ji he ni ajaa Nyɔŋmɔ yɛ, no hewɔ lɛ esa akɛ mɛi afee nibii kpakpai yɛ jɛmɛ. Shi Eli bihii lɛ fee nibii gbohii. Samuel na nibii ni amɛfeɔ lɛ. Ani Samuel fee nibii gbohii ni Eli bihii lɛ fee lɛ eko?— Dabi, etee nɔ efee nɔ ni ja tamɔ bɔ ni emami kɛ epapa etsɔɔ lɛ akɛ efee lɛ pɛpɛɛpɛ.
Kulɛ mɛni osusuɔ akɛ esa ni Eli afee ebihii enyɔ lɛ?— Kulɛ esa akɛ egbala amɛtoi, ni ekaha amɛtsu nii yɛ Nyɔŋmɔ shĩa lɛ mli dɔŋŋ. Shi Eli efeee nakai, no hewɔ lɛ Yehowa mli fu lɛ kɛ ebihii enyɔ lɛ. Yehowa kpɛ eyiŋ akɛ ebaagbala amɛtoi.
Samuel kɛɛ Eli nɔ ni Yehowa kɛɛ ekɛɛ lɛ lɛ
Gbi ko gbɛkɛ beni Samuel ewɔ lɛ, enu ni mɔ ko miitsɛ lɛ: ‘Samuel!’ Ni ejo foi kɛtee Eli ŋɔɔ, shi Eli kɛɛ lɛ akɛ: ‘Mitsɛko bo.’ Enɛ tee nɔ shii etɛ. Yɛ nɔ ni ji shii etɛ lɛ nɔ lɛ, Eli kɛɛ Samuel akɛ kɛ́ enu gbee lɛ ekoŋŋ lɛ, ekɛɛ akɛ: ‘Yehowa, ofainɛ wiemɔ; miibo toi.’ Samuel fee bɔ ni akɛɛ efee lɛ. Kɛkɛ ni Yehowa kɛɛ Samuel akɛ: ‘Kɛɛmɔ Eli akɛ magbala eweku lɛ toi yɛ nibii gbohii ni amɛfee lɛ hewɔ.’ Onaaa akɛ ebaawa waa kɛha Samuel akɛ ebaakɛɛ Eli sane nɛɛ?— Hɛɛ, ebaawa waa. Eyɛ mli akɛ Samuel she gbeyei moŋ, shi efee nɔ ni Yehowa kɛɛ lɛ akɛ efee lɛ. Nɔ ni Yehowa kɛɛ lɛ ba mli. Agbe Eli bihii enyɔ lɛ, ni Eli diɛŋtsɛ hu gbo.
Samuel fee nɔkwɛmɔnɔ kpakpa eha wɔ. Eyɛ mli akɛ ena ni mɛi krokomɛi miifee nibii gbohii moŋ, shi efee nɔ ni ja. Ni bo hu? Ani obaaya nɔ ofee nɔ ni ja tamɔ bɔ ni Samuel fee lɛ? Kɛ́ ofee nakai lɛ, obaaha Yehowa kɛ ofɔlɔi aná miishɛɛ.