Hã Nyɔŋmɔ Awa Bo ni Miishɛɛ Ahi Ogbãla lɛ Mli

Yehowaa Nyɔŋmɔ ji mɔ ni to klɛŋklɛŋ gbalashihilɛ lɛ shishi. Biblia lɛ kɛɔ wɔ akɛ ebɔ klɛŋklɛŋ yoo lɛ ni “ekɛ lɛ ba Adam ŋɔɔ.” Adam ná miishɛɛ aahu akɛ ekɛɛ: “Agbɛnɛ enɛ ji wu ni jɛ miwui lɛ amli kɛ loo ni jɛ miheloo lɛ mli.” (1 Mose 2:22, 23) Ŋmɛnɛ hu lɛ, Yehowa miisumɔ ni mɛi ni ebote gbalashihilɛ mli lɛ aná miishɛɛ.

Kɛ́ oyaabote gbalashihilɛ mli lɛ, ekolɛ obaasusu akɛ nɔ fɛɛ nɔ baaya nɔ jogbaŋŋ. Shi anɔkwa sane ji akɛ, wu kɛ ŋa ni sumɔɔ amɛhe jogbaŋŋ lɛ po kɛ naagbai komɛi kpeɔ. (1 Korintobii 7:28) Obaana Biblia mli shishitoo mlai yɛ wolo nɛɛ mli, ni kɛ́ okɛtsu nii lɛ, ebaahã miishɛɛ ahi ogbalashihilɛ kɛ oweku lɛ mli.​—Lala 19:9-12.

1 TSU GBƐNAA NI YEHOWA KƐHÃ BO LƐ HE NII

NƆ NI BIBLIA LƐ KƐƆ: Wu lɛ ji weku lɛ yitso.​—Efesobii 5:23.

Kɛ́ wu ji bo lɛ, Yehowa miikpa gbɛ akɛ odɔ oŋa lɛ he jogbaŋŋ. (1 Petro 3:7) Ebɔ lɛ akɛ hefatalɔ ni sa bo, ni eesumɔ ni okɛ woo ahã lɛ, ni osumɔ lɛ. (1 Mose 2:18) Esa akɛ osumɔ oŋa lɛ jogbaŋŋ aahu akɛ okɛ ehiamɔ nii baaye onɔ lɛ hiɛ.​—Efesobii 5:25-29.

Kɛ́ ŋa ji bo lɛ, Yehowa miikpa gbɛ akɛ obu owu lɛ jogbaŋŋ ni oye obua lɛ ni etsu egbɛnaa lɛ he nii. (1 Korintobii 11:3; Efesobii 5:33) Kɛ́ ekpɛ yiŋ lɛ, fi sɛɛ, ni ojɛ otsui muu fɛɛ mli oye obua lɛ kɛtsu yiŋkpɛɛ lɛ he nii. (Kolosebii 3:18) Kɛ́ ofee nakai lɛ, ohiɛ baaba nyam jogbaŋŋ yɛ owu lɛ kɛ Yehowa fɛɛ hiɛ.​—1 Petro 3:1-6.

NƆ NI OBAANYƐ OFEE:

• Bi ohefatalɔ lɛ ni etsɔɔ bo bɔ ni ooofee otsɔ wu loo ŋa kpakpa fe tsutsu lɛ. Bo nɔ ni ebaakɛɛ bo lɛ toi jogbaŋŋ, ni ofee bɔ fɛɛ bɔ ni ooonyɛ kɛfee tsakemɔi ni sa

• Too otsui shi. Ebaahé be dani obaale bɔ ni ooofee ohã ená miishɛɛ, ni nakai nɔŋŋ eji yɛ lɛ hu egbɛfaŋ

2 SUSUMƆ BƆ NI OHEFATALƆ LƐ NUƆ NII AHE LƐ HE JOGBAŊŊ

NƆ NI BIBLIA LƐ KƐƆ: Esa akɛ ofó ohefatalɔ lɛ nɔ mli. (Filipibii 2:3, 4) Hiɛmɔ ohefatalɔ lɛ akɛ nɔ ko ni jara wa, ni ohiɛ akakpa nɔ akɛ Yehowa biɔ ni etsuji ‘amli ajɔ ahã mɛi fɛɛ.’ (2 Timoteo 2:24) “Mɔ ko yɛ ni wieɔ bambam, tamɔ adumɔɔ klante; shi nilelɔ lilɛi tsáa mɔ.” No hewɔ lɛ, kwɛmɔ owiemɔ jogbaŋŋ. (Abɛi 12:18) Yehowa mumɔ lɛ baaye abua bo ni ojɛ mlihilɛ kɛ suɔmɔ mli owie.​—Galatabii 5:22, 23; Kolosebii 4:6.

NƆ NI OBAANYƐ OFEE:

• Dani okɛ ohefatalɔ lɛ baasusu sane ko ni yɔɔ hiɛdɔɔ he lɛ, sɔlemɔ ni Nyɔŋmɔ aye abua bo koni otsui nɔ akawo ní okasha ohe okojo

• Susumɔ nɔ ni obaawie kɛ bɔ ni obaawie lɛ ohã lɛ he jogbaŋŋ

3 NYƐJWƐŊA JWƐŊMƆ KOME

NƆ NI BIBLIA LƐ KƐƆ: Kɛ́ obote gbalashihilɛ mli lɛ, okɛ ohefatalɔ lɛ etsɔ “heloo kome.” (Mateo 19:5) Shi nyɛkã he nyɛji gbɔmɛi srɔtoi enyɔ, ni esoro bɔ ni nyɛteŋ mɔ fɛɛ mɔ susuɔ nii ahe ehãa. No hewɔ lɛ, esa akɛ nyɛkase bɔ ni nyɛbaafee nyɛhã nyɛjwɛŋmɔ kɛ bɔ ni nyɛnuɔ nii ahe nyɛhãa lɛ afee ekome. (Filipibii 2:2) Kɛ́ nyɛmiikpɛ yiŋ lɛ, ehe miihia waa ni nyɛfee ekome. Biblia lɛ kɛɔ akɛ: “Yiŋtoo yɔɔ nɛɛ, ŋaawoo [loo ajinatoo] hãa edamɔɔ shi.” (Abɛi 20:18) Be mli ni nyɛfeɔ ekome kɛkpɛɔ yiŋ komɛi ni he hiaa lɛ, nyɛhãa Biblia mli shishitoo mlai atsɔa nyɛ gbɛ.​—Abɛi 8:32, 33.

NƆ NI OBAANYƐ OFEE:

• Jeee saji loo osusumɔi pɛ sa akɛ ohã ohefatalɔ lɛ ale, shi moŋ esa akɛ ohã ele bɔ ni onuɔ he ohãa hu

• Dani ooowo shi yɛ nɔ ko he lɛ, okɛ ohefatalɔ lɛ asusu he dã