Bɔ ni Ahiɛɔ Shika Ahãa

Kɛ́ wɔbɛ shika lɛ, wɔnyɛŋ wɔhã wɔwekui aná amɛhiamɔ nii. (Abɛi 30:8) Yɛ anɔkwale mli lɛ, ‘shika tamɔ hɔɔŋ.’ (Jajelɔ 7:12) Ekolɛ ebaawa kɛhã nyɛ akɛ nyɛbaagba shika he sane akɛ wu kɛ ŋa, shi nyɛkahãa shika kɛ naagbai baa nyɛgbalashihilɛ lɛ mli. (Efesobii 4:32) Esa akɛ ohe ohefatalɔ lɛ oye ni lɛ hu ehe bo eye, ni nyɛfee ekome kɛkpɛ yiŋ yɛ nibii ni nyɛkɛ nyɛshika baafee lɛ he.

1 NYƐKPAŊA JOGBAŊŊ

NƆ NI BIBLIA LƐ KƐƆ: “Nyɛteŋ namɔ ni kɛji eetao mɔ̃ɔ emã lɛ ni etaŋ shi, ní ebu naa ekwɛ dã akɛ eyɛ nii bɔ ni aaashɛ naagbee lo?” (Luka 14:28) Ehe miihia ni nyɛfee ekome kɛkpaŋ yɛ nibii ni nyɛkɛ nyɛshika baafee lɛ he. (Amos 3:3) Nyɛkpɛa yiŋ yɛ nibii ni esa akɛ nyɛhé kɛ shika abɔ ni nyɛbaanyɛ nyɛkɛhé lɛ he. (Abɛi 31:16) Kɛ́ nyɛyɛ shika ni nyɛbaanyɛ nyɛkɛhé nɔ ko lɛ, no etsɔɔɔ doo akɛ nyɛhé. Nyɛkwɛa ni nyɛkahiɛa nyɔmɔ. Shika abɔ ni nyɛyɔɔ lɛ, no kɛkɛ nyɛyea.​—Abɛi 21:5; 22:7.

NƆ NI NYƐBAANYƐ NYƐFEE:

• Kɛ́ nyɔɔŋ gbo ni nyɛshika lɛ eko shwɛ lɛ, nyɛfea ekome kɛkpɛa yiŋ yɛ nɔ ni nyɛkɛbaafee lɛ he

• Kɛ́ nyɛfite shika fe bɔ ni nyɛkpaŋ lɛ, nyɛkpɛa yiŋ yɛ nibii pɔtɛi ni nyɛbaafee koni nyɛkafite shika fe bɔ ni nyɛkpaŋ lɛ he. Akɛ nɔkwɛmɔnɔ lɛ, nyɛbaanyɛ nyɛhoo nyɛ diɛŋtsɛ nyɛniyenii moŋ fe nɔ ni nyɛbaayahe agbo naa niyenii nyɛye

2 NYƐWIEA ANƆKWALE NI NYƐKAFEA KPƐŊŊ

NƆ NI BIBLIA LƐ KƐƆ: “Wɔkɛ anɔkwayeli tsuɔ nɔ fɛɛ nɔ he nii, jeee yɛ Yehowa hiɛ kɛkɛ, shi moŋ yɛ gbɔmɛi ahiɛ hu.” (2 Korintobii 8:21, NW) Hã ohefatalɔ lɛ ale shika abɔ ni onáa kɛ abɔ ni ofiteɔ, ni kaashiu lɛ sane nɔ.

Be fɛɛ be lɛ, okɛ ohefatalɔ lɛ asusu nii ahe dani okpɛ yiŋ yɛ nɔ ko ni he hiaa waa ni okɛ shika baafee lɛ he. (Abɛi 13:10) Kɛ́ nyɛgbaa shika he sane lɛ, no baaye abua koni toiŋjɔlɛ ahi nyɛgbalashihilɛ lɛ mli. Buu shika ni onáa lɛ akɛ weku lɛ shika, shi jeee bo pɛ onɔ.​—1 Timoteo 5:8.

NƆ NI NYƐBAANYƐ NYƐFEE:

• Nyɛkpaŋa yɛ shika abɔ ni nyɛteŋ mɔ fɛɛ mɔ baanyɛ afite ni ehe ehiaaa ni nyɛgba he sane dã lɛ he

• Nyɛkamɛa ni naagba ko baa dani nyɛgba shika he sane