Bɔ ni Nyɛaafee Nyɛtsɔse Nyɛbi Lɛ

Be ni Yehowa to weku shihilɛ shishi lɛ, etu bii ewo fɔlɔi adɛŋ. (Kolosebii 3:20) Akɛ fɔlɔ lɛ, eji osɔ̃ akɛ otsɔse obi lɛ ni esumɔ Yehowa ni ebatsɔ onukpa kpakpa. (2 Timoteo 1:5; 3:15) Kɛfata he lɛ, esa akɛ ole nɔ ni yɔɔ obi lɛ tsui mli. Anɔkwa, nɔkwɛmɔnɔ kpakpa ni ooofee lɛ hu he miihia waa. Kɛ́ ohã Yehowa Wiemɔ lɛ hi bo diɛŋtsɛ otsui mli tsutsu lɛ, no dani obaanyɛ okɛtsɔɔ obi lɛ nii jogbaŋŋ.​—Lala 40:9.

1 HÃ EFEE MLƐO EHÃ OBII LƐ AKƐ AMƐKƐ BO AAAGBA SANE

NƆ NI BIBLIA LƐ KƐƆ: ‘Ohe afee oya kɛ ninumɔ, ohumi shi kɛ wiemɔ.’ (Yakobo 1:19) Esa akɛ ohã obii lɛ anu he akɛ amɛbaanyɛ amɛkɛ bo agba sane fɛɛ sane ni kã amɛtsui nɔ. Esa akɛ amɛle akɛ, be fɛɛ be ni ehe baahia ni amɛkɛ bo agba nɔ ko he sane lɛ, ofee klalo akɛ obaabo amɛ toi. Hã toiŋjɔlɛ ahi weku lɛ mli, koni efee mlɛo kɛhã amɛ akɛ amɛkɛ bo aaagba sane. (Yakobo 3:18) Kɛ́ amɛná jwɛŋmɔ lɛ akɛ obaawie amɛhiɛ loo obaasha ohe okojo amɛ lɛ, amɛkɛ saji komɛi baatee bo. Too otsui shi ohã obii lɛ, ni be fɛɛ be lɛ, hã amɛle akɛ osumɔɔ amɛ.​—Mateo 3:17; 1 Korintobii 8:1.

NƆ NI OBAANYƐ OFEE:

• Kɛ́ obii lɛ miitao amɛkɛɛ bo nɔ ko lɛ, ná dekã ohã amɛ

• Okɛ obii lɛ afɔ sanegbaa, jeee be ni naagba ko eba pɛ

2 YƆSEMƆ NƆ TUUNTU NI AMƐTAOƆ AMƐKƐƐ LƐ

NƆ NI BIBLIA LƐ KƐƆ: “Mɔ ni jwɛŋɔ wiemɔ nɔ lɛ, aaahi ahã lɛ.” (Abɛi 16:20) Bei komɛi lɛ, esaaa akɛ okwɛɔ wiemɔi ni obii lɛ kɛbaatsu nii lɛ kɛkɛ ni okɛmu sane naa. Kɛ́ gbekɛbii miiwie lɛ, amɛwoɔ sane he loo amɛwieɔ wiemɔi ni jeee nakai amɛnuɔ he lɛɛlɛŋ. “Mɔ ni nuuu sane dani ehereɔ nɔ lɛ, eji buulufeemɔ.” (Abɛi 18:13) Omli akafu mra.​—Abɛi 19:11.

NƆ NI OBAANYƐ OFEE:

• Tswaa ofai shi akɛ ekɔɔɔ he eko nɔ ni obii lɛ baawie lɛ, ofolɔŋ amɛwiemɔ mli, ni omli fuŋ amɛ hu

• Bɔɔ mɔdɛŋ ni okai bɔ ni onu he ohã be ni otamɔ amɛ lɛ kɛ nibii ni obu akɛ nomɛi he hiaa waa yɛ nakai beaŋ lɛ

3 NYƐNAABU AFEA EKOME

NƆ NI BIBLIA LƐ KƐƆ: “Mibi, bo otsɛ tsɔsemɔ lɛ toi, ni kaashɛ onyɛ mla lɛ ofɔ!” (Abɛi 1:8) Yehowa etu bii lɛ ewo tsɛ lɛ kɛ nyɛ lɛ fɛɛ dɛŋ. Esa akɛ nyɛtsɔse nyɛbii lɛ ni amɛbu nyɛ, ni amɛbo nyɛ toi hu. (Efesobii 6:1-3) Kɛ́ fɔlɔi lɛ ‘ajwɛŋmɔ efeko ekome’ lɛ, bii lɛ naa. (1 Korintobii 1:10) Nyɛkataa saji anaa yɛ nyɛbii lɛ ahiɛ, ejaakɛ no baanyɛ ahã bulɛ ni amɛyɔɔ kɛhã nyɛ akɛ amɛfɔlɔi lɛ nɔ agbɔ.

NƆ NI OBAANYƐ OFEE:

• Nyɛsusua bɔ ni nyɛbaafee nyɛtsɔse nyɛbii lɛ he, ni nyɛba gbeekpamɔ yɛ he

• Kɛ́ okɛ ohefatalɔ lɛ kpãaa gbee yɛ bɔ ni esa akɛ nyɛtsɔse nyɛbii lɛ nyɛhã lɛ he lɛ, bɔɔ mɔdɛŋ ni onu bɔ ni esusuɔ nii ahe ehãa lɛ shishi

4 NYƐTSƆA HIƐ NYƐTOA GBƐJIANƆ

NƆ NI BIBLIA LƐ KƐƆ: “Tsɔɔmɔ gbekɛ gbɛ ni sa akɛ etsɔ nɔ.” (Abɛi 22:6) Ja nyɛbɔ nyɛhe mɔdɛŋ dani nyɛbaaye omanye yɛ nyɛbii lɛ atsɔsemɔ mli. Esa akɛ nyɛtsɔ hiɛ nyɛto gbɛjianɔ yɛ bɔ ni nyɛbaatsɔse nyɛbii lɛ nyɛhã lɛ he. (Lala 127:4; Abɛi 29:17) Jeee toigbalamɔ pɛ ji tsɔsemɔ; esa akɛ oye obua obii lɛ ni amɛnu nɔ hewɔ ni owo mlai komɛi lɛ ashishi. (Lala 119:27) Tsɔɔmɔ amɛ ni amɛsumɔ Yehowa Wiemɔ lɛ hu, ni amɛnu shishitoo mlai ni yɔɔ mli lɛ ashishi. (Lala 1:2) Enɛ baaye abua amɛ ni amɛná henilee kpakpa.​—Hebribii 5:14.

NƆ NI OBAANYƐ OFEE:

• Wa obii lɛ ni amɛna akɛ Nyɔŋmɔ ji mɔ ni yɔɔ diɛŋtsɛ ní amɛbaanyɛ amɛkɛ amɛhiɛ afɔ̃ enɔ

• Wa amɛ ni amɛle bɔ ni amɛaafee amɛna nibii ni baafite amɛjeŋba (tamɔ Intanɛt lɛ nɔ nibii komɛi nɛkɛ) ni amɛtsi amɛhe kɛjɛ he. Hã amɛle bɔ ni amɛaafee amɛkwɛ amɛhe nɔ jogbaŋŋ yɛ mɛi ni baasumɔ ni amɛkɛ amɛ aná bɔlɛ lɛ ahe