Nyɛfea Ekome Kɛjáa Yehowa

Wolo nɛɛ ehã ona akɛ shishitoo mlai babaoo ni baanyɛ aye abua bo kɛ oweku lɛ yɛ Biblia lɛ mli. Yehowa miisumɔ ni oná miishɛɛ. Ewo shi akɛ kɛ́ okɛ ejamɔ ye klɛŋklɛŋ gbɛhe lɛ, ‘ekɛ nii nɛɛ fɛɛ aaafata he ahã bo.’ (Mateo 6:33) Anɔkwa, eesumɔ ni ekɛ bo abɔ naanyo. Feemɔ bɔ fɛɛ bɔ ni ooonyɛ kɛwaje naanyobɔɔ ni kã okɛ Nyɔŋmɔ teŋ lɛ. Nɔ ko bɛ ni jara wa fe naanyobɔɔ ni kã okɛ Nyɔŋmɔ teŋ lɛ.​—Mateo 22:37, 38.

1 WAJEMƆ WEKUKPAA NI KÃ OKƐ YEHOWA TEŊ LƐ

NƆ NI BIBLIA LƐ KƐƆ: “Matsɔ nyɛtsɛ, ni nyɛ hu nyɛaatsɔmɔ mibihii kɛ mibiyei, bɔ ni Yehowa, Ofe lɛ, kɛɛ nɛ.” (2 Korintobii 6:18) Nyɔŋmɔ miisumɔ ni otsɔ enaanyo jurɔ. Nɔ kome ni baaye abua bo ni otsɔ enaanyo jurɔ ji sɔlemɔ. Yehowa kɛɛ ‘osɔle ni okafɔ̃ɔ.’ (1 Tesalonikabii 5:17) Eesumɔ ni ebo otsuiŋ susumɔi kɛ onaagbai lɛ atoi. (Filipibii 4:6) Kɛ́ okɛ oweku lɛ fee ekome kɛsɔle lɛ, amɛbaana akɛ oheɔ Nyɔŋmɔ nɔ oyeɔ lɛɛlɛŋ.

Kɛfata sɔlemɔ ni ooosɔle ohã Nyɔŋmɔ lɛ he lɛ, esa akɛ obo lɛ toi hu. Kɛ́ okase Biblia lɛ kɛ woji ni Yehowa Odasefoi feɔ lɛ, no baatsɔɔ akɛ oobo Nyɔŋmɔ toi. (Lala 1:1, 2) Jwɛŋmɔ nibii ni okaseɔ lɛ anɔ. (Lala 77:12, 13) Nɔ kroko ni baatsɔɔ akɛ oobo Nyɔŋmɔ toi ji Yehowa Odasefoi akpeei ni obaaya daa.​—Lala 122:1-4.

Gbɛ kroko ni he hiaa waa ni obaanyɛ otsɔ nɔ owaje naanyobɔɔ ni kã okɛ Yehowa teŋ lɛ ji, ni okɛ mɛi krokomɛi baagba ehe sane. Babaoo ni ofeɔ enɛ lɛ, babaoo ni obaanu he akɛ Yehowa ji onaanyo jurɔ.​—Mateo 28:19, 20.

NƆ NI OBAANYƐ OFEE:

• Too be ni okɛkane Biblia lɛ ni osɔle daa gbi

• Akɛ weku lɛ, nyɛhãa nibii ni nyɛfeɔ kɛjáa Nyɔŋmɔ lɛ ahe ahiaa nyɛ fe hiɛtserɛjiemɔ

2 HÃ OWEKU JAMƆ LƐ AFEE NƆ NI YƆƆ MIISHƐƐ

NƆ NI BIBLIA LƐ KƐƆ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:8) Esa akɛ nyɛto be ko yɛ otsi lɛ mli ni nyɛkɛbaafee weku jamɔ, ni esaaa akɛ nyɛfolɔɔ mli. (1 Mose 18:19) Shi no pɛ kɛkɛ faaa. Esa akɛ nyɛjá Nyɔŋmɔ daa gbi. Nyɛgbaa Nyɔŋmɔ he sane ‘be ni nyɛta shi yɛ shĩa kɛ be ni nyɛnyiɛ gbɛ teŋ kɛ be ni nyɛkã shi kɛ be ni nyɛte shi,’ koni nyɛkɛwaje naanyobɔɔ ni kã nyɛweku lɛ kɛ Nyɔŋmɔ teŋ lɛ. (5 Mose 6:6, 7) Tswaa ofai shi akɛ obaakase Yoshua, mɔ ni kɛɛ akɛ, “Mi lɛ, mikɛ miwe lɛ, wɔɔsɔmɔ Yehowa!” lɛ.​—Yoshua 24:15.

NƆ NI OBAANYƐ OFEE:

• Susumɔ oweku lɛ mli bii lɛ ateŋ mɔ fɛɛ mɔ he, ni oto weku jamɔ ni mɔɔ shi he gbɛjianɔ ni amɛteŋ mɔ fɛɛ mɔ baaná he sɛɛ