Yesu Tsu Nitsumɔi Wuji yɛ Kapernaum

Yesu fɔ̃ ekaselɔi ejwɛ​—Petro, Andrea, Yakobo, kɛ Yohane​—nine koni amɛbatsɔmɔ wolɛi ni baahɛ gbɔmɛi. Agbɛnɛ, yɛ Hejɔɔmɔ Gbi lɛ nɔ lɛ, amɛ fɛɛ amɛtee kpeehe ko yɛ Kapernaum. Yesu tsɔɔ nii yɛ kpeehe lɛ, ni shi kome ekoŋŋ lɛ, mɛi lɛ ahe jɔ̃ amɛhe yɛ gbɛ ni etsɔ nɔ etsɔɔ nii lɛ hewɔ. Etsɔɔ amɛ nii akɛ mɔ ni yɔɔ hegbɛ, shi jeee tamɔ woloŋmalɔi lɛ.

Yɛ Hejɔɔmɔ Gbi nɛɛ nɔ lɛ, nuu ko ni yɔɔ daimonio ba jɛmɛ. Nuu lɛ bo waa yɛ kpeehe lɛ ekɛɛ: “Mɛni wɔkɛ bo yɔɔ feemɔ, Yesu, Nazarenyo? Oba wɔhiɛkpatamɔ? Mile mɔ tuuntu ni ji bo, Mɔ Krɔŋkrɔŋ ni jɛ Nyɔŋmɔ ŋɔɔ lɛ!” Yesu kã daimonio ni náa nuu lɛ nɔ hewalɛ lɛ hiɛ ekɛɛ: “Feemɔ diŋŋ, ni oje emli!”​—Marko 1:24, 25.

Kɛkɛ ni mumɔ fɔŋ lɛ tsi nuu lɛ etswa shi ni ablami sha lɛ, ni mumɔ fɔŋ lɛ bo kɛ gbee ni wa. Shi daimonio lɛ je nuu lɛ mli ní “eyeee lɛ awui ko.” (Luka 4:35) Mɛi ni yɔɔ kpeehe lɛ anaa kpɛ amɛhe waa! Amɛbi akɛ: “Mɛni nɛ?” Ni amɛkɛfata he akɛ: “Ekɛ hewalɛ fãa mumɔi ni he tseee po ayi, ni amɛboɔ lɛ toi.” (Marko 1:27) Ebɛ naakpɛɛ akɛ sane nɛɛ gbɛ shwã Galilea fɛɛ.

Be ni Yesu kɛ ekaselɔi lɛ shi kpeehe lɛ, amɛtee Simon, ni atsɛɔ lɛ Petro hu lɛ shĩa. Amɛyanina Petro shaayoo ní atridii ni naa wa emɔ lɛ. Amɛkpa Yesu fai koni eye ebua lɛ. No hewɔ lɛ, Yesu tsi bɛŋkɛ yoo lɛ, emɔ enine mli, ni ewó enɔ edamɔ shi. Amrɔ nɔŋŋ lɛ ehe wa lɛ, ni ebɔi Yesu kɛ kaselɔi lɛ sɔɔmɔ​—eeenyɛ efee akɛ, ehoo nii ehã amɛ.

Aaafee hulushinyɔɔ mli lɛ, mɛi jɛ maŋ lɛ mli hei srɔtoi fɛɛ amɛkɛ helatsɛmɛi ba Petro shĩa lɛ. Amrɔ nɔŋŋ lɛ, efee tamɔ nɔ ni maŋ muu lɛ fɛɛ ebabua amɛhe naa yɛ shinaa lɛ naa. Mɛni hewɔ? Amɛmiitao atsa amɛ. Anɔkwa, “mɛi fɛɛ ni yɔɔ mɛi ni miiye helai srɔtoi lɛ kɛ amɛ ba eŋɔɔ. Ni ekɛ eniji ŋmɛlɛ amɛteŋ mɔ fɛɛ mɔ nɔ, ni etsa amɛ.” (Luka 4:40) Hɛɛ, ekɔɔɔ he eko helai srɔtoi ni amɛkɛba lɛ, eye ebua amɛ, taakɛ agba lɛ. (Yesaia 53:4) Ehã mɛi ni yɔɔ daimonioi lɛ po ahe jɔ amɛ. Kɛ́ mumɔi fɔji lɛ miije amɛmli lɛ, mumɔi fɔji lɛ bolɔɔ amɛkɛɔ akɛ: “Bo ji Nyɔŋmɔ Bi lɛ.” (Luka 4:41) Shi Yesu kãa amɛhiɛ, ni eŋmɛɛɛ amɛ gbɛ ní amɛtsa wiemɔ lɛ nɔ. Amɛle akɛ Yesu ji Kristo lɛ, ni Yesu sumɔɔɔ ni amɛfeɔ amɛnii tamɔ amɛjáa anɔkwa Nyɔŋmɔ lɛ.