Ato Wɔhe Gbɛjianɔ Koni Wɔfee Yehowa Suɔmɔnaa Nii

YƐ JEŊ fɛɛ lɛ, ayɛ jamɔ kui, maŋkwramɔ kui, jarayeli kui, kɛ naanyobɔɔ kui srɔtoi, ni esoro bɔ ni kui nɛɛ ateŋ eko fɛɛ eko feɔ enii ehãa, otii ni mamɔ eko fɛɛ eko hiɛ, bɔ ni eko fɛɛ eko susuɔ nii ahe ehãa, kɛ shishitoo mlai ni kudɔɔ eko fɛɛ eko. Shi kuu ko yɛ ni esoro lɛ kwraa yɛ kui nɛɛ fɛɛ ahe. Kuu nɛɛ ji Yehowa Odasefoi. Esoro amɛ kwraa ejaakɛ amɛkɛ Biblia mli shishitoo mlai tsuɔ nii yɛ amɛnifeemɔi fɛɛ amli.

² Miishɛɛ sane ji akɛ, okɛ ohe ebadɔmɔ Yehowa asafo lɛ. Amrɔ nɛɛ, oofee Nyɔŋmɔ suɔmɔnaa nii, ejaakɛ obayɔse nɔ ni ji esuɔmɔnaa nii. (Lala 143:10; Rom. 12:2) Okɛ onyɛmimɛi ni yɔɔ jeŋ fɛɛ lɛ efee ekome kɛmiisɔmɔ Nyɔŋmɔ, ni nyɛsumɔɔ nyɛhe waa. (2 Kor. 6:4; 1 Pet. 2:17; 5:9) Enɛ ehã oná jɔɔmɔi pii kɛ miishɛɛ babaoo, tamɔ bɔ ni Nyɔŋmɔ ewo shi yɛ e-Wiemɔ lɛ mli lɛ. (Abɛi 10:22; Mar. 10:30) Kɛ́ otee nɔ ofee Yehowa suɔmɔnaa nii, tamɔ bɔ ni ofeɔ amrɔ nɛɛ, wɔsɛɛ lɛ, obaahi shi kɛya naanɔ, ni omiishɛɛ lɛ sɛɛ efoŋ.​—1 Tim. 6:18, 19; 1 Yoh. 2:17.

³ Yehowa, wɔ-Bɔlɔ Kpele lɛ, yɛ asafo ko ni mli bii yɛ je lɛŋ he fɛɛ he. Esoro asafo nɛɛ kwraa, ni eji teokrase asafo. Nɔ ni enɛ tsɔɔ ji akɛ, Yehowa, mɔ ni ji nibii fɛɛ Yitso lɛ, ni kudɔɔ asafo lɛ. Wɔheɔ lɛ wɔyeɔ kɛ wɔtsui fɛɛ. Lɛ ji wɔ-Kojolɔ, wɔ-Mlawolɔ, kɛ wɔ-Maŋtsɛ. (Yes. 33:22) Akɛni etoɔ nɔ fɛɛ nɔ ni efeɔ lɛ he gbɛjianɔ hewɔ lɛ, ekwɛ ni ato nibii ahe gbɛjianɔ koni wɔ kɛ lɛ ‘afee ekome’ kɛtsu eyiŋtoo lɛ he nii.​—2 Kor. 6:1, 2.

⁴ Je nɛɛ naagbee lɛ miibɛŋkɛ oyayaayai, shi wɔmiiya wɔhiɛ, ejaakɛ Kristo Yesu, mɔ ni Nyɔŋmɔ ehala akɛ Maŋtsɛ lɛ, ji wɔ-Hiɛnyiɛlɔ. (Yes. 55:4; Kpo. 6:2; 11:15) Yesu diɛŋtsɛ gba akɛ, esɛɛnyiɛlɔi lɛ baatsu nitsumɔi ni fe nɔ ni etsu be ni eyɔɔ shikpɔŋ lɛ nɔ lɛ. (Yoh. 14:12) Ewie nakai, ejaakɛ ele akɛ esɛɛnyiɛlɔi lɛ ayi baafa, ni amɛkɛ afii babaoo baashiɛ, ni amɛbaashiɛ yɛ hei pii. Anɔkwa, amɛbaashiɛ Maŋtsɛyeli lɛ he sane kpakpa lɛ kɛyashi shikpɔŋ lɛ naagbeehei lɛ.​—Mat. 24:14; 28:19, 20; Bɔf. 1:8.

⁵ Gbalɛ nɛɛ eba mli momo. Shi Yesu fee lɛ faŋŋ akɛ, kɛ́ be ni Yehowa eto lɛ shɛ lɛ, abaakpa sane kpakpa lɛ shiɛmɔ. Gbalɛi ni yɔɔ Nyɔŋmɔ Wiemɔ lɛ mli lɛ hãa wɔnaa faŋŋ akɛ, Yehowa gbi wulu ni yɔɔ gbeyei lɛ ebɛŋkɛ kpaakpa.​—Yoel 2:31; Zef. 1:14-18; 2:2, 3; 1 Pet. 4:7.

⁶ Kɛ́ wɔyɔse nɔ ni Yehowa miisumɔ ni wɔtsu yɛ naagbee gbii nɛɛ amli lɛ, esa akɛ wɔkɛ hiɛdɔɔ atsu, ni wɔtsu lɛ waa fe bɔ ni wɔfeɔ momo lɛ. Enɛ biɔ ni wɔle bɔ ni Nyɔŋmɔ asafo lɛ tsuɔ nii ehãa lɛ jogbaŋŋ, ni wɔkɛ asafo lɛ anyiɛ pɛpɛɛpɛ. Mlai, shishitoo mlai, kitãi, famɔi, gbɛtsɔɔmɔi, kɛ tsɔɔmɔi ni yɔɔ Nyɔŋmɔ Wiemɔ ni ajɛ mumɔŋ aŋma lɛ mli lɛ ji nɔ ni kudɔɔ asafo lɛ.​—Lala 19:7-9.

⁷ Kɛ́ Yehowa webii kɛ gbɛtsɔɔmɔi ni jɛ Biblia lɛ mli lɛ tsu nii lɛ, ehãa amɛhiɔ shi yɛ toiŋjɔlɛ mli ni amɛfeɔ ekome kɛtsuɔ nii. (Lala 133:1; Yes. 60:17; Rom. 14:19) He fɛɛ he ni obaaya yɛ je lɛ mli lɛ, obaana akɛ ekomefeemɔ yɛ nyɛmimɛi lɛ ateŋ waa. Mɛni hewɔ? Ejaakɛ wɔsumɔɔ wɔhe. Nɔ fɛɛ nɔ ni wɔfeɔ lɛ, suɔmɔ mli wɔjɛɔ wɔfeɔ; wɔwo suɔmɔ tamɔ atade. (Yoh. 13:34, 35; Kol. 3:14) Akɛni Yehowa ehã wɔfee ekome hewɔ lɛ, wɔnyɛɔ wɔkɛ esafo lɛ fã ni yɔɔ ŋwɛi lɛ nyiɛɔ jogbaŋŋ.

YEHOWA ASAFO LƐ FÃ NI YƆƆ ŊWƐI LƐ

⁸ Gbalɔ Yesaia, Ezekiel, kɛ Daniel fɛɛ na Yehowa asafo lɛ fã ni yɔɔ ŋwɛi lɛ he ninai. (Yes., yitso 6; Eze., yitso 1; Dan. 7:9, 10) Bɔfo Yohane hu na asafo nɛɛ ni yɔɔ ŋwɛi lɛ he ninaa, ni ebɔ he amaniɛ fioo yɛ Kpojiemɔ wolo lɛ mli. Ena Yehowa ta maŋtsɛ sɛi ni yɔɔ nyam ko nɔ, ni ŋwɛibɔfoi komɛi ebɔle lɛ ni amɛmiijaje akɛ: “Krɔŋkrɔŋ, krɔŋkrɔŋ, krɔŋkrɔŋ ji Yehowa Nyɔŋmɔ, Ofe lɛ, mɔ ni yɛ momo lɛ, kɛ mɔ ni yɔɔ amrɔ nɛɛ, kɛ mɔ ni baaba lɛ.” (Kpo. 4:8) Kɛfata he lɛ, Yohane na “gwantɛŋbi ko” ni ji Yesu Kristo, Nyɔŋmɔ Gwantɛŋbi lɛ, ‘damɔ shi yɛ maŋtsɛ sɛi lɛ teŋ.’​—Kpo. 5:6, 13, 14; Yoh. 1:29.

⁹ Yɛ ninaa lɛ mli lɛ, Yehowa ta maŋtsɛ sɛi nɔ, ni tsɔɔ akɛ, lɛ ji asafo nɛɛ Yitso. Awie Yehowa kɛ egbɛhe ni nɔ kwɔ lɛ he yɛ 1 Kronika 29:11, 12 lɛ akɛ: “Ao Yehowa, onɔ ji dalɛ lɛ, kɛ hewalɛ lɛ, kɛ hefɛo lɛ, kɛ anunyam lɛ, kɛ agbojee lɛ, ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ, onɔ ni. Ao Yehowa, onɔ ji maŋtsɛyeli lɛ. Bo ji mɔ ni ewó ehe nɔ gojoo yɛ nii fɛɛ nɔ akɛ yitso. Bo odɛŋ ninámɔ kɛ hiɛnyam fɛɛ jɛɔ, ni bo oyeɔ nibii fɛɛ nɔ, ni bo odɛŋ nyɛmɔ kɛ hewalɛ yɔɔ, ni bo onine ji nɔ ni feɔ mɔ agbo ni ehãa lɛ hewalɛ.”

¹⁰ Yesu Kristo, ni ji Yehowa naanyo nitsulɔ lɛ, yɛ gbɛhe ko ni nɔ kwɔ yɛ ŋwɛi, ni ahã lɛ hegbɛ babaoo. Anɔkwa, “Nyɔŋmɔ kɛ nibii fɛɛ ewo Kristo najiashi, ni ekɛ lɛ efee nibii fɛɛ yitso ehã asafo lɛ.” (Efe. 1:22) Bɔfo Paulo wie yɛ Yesu he akɛ: “Nyɔŋmɔ wó enɔ ni ehã lɛ gbɛhe ni nɔ kwɔ, ni ejɛ mlihilɛ mli ehã lɛ gbɛ́i ni ta gbɛ́i krokomɛi fɛɛ nɔ, koni yɛ Yesu gbɛ́i mli lɛ, mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi ni lilɛi fɛɛ lilɛi ajaje akɛ Yesu Kristo ji Nuŋtsɔ, kɛwo Nyɔŋmɔ, ni ji Tsɛ lɛ hiɛ nyam.” (Fip. 2:9-11) Enɛ hewɔ lɛ, wɔyiŋ efeee wɔ kɔshikɔshi bibioo po akɛ, Yesu Kristo baanyiɛ wɔhiɛ yɛ jalɛ naa.

¹¹ Yɛ ninaa ko ni ajie ahã gbalɔ Daniel lɛ mli lɛ, ena Mɔ Ni Eye Gbii Pii lɛ ni eta E-maŋtsɛ sɛi lɛ nɔ yɛ ŋwɛi ni ŋwɛibɔfoi “akpe toi akpei [miisɔmɔ] lɛ, ni [ŋwɛibɔfoi] akpei nyɔŋma toi akpei nyɔŋma damɔ ehiɛ.” (Dan. 7:10) Biblia lɛ tsɛɔ ŋwɛibɔfoi lɛ akɛ, ‘mumɔi ni kɛ sɔɔmɔ krɔŋkrɔŋ hãa ni atsu amɛ koni amɛyasɔmɔ mɛi ni baaná yiwalaheremɔ lɛ.’ (Heb. 1:14) Ŋwɛibɔfoi nɛɛ fɛɛ yɛ hegbɛi srɔtoi yɛ Nyɔŋmɔ asafo lɛ mli.​—Kol. 1:16.

¹² Kɛ́ wɔhe be wɔsusu nibii ni awie yɛ Yehowa asafo lɛ fã ni yɔɔ ŋwɛi lɛ he lɛ he jogbaŋŋ lɛ, wɔbaana akɛ nɔ ni Yesaia wie be ni ena Yehowa “ta maŋtsɛ sɛi ko ni kwɔ ni sɛŋ kɔɔyɔɔ mli” lɛ nɔ ni “Serafim damɔ eŋwɛigbɛ” lɛ bɛ naakpɛɛ. Ewie akɛ: “Kpoo hã mi! Migbo mitã, ejaakɛ gbɔmɔ ni naabu he tseee ji mi, ni miyɛ mɛi ni naabu he tseee ateŋ; ejaakɛ mihiŋmɛii ena Maŋtsɛ lɛ, Yehowa, taiatsɛ lɛ diɛŋtsɛ!” Anɔkwa, be ni Yesaia na bɔ ni Yehowa asafo lɛ da hã, kɛ bɔ ni ato he gbɛjianɔ lɛ, enaa kpɛ ehe, ni ena akɛ jeee mɔ ko kwraa ji lɛ. Nɔ ni Yesaia na lɛ ná enɔ hewalɛ aahu akɛ, be ni gbee ko jɛ ŋwɛi ebi mɔ ni baayajaje Yehowa kojomɔi lɛ, ekɛ ehe hã kɛhã nitsumɔ krɛdɛɛ nɛɛ. Ehere nɔ akɛ: “Naa mi! Tsu mi!”​—Yes. 6:1-5, 8.

¹³ Kɛ́ wɔ hu wɔbana bɔ ni Yehowa asafo lɛ da hã, kɛ bɔ ni ato he gbɛjianɔ lɛ, wɔbaanu he tamɔ bɔ ni Yesaia nu he lɛ nɔŋŋ. Yehowa asafo lɛ miiya hiɛ, ni esa akɛ wɔbɔ mɔdɛŋ ni wɔkɛ lɛ anyiɛ pɛpɛɛpɛ, ni wɔkɛ wɔwiemɔ kɛ wɔnifeemɔ atsɔɔ akɛ, wɔle akɛ esafo lɛ nɛ.

YEHOWA ASAFO LƐ MIIYA HIƐ

¹⁴ Yɛ Ezekiel yitso 1 lɛ mli lɛ, awie Yehowa he akɛ eta shwiili agbo ko nɔ yɛ ŋwɛi. Nɛkɛ tsɔne kpele nɛɛ feɔ Yehowa asafo lɛ fã ni anaaa lɛ he mfoniri. Yehowa ta shwiili nɛɛ nɔ, ni tsɔɔ akɛ, ejɛɔ suɔmɔ mli ekudɔɔ shwiili lɛ ni ekɛtsuɔ eyiŋtoo he nii.​—Lala 103:20.

¹⁵ Shwiili lɛ tai lɛ eko fɛɛ eko su kɛ bɔ ni afee lɛ ahã lɛ tamɔ dade tai kome ni hɔ dade tai kroko mli, ni atsɔ nɔ ni hɔ mli lɛ kakadaŋŋ bɔ ni ekoji lɛ baaje kpo yɛ ekroko lɛ biɛ kɛ biɛ. No hewɔ ni akɛɔ akɛ taii lɛ ‘baanyɛ agba kɛya amɛkoji ejwɛ lɛ eko fɛɛ eko nɔ’ lɛ. (Eze. 1:17) Bɔ ni taii lɛ yɔɔ lɛ hewɔ lɛ, shwiili lɛ baanyɛ agba kɛya he fɛɛ he ni ehe ehiaaa ni edɔɔ ehe dã. Shi enɛ etsɔɔɔ akɛ shwiili lɛ diɛŋtsɛ yaa he fɛɛ he ni esumɔɔ ni mɔ ko kudɔɔɔ. Yehowa hãaa esafo lɛ diɛŋtsɛ akɔ egbɛ kɛya he fɛɛ he kɛkɛ. Ezekiel 1:20 lɛ kɛɔ akɛ: “Amɛyaa he ni mumɔ lɛ tsirɛɔ amɛ akɛ amɛya lɛ.” No hewɔ lɛ, Yehowa ji mɔ ni hãa esafo lɛ yaa he fɛɛ he ni emumɔ lɛ baatsirɛ lɛ akɛ eya lɛ. Sane ni esa akɛ wɔbi wɔhe ji akɛ, ‘Ani mikɛ asafo lɛ miinyiɛ pɛpɛɛpɛ?’

¹⁶ Jeee asafoŋ kpeei kɛ shiɛmɔ ni wɔbaaya lɛ pɛ kɛkɛ ni baatsɔɔ akɛ wɔkɛ Yehowa asafo lɛ miinyiɛ pɛpɛɛpɛ. Nɔ titri ni baatsɔɔ nakai ji, ni wɔbaaya wɔhiɛ yɛ asafo lɛ mli ni wɔdara yɛ mumɔŋ. ‘Wɔkaa wɔkwɛɔ ni wɔnaa nibii ni he hiaa waa’ lɛ, ni wɔkɛ mumɔŋ niyenii ni akɛhãa wɔ yɛ be naa lɛ lɛɔ wɔhe jogbaŋŋ. (Fip. 1:10; 4:8, 9; Yoh. 17:3) Esa akɛ wɔkai hu akɛ, ja wɔ fɛɛ wɔtsu wɔgbɛfaŋnɔ, ni wɔ fɛɛ wɔfee ekome kɛtsu nii dani abaanyɛ akɛɛ akɛ ato wɔhe gbɛjianɔ jogbaŋŋ. No hewɔ lɛ, ehe miihia ni wɔkɛ mumɔŋ nibii kɛ heloonaa nibii ni Yehowa edro wɔ lɛ atsu nii jogbaŋŋ koni wɔnyɛ wɔtsu enitsumɔ lɛ wɔgbe naa. Kɛ́ wɔkɛ Yehowa shwiili ni yɔɔ ŋwɛi lɛ nyiɛ pɛpɛɛpɛ lɛ, no baatsɔɔ akɛ wɔmiihi shi yɛ sane ni wɔshiɛɔ lɛ naa.

¹⁷ Yɛ Yehowa asafo lɛ yelikɛbuamɔ naa lɛ, wɔmiiya wɔhiɛ ni wɔmiifee Nyɔŋmɔ suɔmɔnaa nii. Kaimɔ akɛ, Yehowa ji mɔ ni kudɔɔ shwiili ni yɔɔ ŋwɛi lɛ. No hewɔ lɛ, kɛ́ wɔkɛ eshwiili lɛ nyiɛ pɛpɛɛpɛ lɛ, no tsɔɔ akɛ wɔbuɔ Yehowa, ni wɔkɛ wɔhiɛ fɔ̃ɔ enɔ akɛ wɔ-Tɛsaa. (Lala 18:31) Biblia lɛ ewo shi akɛ: “Yehowa baahã emaŋ lɛ hewalɛ. Yehowa kɛ toiŋjɔlɛ baajɔɔ emaŋ lɛ.” (Lala 29:11) Ŋmɛnɛ lɛ, wɔ hu wɔbafata Yehowa asafo lɛ he, ni wɔmiiná hewalɛ kɛ toiŋjɔlɛ ni ekɛdro ewebii lɛ mli gbɛfaŋnɔ. Wɔbaanyɛ wɔwie kɛ nɔmimaa akɛ, kɛ́ wɔtee nɔ wɔfee Yehowa suɔmɔnaa nii lɛ, ebaaya nɔ ejɔɔ wɔ babaoo.