Asafoŋ Sɔɔlɔi Tsuɔ Nitsumɔi Ni He Hiaa

BƆFO Paulo ŋma wolo kɛmaje asafo ni yɔɔ Filipi lɛ akɛ: “Paulo kɛ Timoteo, Kristo Yesu nyɔji, kɛ wolo nɛɛ miimaje mɛi krɔŋkrɔŋi ni kɛ Kristo Yesu efee ekome, ni yɔɔ Filipi lɛ fɛɛ, kɛ agbɛnɛ hu, nɔkwɛlɔi kɛ asafoŋ sɔɔlɔi lɛ.” (Fip. 1:1) Kadimɔ akɛ eŋa asafoŋ sɔɔlɔi ni yɔɔ jɛmɛ lɛ hu. Ekã shi faŋŋ akɛ, hii nɛɛ tsu nitsumɔ ko ni he hiaa kɛye amɛbua asafoŋ onukpai ni hi shi yɛ nakai beiaŋ lɛ waa. Nakai nɔŋŋ eji ŋmɛnɛ. Asafoŋ sɔɔlɔi tsuɔ nitsumɔi srɔtoi ni yeɔ ebuaa nɔkwɛlɔi lɛ, ni ehãa nibii yaa nɔ jogbaŋŋ yɛ asafo lɛ mli.

² Ani ole asafoŋ sɔɔlɔi ni yɔɔ osafo lɛ mli lɛ? Ani ole nɔ ni amɛtsuɔ kɛyeɔ amɛbuaa bo kɛ asafo muu lɛ fɛɛ lɛ? Yehowa hiɛ sɔɔ nitsumɔ ni hii nɛɛ tsuɔ lɛ jogbaŋŋ. Paulo ŋma akɛ: “Mɛi ni sɔmɔɔ jogbaŋŋ lɛ miiná gbɛ́i kpakpa amɛmiihã amɛhe, ni agbɛnɛ hu, amɛnyɛɔ amɛwieɔ kɛ nɔmimaa babaoo yɛ hemɔkɛyeli ni yɔɔ Kristo Yesu mli lɛ mli.”​—1 Tim. 3:13.

ŊMALƐ NAA TAOMƆ NII NI ESA AKƐ ASAFOŊ SƆƆLƆI ASHƐ HE

³ Esa akɛ asafoŋ sɔɔlɔi aba amɛjeŋ jogbaŋŋ akɛ Kristofoi, amɛfee mɛi ni abaanyɛ amu afɔ̃ amɛnɔ, kɛ mɛi ni tsuɔ nitsumɔi ni akɛwo amɛdɛŋ lɛ jogbaŋŋ. Sane ko ni Paulo kɛɛ Timoteo yɛ wolo ko ni eŋma lɛ lɛ mli lɛ hãa wɔnaa enɛ faŋŋ. Etsɔɔ taomɔ nii ni esa akɛ mɔ ko ashɛ he dani awo lɛ asafoŋ sɔɔlɔ. Ewie akɛ: “Nakai nɔŋŋ esa akɛ asafoŋ sɔɔlɔi afee mɛi ni kɛ nibii efeee shwɛmɔ, jeee mɛi ni kɛ amɛwiemɔi lakaa mɛi, jeee mɛi ni nuɔ dãa babaoo, jeee mɛi ni kɛ amimyeli tiuɔ sɛɛnamɔ gbonyo sɛɛ, shi mɛi ni hiɛɔ hemɔkɛyeli lɛ he teemɔŋ sane krɔŋkrɔŋ lɛ yɛ henilee ni he tse mli. Shi esa akɛ aka mɛnɛɛmɛi hu akwɛ akɛ amɛsa dã; no sɛɛ lɛ, bei abɔ ni sane ko bɛ amɛhe lɛ, ahã amɛsɔmɔ akɛ sɔɔlɔi. Asafoŋ sɔɔlɔi lɛ afee wumɛi ni yɔɔ ŋa komekome, mɛi ni kwɛɔ amɛbii kɛ amɛ diɛŋtsɛ amɛshĩai anɔ jogbaŋŋ.” (1 Tim. 3:8-10, 12) Kɛ́ ahala hii ni shɛɔ taomɔ nii ni nɔ kwɔlɔ nɛɛ ahe akɛ asafoŋ sɔɔlɔi lɛ, ehãŋ agbe asafo lɛ he guɔ yɛ mɛi ni akɛ hegbɛi krɛdɛi hãa amɛ ni amɛsɔmɔ lɛ ahewɔ.

⁴ Kɛ́ asafoŋ sɔɔlɔi lɛ edara jio, amɛdarako jio lɛ, amɛkɛ amɛhe woɔ shiɛmɔ nitsumɔ lɛ mli kɛ ekãa daa nyɔɔŋ nɔ. Amɛkaseɔ Yesu, ni no hewɔ lɛ, amɛhiɛ dɔɔ yɛ shiɛmɔ nitsumɔ lɛ he. Nakai ni amɛfeɔ lɛ tsɔɔ akɛ amɛ hu amɛmiisumɔ ni ahere adesai ayiwala, tamɔ bɔ ni eji yɛ Yehowa gbɛfaŋ lɛ.​—Yes. 9:7.

⁵ Asafoŋ sɔɔlɔi feɔ nɔkwɛmɔnɔ kpakpa hu yɛ amɛtadewoo, amɛhesaamɔ, amɛwiemɔ, amɛsui, kɛ amɛjeŋba mli. Amɛji hii ni jwɛŋɔ jogbaŋŋ, ni no hewɔ lɛ, mɛi buɔ amɛ. Kɛfata he lɛ, amɛkɛ wekukpaa ni yɔɔ amɛ kɛ Yehowa teŋ kɛ sɔɔmɔ hegbɛi ni amɛyɔɔ yɛ asafo lɛ mli lɛ shwɛɛɛ kwraa.​—Tito 2:2, 6-8.

⁶ Atsɔ hiɛ aka hii nɛɛ “akwɛ akɛ amɛsa.” Amɛhãa anaa akɛ amɛji hii ni ejɔɔ amɛhe nɔ amɛhã Yehowa lɛɛlɛŋ dani aholeɔ amɛ akɛ asafoŋ sɔɔlɔi po. Amɛkɛ amɛnifeemɔi tsɔɔ akɛ amɛkɛ Maŋtsɛyeli lɛ he nibii yeɔ klɛŋklɛŋ gbɛhe, ni amɛmiibɔ mɔdɛŋ amɛshɛ taomɔ nii kɛhã sɔɔmɔ hegbɛi yɛ asafo lɛ mli lɛ ahe. Yɛ anɔkwale mli lɛ, amɛfeɔ nɔkwɛmɔnɔ kpakpa amɛhãa mɛi krokomɛi yɛ asafo lɛ mli.​—1 Tim. 3:10.

NƆ NI AMƐTSUƆ

⁷ Asafoŋ sɔɔlɔi tsuɔ nitsumɔi srɔtoi kɛsɔmɔɔ nyɛmimɛi hii kɛ yei lɛ, ni no hãa nɔkwɛlɔi lɛ náa be babaoo kɛtsɔɔ nii ni amɛkwɛɔ tooku lɛ jogbaŋŋ. Onukpai akuu lɛ susuɔ asafoŋ sɔɔlɔi lɛ ateŋ mɔ fɛɛ mɔ nyɛmɔi, kɛ agbɛnɛ hu, asafo lɛ hiamɔ nii lɛ ahe dani amɛkɛ nitsumɔi woɔ asafoŋ sɔɔlɔi lɛ adɛŋ.

⁸ Amɛnitsumɔi lɛ ekomɛi nɛ: Abaanyɛ ahã asafoŋ sɔɔlɔ ko akwɛ koni asafo lɛ aná woji ni asafoŋbii lɛ diɛŋtsɛ baakase kɛ nɔ ni amɛkɛbaaya shiɛmɔ. Ahãa mɛi krokomɛi hu kwɛɔ asafo lɛ shika he akɔntaabuu loo shikpɔŋkuku he woji lɛ anɔ. Ahãa asafoŋ sɔɔlɔi komɛi hu kwɛɔ maikrofoŋ kɛ tsɔne ni akɛtswaa lala lɛ nɔ, ni ahãa mɛi krokomɛi hu sɔmɔɔ akɛ asafoŋ kpeei ashishi sɔɔlɔi, ni mɛi krokomɛi hu yeɔ amɛbuaa onukpai lɛ yɛ gbɛi krokomɛi anɔ. Akɛni ebiɔ ni atsu nii babaoo kɛkura Maŋtsɛyeli Asa lɛ ni ahã emli kɛ ehewɔ atse hewɔ lɛ, bei pii lɛ, ahãa asafoŋ sɔɔlɔi yeɔ amɛbuaa kɛtsuɔ nitsumɔi nɛɛ.

⁹ Yɛ asafoi komɛi amli lɛ, abaanyɛ ajara nitsumɔi nɛɛ ekomekomei ahã asafoŋ sɔɔlɔi lɛ ateŋ mɔ fɛɛ mɔ. Yɛ asafoi krokomɛi amli lɛ, asafoŋ sɔɔlɔ kome baanyɛ atsu nitsumɔi nɛɛ ateŋ enyɔ loo nɔ. Yɛ shihilɛi komɛi hu amli lɛ, abaanyɛ ahã asafoŋ sɔɔlɔi enyɔ loo nɔ atsu nitsumɔi nɛɛ ateŋ ekome. Kɛ́ asafoŋ sɔɔlɔi lɛ faaa bɔ ni amɛbaanyɛ amɛtsu nitsumɔi nɛɛ fɛɛ lɛ, onukpai akuu lɛ baanyɛ ahã nyɛmimɛi hii ni abaptisi amɛ ni feɔ nɔkwɛmɔnɔ kpakpa atsu nitsumɔi ni he hiaa nɛɛ. Nakai feemɔ baahã nyɛmimɛi nɛɛ aná niiashikpamɔ ni he baaba sɛɛnamɔ sɛɛ mli kɛ́ amɛshɛ taomɔ nii lɛ ahe ni ahole amɛ akɛ asafoŋ sɔɔlɔi. Kɛ́ nyɛmimɛi hii ni sa bɛ lɛ, abaanyɛ ahã nyɛmi yoo ko ni feɔ nɔkwɛmɔnɔ kpakpa aye abua kɛtsu nibii komɛi ahe nii, eyɛ mli akɛ awoŋ lɛ asafoŋ sɔɔlɔ. Kɛ́ akɛɛ mɔ ko feɔ nɔkwɛmɔnɔ kpakpa lɛ, nɔ ni no tsɔɔ ji, mɔ lɛ baa ejeŋ jogbaŋŋ ni ejáa Nyɔŋmɔ yɛ gbɛ ni abaanyɛ akɛɛ mɛi krokomɛi akɛ amɛkase lɛ lɛ nɔ. Bɔ ni ebaa asafoŋ kpeei ehãa, bɔ ni eyaa shiɛmɔ ehãa, bɔ ni ekɛ eweku lɛ mli bii lɛ yeɔ ehãa, hiɛtserɛjiemɔi ni ekɛ ehe woɔ mli, ehesaamɔ kɛ atadei ni ewoɔ, kɛ nibii krokomɛi fɛɛ ni efeɔ lɛ sa bɔ ni mɛi krokomɛi baanyɛ akase.

¹⁰ Yɛ asafoi ni onukpai faaa yɛ mli lɛ amli lɛ, abaanyɛ ahã asafoŋ sɔɔlɔi ni sa lɛ kɛ mɛi asusu baptisimɔ he sanebimɔi ni kɔɔ nibii ni wɔheɔ wɔyeɔ lɛ ahe lɛ he. Sanebimɔi nɛɛ yɛ Saji Krokomɛi “Fã 1: Nibii Ni Kristofoi Heɔ Amɛyeɔ.” Akɛni “Fã 2: Bɔ Ni Esa Akɛ Kristofoi Ahi Shi Ahã” lɛ kɔɔ aŋkroaŋkroi ashihilɛ mli saji ahe hewɔ lɛ, esa akɛ asafoŋ onukpa atsu he nii.

¹¹ Kɛ́ ehe miihia lɛ, yɛ be kɛ beiaŋ lɛ, onukpai akuu lɛ baanyɛ atsake nitsumɔi ni amɛkɛwo asafoŋ sɔɔlɔi lɛ adɛŋ lɛ. Shi ehi jogbaŋŋ akɛ, abaahã asafoŋ sɔɔlɔi lɛ atsu nitsumɔi ni akɛwo amɛdɛŋ lɛ nɔŋŋ be kplaŋŋ koni amɛle mli jogbaŋŋ ni amɛhe asa.

¹² Yɛ shihilɛi komɛi amli lɛ, abaanyɛ ahã asafoŋ sɔɔlɔi ni “mɛi fɛɛ” miina ‘amɛhiɛyaa faŋŋ’ lɛ atsu sɔ̃i krokomɛi ahe nii. (1 Tim. 4:15) Kɛ́ asafoŋ onukpai ni yɔɔ asafo ko mli lɛ ayi faaa lɛ, abaanyɛ ahã asafoŋ sɔɔlɔ ko asɔmɔ akɛ kuu nɔkwɛlɔ sɛɛmɔ, aloo yɛ shihilɛi komɛi amli po lɛ, esɔmɔ akɛ kuu sɔɔlɔ yɛ onukpai lɛ agbɛtsɔɔmɔ naa. Abaanyɛ ahã asafoŋ sɔɔlɔi lɛ nifeemɔi komɛi yɛ Wɔshiɛmɔ Kɛ Wɔshihilɛ Kpee lɛ mli, ni kɛ́ ehe miihia lɛ, abaanyɛ ahã amɛkwɛ Asafoŋ Biblia Nikasemɔ lɛ nɔ yɛ nakai kpee lɛ shishi, ni abaanyɛ ahã amɛhã maŋshiɛmɔ hu. Abaanyɛ ahã asafoŋ sɔɔlɔi atsu sɔ̃i krokomɛi ahe nii kɛji hiamɔ ko ba ni amɛshɛɔ taomɔ nii kɛhã nakai sɔ̃i lɛ ahe nitsumɔ lɛ he. (1 Pet. 4:10) Esa akɛ asafoŋ sɔɔlɔi ajɛ amɛsuɔmɔ mli amɛkɛ amɛhe ahã kɛsɔmɔ.

¹³ Eyɛ mli akɛ, esoro asafoŋ sɔɔlɔi lɛ anitsumɔ lɛ yɛ asafoŋ onukpai lɛ anɔ lɛ he moŋ, shi nɔ ni amɛtsuɔ lɛ fata sɔɔmɔ krɔŋŋ ni akɛhãa Nyɔŋmɔ lɛ he, ni eyeɔ ebuaa waa koni nibii aya nɔ jogbaŋŋ yɛ asafo lɛ mli. Kɛ́ be shwie mli, ni asafoŋ sɔɔlɔi lɛ tsu amɛnitsumɔi lɛ jogbaŋŋ ni amɛshɛ taomɔ nii kɛhã tookwɛlɔi kɛ tsɔɔlɔi lɛ ahe lɛ, abaanyɛ ajie amɛyi koni ahã amɛsɔmɔ akɛ asafoŋ onukpai.

¹⁴ Kɛ́ nyɛmi nuu ji bo, ni oná afii 13 loo nɔ ni fa fe nakai, loo abaptisi bo etsɛko lɛ, ani oobɔ mɔdɛŋ ni oshɛ taomɔ nii lɛ ahe koni onyɛ osɔmɔ akɛ asafoŋ sɔɔlɔ? (1 Tim. 3:1) Akɛni mɛi babaoo miiba anɔkwale lɛ mli daa afi hewɔ lɛ, esa akɛ aná hii ni edara yɛ mumɔŋ ni sa koni amɛtsu asafoŋ sɔ̃i ahe nii. Kɛ́ oná shwelɛ akɛ obaaye obua mɛi krokomɛi lɛ, no baanyɛ ahã oshɛ taomɔ nii nɛɛ ahe. Gbɛ kome ni obaanyɛ otsɔ nɔ oná shwelɛ nɛɛ ji, ni obaajwɛŋ nɔkwɛmɔnɔ kpakpa ni Yesu fee lɛ nɔ. (Mat. 20:28; Yoh. 4:6, 7; 13:4, 5) Kɛ́ otee nɔ oye obua mɛi krokomɛi lɛ, obaaná miishɛɛ, ni no baahã shwelɛ ni oyɔɔ akɛ oye obua mɛi lɛ mli awa. (Bɔf. 20:35) No hewɔ lɛ, jɛɛ osuɔmɔ mli oye obua mɛi, ye obua kɛkura Maŋtsɛyeli Asa lɛ, aloo kɛ́ mɔ ko nyɛɛɛ abafee Wɔshiɛmɔ Kɛ Wɔshihilɛ Kpee lɛ mli nifeemɔ ni eyɔɔ lɛ, okɛ ohe ahã yɛ enajiaŋ. Nɔ kroko ni baanyɛ ahã oshɛ taomɔ nii lɛ ahe ji, ni obaafee aŋkro nikasemɔ daa koni oná sui kpakpai. (Lala 1:1, 2; Gal. 5:22, 23) Agbɛnɛ hu, kɛ́ akɛ nitsumɔ wo nyɛmi nuu ko ni miibɔ mɔdɛŋ ni eshɛ taomɔ nii nɛɛ ahe lɛ dɛŋ lɛ, esa akɛ etsu lɛ jogbaŋŋ bɔ ni abaanyɛ amu afɔ̃ enɔ.​—1 Kor. 4:2.

¹⁵ Mumɔ krɔŋkrɔŋ lɛ holeɔ asafoŋ sɔɔlɔi yɛ asafo lɛ hilɛkɛhamɔ hewɔ. Kɛ́ asafoŋbii lɛ fɛɛ fi asafoŋ sɔɔlɔi lɛ asɛɛ be ni amɛtsuɔ nitsumɔi srɔtoi ni atu awo amɛdɛŋ lɛ, no baatsɔɔ akɛ amɛhiɛ sɔɔ nitsumɔ ni asafoŋ sɔɔlɔi lɛ tsuɔ lɛ waa. Agbɛnɛ hu, no baatsɔɔ akɛ amɛhiɛ sɔɔ gbɛjianɔ ni Yehowa eto koni nɔ fɛɛ nɔ aya nɔ jogbaŋŋ yɛ asafo lɛ mli lɛ.​—Gal. 6:10.