Bɔ Ni Wɔbaafee Wɔye Wɔbua Maŋtsɛyeli Nitsumɔ Lɛ

YEHOWA ODASEFOI eshiɛ sane kpakpa lɛ “kɛyashi shikpɔŋ lɛ nɔ hei ni jekɛ waa lɛ,” ni no ehã Yesu gbalɛ ni kɔɔ naagbee gbii lɛ ahe lɛ eba mli. (Bɔf. 1:8; Mat. 24:14) Amɛkɛ amɛbe kɛ nyɛmɔ fɛɛ etsu nii yaka koni amɛhã mɛi ale Nyɔŋmɔ he nii. Akɛni amɛkɛ amɛhiɛ fɔ̃ɔ Yehowa nɔ akɛ lɛ ebaahã etsuji amɛhiamɔ nii hewɔ lɛ, amɛtee nɔ amɛtao Nyɔŋmɔ Maŋtsɛyeli lɛ klɛŋklɛŋ yɛ amɛshihilɛ mli. (Mat. 6:25-34; 1 Kor. 3:5-9) Nɔ ni ejɛ enɛ ni amɛfee lɛ mli kɛba lɛ yeɔ odase akɛ Yehowa kpɛlɛɔ nɔ ni amɛtsuɔ lɛ nɔ ni ejɔɔ nɔ hu.

BƆ NI FEƆ NI ANÁA SHIKA KƐTSUƆ MAŊTSƐYELI LƐ HE NIBII LƐ AHE NII YƐ JEŊ FƐƐ

² Kɛ́ mɛi kwɛ gbɛi anɔ ni wɔtsɔɔ wɔshiɛɔ ni amɛyɔse akɛ wɔkɛ Biblia kɛ Biblia kasemɔ woji hãa ni wɔhɔ̃ɔɔ lɛ, amɛteŋ mɛi komɛi biɔ akɛ: “Te feɔ tɛŋŋ ni nyɛnyɛɔ nyɛfeɔ enɛ lɛ?” Eji anɔkwale akɛ ebiɔ ni aná shika babaoo dani abaanyɛ akala Biblia kɛ Biblia kasemɔ woji lɛ. Agbɛnɛ hu, ebiɔ shika babaoo dani abaanyɛ ama ni akura Betel shĩai, ni ji, hei ni mɛi ni kalaa woji, mɛi ni kwɛɔ shiɛmɔ nitsumɔ lɛ nɔ, kɛ mɛi ni sɔmɔɔ yɛ gbɛi krokomɛi anɔ koni mɛi babaoo anu sane kpakpa lɛ yɔɔ lɛ. Kɛfata he lɛ, ahãa kpokpaa nɔkwɛlɔi, maŋsɛɛ sɔɔlɔi, gbɛgbalɔi krɛdɛi, kɛ mɛi krokomɛi ni yɔɔ be fɛɛ sɔɔmɔ krɛdɛɛ lɛ mli lɛ shika fioo ko koni eye ebua amɛ ni amɛya nɔ amɛtsu nitsumɔ lɛ. Ekã shi faŋŋ akɛ, sane kpakpa lɛ shiɛmɔ yɛ wɔgbii nɛɛ amli yɛ he ni wɔyɔɔ lɛ loo yɛ jeŋ fɛɛ lɛ biɔ shika babaoo diɛŋtsɛ. Nɛgbɛ anáa shika nɛɛ yɛ?

³ Mɛi ni nyaa Biblia tsɔɔmɔ nitsumɔ ni Yehowa Odasefoi tsuɔ lɛ he lɛ ateŋ mɛi pii tsuɔ onia kɛyeɔ amɛbuaa jeŋ muu fɛɛ nitsumɔ lɛ. Kɛ̃lɛ, mɛi titri ni yeɔ amɛbuaa wɔnitsumɔ lɛ ji Odasefoi lɛ diɛŋtsɛ, ni amɛteŋ mɛi komɛi tsuɔ onia kɛmajeɔ Yehowa Odasefoi anitsumɔhe nine ni yɔɔ he ni amɛyɔɔ lɛ. Amɛjɛɔ amɛsuɔmɔ mli amɛkɛ amɛhe shãa afɔle tamɔ bɔ ni Nyɔŋmɔ tsuji ni hi shi yɛ blema ni kɛ amɛnibii ye amɛbua be ni amaa Yehowa jamɔhe lɛ fee lɛ. (2 Mo. 35:20-29; 1 Kro. 29:9) Mɛi komɛi kɛ amɛgboshinii keɔ kɛtsɔ shamaŋsheo ni amɛfeɔ lɛ nɔ, ni aŋkroaŋkroi, asafoi, kɛ kpokpai hu tsuɔ onia fiofio kɛmajeɔ. Kɛ́ abua nikeenii srɔtoi nɛɛ fɛɛ anaa lɛ, ehãa anáa shika ni akɛyeɔ abuaa sɔɔmɔ nitsumɔ lɛ.

⁴ Yehowa Odasefoi buɔ lɛ akɛ eji hegbɛ ni amɛná akɛ amɛkɛ shika kɛ nibii krokomɛi baaye abua koni anyɛ atsu shiɛmɔ nitsumɔ lɛ. No mli lɛ, Yesu kɛ ekaselɔi lɛ hu yɛ shika adeka ni amɛjɛɔ mli amɛwoɔ nyɔji ni amɛbɔɔ lɛ. (Yoh. 13:29) Biblia lɛ hu hãa wɔleɔ yei komɛi ni sɔmɔ Yesu kɛ ekaselɔi lɛ. (Mar. 15:40, 41; Luka 8:3) Mɛi ni miisumɔ ni amɛye amɛbua koni anyɛ ashiɛ sane kpakpa lɛ, ni agbɛnɛ hu amɛmiisumɔ akɛ amɛná gbɛfaŋnɔ yɛ bɔfo Paulo sɔɔmɔ lɛ mli lɛ ye amɛbua lɛ kɛ heloonaa nibii, ni emɔ enɛ mli kɛ miishɛɛ. (Fip. 4:14-16; 1 Tes. 2:9) Yehowa Odasefoi hu shiɛɔ kɛ hiɛdɔɔ ni amɛfeɔ ejurɔ tamɔ bɔ ni mɛi ni hi shi yɛ blema lɛ fee lɛ. Enɛ hewɔ lɛ, yɛ he fɛɛ he lɛ, mɔ fɛɛ mɔ ni hiɛ tsui kpakpa lɛ nine baanyɛ ashɛ “wala nu lɛ [nɔ] yaka.”​—Kpo. 22:17.

BƆ NI FEƆ NI ANÁA SHIKA KƐTSUƆ ASAFO NI WƆYƆƆ MLI LƐ HIAMƆ NII AHE NII

⁵ Atsɔɔ onia ni ajɛɔ suɔmɔ mli atsuɔ lɛ hu nɔ awoɔ nyɔji ni abɔɔ yɛ asafo ni wɔyɔɔ mli lɛ mli. Aheee kɔlɛshiŋ, afooo tɛ ahãaa mɛi, ni abalaaa shika hu. Akɛ oniatsumɔ adekai emamɔ hei ni afeɔ kpeei lɛ yɛ lɛ koni mɔ fɛɛ mɔ ajɛ esuɔmɔ mli etsu onia “bɔ ni ekpɛ mli yɛ etsui mli.”​—2 Kor. 9:7.

⁶ Nɔ ni akɛ onia ni atsuɔ lɛ feɔ klɛŋklɛŋ ji, akɛwoɔ Maŋtsɛyeli Asa lɛ he nyɔji ni abɔɔ kɛ ekuramɔ lɛ he nyɔmɔ. Ekolɛ onukpai akuu lɛ baajie yi akɛ, akɛ shika lɛ eko amaje Yehowa Odasefoi anitsumɔhe nine ni yɔɔ he ni amɛyɔɔ lɛ koni akɛye abua jeŋ muu fɛɛ nitsumɔ lɛ. Kɛ́ eba lɛ nakai lɛ, esa akɛ ahã asafo muu lɛ fɛɛ akpɛ yiŋ yɛ shika abɔ ni akɛbaamaje lɛ he. Asafoi babaoo tsɔɔ gbɛ nɛɛ nɔ amɛtsuɔ onia daa kɛyeɔ amɛbuaa jeŋ muu fɛɛ nitsumɔ lɛ. Kɛ́ mɔ fɛɛ mɔ hiɛ yɛ ehe nɔ ni eye ebua kɛtsu asafo lɛ hiamɔ nii ni baa yɛ be kɛ beiaŋ lɛ he nii lɛ, ehe ehiaaa ni afɔ adafitswaa akɛ atsu onia.

BƆ NI AKWƐƆ ONIA NI ATSUƆ LƐ NƆ AHÃA

⁷ Be fɛɛ be ni abaakpa asafoŋ kpee lɛ, nyɛmimɛi hii enyɔ baajie shika fɛɛ shika ni yɔɔ oniatsumɔ adekai lɛ amli ni amɛbaabu he akɔntaa ni amɛbaaŋma yibɔ lɛ amɛfɔ̃ shi. (2 Maŋ. 12:9, 10; 2 Kor. 8:20) Onukpai akuu lɛ baato gbɛjianɔ koni anyɛ akɛ shika lɛ ato jogbaŋŋ kɛyashi akɛbaamaje nitsumɔhe nine lɛ loo akɛbaatsu asafo lɛ hiamɔ nii ahe nii. Daa nyɔɔŋ nɔ lɛ, nyɛmi nuu ni kwɛɔ asafo lɛ shika he saji anɔ lɛ baaŋmala he saji eshwie shi ni ebɔ asafo lɛ oniatsumɔ lɛ he amaniɛ. Onukpai akuu lɛ saji ahe gbɛjianɔtolɔ lɛ hu baato gbɛjianɔ ni daa nyɔji etɛ lɛ, akwɛ asafo lɛ shika he saji amli.

BƆ NI FEƆ NI ANÁA SHIKA KƐWOƆ NYƆJI NI ABƆƆ YƐ KPOKPAA LƐ MLI

⁸ Odasefoi ni yɔɔ kpokpaa ko mli lɛ ji mɛi ni woɔ kpokpaa nɔ kpee ni afeɔ lɛ he nyɔji, kɛ nyɔji krokomɛi ni kpokpaa lɛ bɔɔ lɛ, ni amɛfeɔ enɛ kɛtsɔ onia ni amɛtsuɔ lɛ nɔ. Akɛ oniatsumɔ adekai mamɔɔ hei ni afeɔ kpeei lɛ yɛ lɛ bɔ ni afee ni atsu onia kɛhã kpokpaa lɛ. Agbɛnɛ hu, asafoi lɛ baanyɛ atsu onia yɛ bei krokomɛi amli koni akɛtsu kpokpaa lɛ hiamɔ nii ahe nii.

⁹ Kɛ́ ebaahi lɛ, esa akɛ kpokpaa fɛɛ kpokpaa anyɛ awo nyɔji ni amɛbɔɔ lɛ, koni kɛ́ shika lɛ eko shwɛ lɛ, akɛtsu onia kɛye abua jeŋ muu fɛɛ nitsumɔ lɛ. Kɛ́ shika ni yɔɔ kpokpaa lɛ fotro lɛ mli lɛ faaa bɔ ni abaanyɛ awo nyɔji ni abɔɔ yɛ kpee ni afeɔ lɛ he loo efaaa bɔ ni akɛbaahai he ko kɛfee kpee ni nyiɛ sɛɛ lɛ loo ni akɛtsu nibii krokomɛi ni he baahia dani anyɛ afee kpee ni nyiɛ sɛɛ lɛ, no lɛ kpokpaa nɔkwɛlɔ lɛ baanyɛ ehã aŋma asafoi lɛ koni amɛjɛ amɛsuɔmɔ mli amɛtsu onia kɛye abua. Onukpai akuu fɛɛ kuu baasusu sane lɛ he, ni amɛkwɛ akɛ shika enyiɛ amɛsafo lɛ baanyɛ ekɛmaje kɛwo kpokpaa lɛ fotro lɛ mli. No sɛɛ lɛ, amɛbaahã asafo lɛ akpɛ yiŋ yɛ shika ni amɛsumɔɔ ni akɛmaje lɛ he.

¹⁰ Kɛ́ shika sane ko yɛ ni ebiɔ ni onukpai ni yɔɔ kpokpaa lɛ nɔ lɛ akpɛ yiŋ yɛ he lɛ, no lɛ, amɛbaakpe yɛ gbi ni afeɔ kpokpaa nɔ kpee lɛ nɔ. Esa akɛ ahã onukpai lɛ akpɛ yiŋ yɛ nɔ fɛɛ nɔ ni akɛ shika lɛ baafee lɛ he, ja nibii ni esa akɛ awo amɛhe nyɔji daa lɛ kɛkɛ. Esa akɛ aŋmala shika he yiŋkpɛi nɛɛ fɛɛ ashwie shi ni atsɔɔ yibɔ pɔtɛɛ ni akpɛ mli lɛ, ni be fɛɛ be ni abaasumɔ akɛ ayajie shika yɛ kpokpaa lɛ fotro lɛ mli lɛ, esa akɛ onukpai lɛ akpɛlɛ nɔ dã.

¹¹ Atoɔ gbɛjianɔ ni akwɛɔ kpokpaa lɛ shika he saji amli yɛ be kɛ beiaŋ.

OHIAFOI AKWƐMƆ

¹² Yiŋtoo kome hewɔ ni Yesu kɛ ekaselɔi lɛ to shika adeka ji, ni amɛkɛye amɛbua ohiafoi. (Mar. 14:3-5; Yoh. 13:29) Kristofoi miitsu sɔ̃ nɛɛ he nii lolo, ejaakɛ Yesu wie akɛ: “Ohiafoi lɛ nyɛkɛ amɛ yɛ daa.” (Mar. 14:7) Mɛɛ gbɛ nɔ Yehowa Odasefoi tsuɔ sɔ̃ nɛɛ he nii ŋmɛnɛ?

¹³ Bei komɛi lɛ, heloonaa yelikɛbuamɔ ko he baahia anɔkwafoi komɛi ni yɔɔ asafo lɛ mli lɛ yɛ gbɔlɛ, hela, loo naagba ko ni da fe amɛ lɛ hewɔ. Amɛwekumɛi, kɛ mɛi krokomɛi ni náa amɛleɔ lɛ baanyɛ aye abua amɛ. Enɛ kɛ nɔ ni bɔfo Yohane wie lɛ kpãa gbee, akɛ: “Mɔ fɛɛ mɔ ni yɔɔ je nɛŋ nibii, ni enaa akɛ efi enyɛmi shi ejieee musuŋtsɔlɛ kpo etsɔɔɔ lɛ lɛ, ani Nyɔŋmɔ suɔmɔ lɛ yɛ emli? Bii bibii, esaaa akɛ wɔsumɔɔ mɛi yɛ wiemɔ mli loo lilɛi nɔ, shi moŋ yɛ nifeemɔ kɛ anɔkwale mli.” (1 Yoh. 3:17, 18; 2 Tes. 3:6-12) Anɔkwa jamɔ biɔ ni akwɛ anɔkwafoi ni heloonaa yelikɛbuamɔ he hiaa amɛ lɛ.​—Yak. 1:27; 2:14-17.

¹⁴ Bɔfo Paulo tsɔɔ bɔ ni esa akɛ akɛ heloonaa yelikɛbuamɔ ahã mɛi ni sa lɛ yɛ klɛŋklɛŋ wolo ni eŋma Timoteo lɛ mli. Obaanyɛ okane ŋaa ni ewo lɛ yɛ 1 Timoteo 5:3-21. Eji Kristofonyo fɛɛ Kristofonyo sɔ̃ titri akɛ ekwɛ eshĩabii. Esa akɛ mɛi ni egbɔlɔ lɛ loo mɛi ni bɛ hewalɛ lɛ abii, loo nabii, loo wekumɛi ni bɛŋkɛ kpaakpa lɛ aye abua amɛ. Bei komɛi lɛ, amralo lɛ loo kuu ko ni yɔɔ he ni nyɛyɔɔ lɛ toɔ gbɛjianɔ ni amɛyeɔ amɛbuaa mɛi ni tamɔ nɛkɛ lɛ yɛ heloo gbɛfaŋ. No hewɔ lɛ, mɔ lɛ wekumɛi loo mɛi krokomɛi baanyɛ aye abua lɛ ni ená nakai yelikɛbuamɔ lɛ. Shihilɛ ko baanyɛ aba ni ehe baahia ni asafo muu lɛ fɛɛ aye abua nyɛmimɛi hii loo yei ni kɛ anɔkwayeli esɔmɔ etsɛ lɛ yɛ gbɛ ko nɔ. Kɛ́ wekumɛi ni baanyɛ aye abua mɔ nɛɛ bɛ, ni abɛ gbɛjianɔ ko hu ni ekolɛ amralo lɛ eto ni baanyɛ aye abua lɛ lɛ, no lɛ onukpai akuu lɛ baanyɛ ato gbɛjianɔ ni sa ni amɛkɛye amɛbua lɛ. Kristofoi buɔ lɛ akɛ eji hegbɛ ni amɛná akɛ amɛkɛ amɛheloonaa nibii baaye abua mɛi ni ehia amɛ lɛ.

¹⁵ Yiwaa, tai, shikpɔŋhosomɔi, nu afuai, hɔji, loo naagbai krokomɛi ni efa babaoo yɛ bei ni jaraa nɛɛ amli lɛ baanyɛ ahã wɔnyɛmimɛi lɛ ekomɛi ahe afi amɛ. (Mat. 24:7-9) Akɛni ekolɛ asafoi ni yɔɔ hei ni naagbai nɛɛ eba lɛ bɛ nɔ ko ni amɛkɛbaaye amɛbua amɛhe hewɔ lɛ, Gbɛtsɔɔmɔ Kuu lɛ toɔ gbɛjianɔ koni nyɛmimɛi ni yɔɔ hei krokomɛi lɛ aye abua. Enɛ tamɔ bɔ ni Kristofoi ni yɔɔ Asia Bibioo lɛ kɛ niyenii maje nyɛmimɛi ni yɔɔ Yudea lɛ be ni hɔmɔ ko ba Yudea lɛ. (1 Kor. 16:1-4; 2 Kor. 9:1-5) Kɛ́ wɔnyiɛ amɛnɔkwɛmɔnɔ lɛ sɛɛ lɛ, wɔtsɔɔ akɛ wɔsumɔɔ wɔnyɛmimɛi lɛ, ni wɔkɛ no hu tsɔɔ akɛ Yesu Kristo kaselɔi anɔkwafoi ji wɔ lɛɛlɛŋ.​—Yoh. 13:35.

WOJI NI AKƐHÃA MƐI LƐ AHE NITSUMƆ

¹⁶ Biblia kɛ Biblia kasemɔ woji yeɔ ebuaa waa ni ashiɛɔ Maŋtsɛyeli lɛ he sane lɛ. Bei pii lɛ, onukpai akuu lɛ halaa asafoŋ sɔɔlɔ ko ni ekwɛɔ woji ni asafo lɛ nine shɛɔ nɔ lɛ anɔ. Nyɛmimɛi hii ni atu nitsumɔ nɛɛ awo amɛdɛŋ lɛ kɛ amɛnitsumɔ lɛ shwɛɛɛ kwraa. Amɛŋmalaa woji lɛ ahe saji amɛshwieɔ shi bɔ ni afee ni be fɛɛ be lɛ, anyɛ aná woji ni fa bɔ ni sa ni asafo lɛ kɛbaatsu nii.

¹⁷ Akɛ Kristofoi ni ejɔɔ amɛhe nɔ lɛ, wɔle akɛ wɔbe, wɔjwɛŋmɔ kɛ wɔnyɛmɔi, wɔhesai, nibii ni wɔyɔɔ, kɛ wɔwala tete ji nikeenii ni jɛ Nyɔŋmɔ ŋɔɔ ni ekɛhã wɔ koni wɔkɛsɔmɔ lɛ. (Luka 17:10; 1 Kor. 4:7) Kɛ́ wɔkɛ nibii nɛɛ fɛɛ tsu nii jogbaŋŋ lɛ, ehãa anaa bɔ ni wɔsumɔɔ Yehowa wɔhãa. Eji wɔshwelɛ akɛ wɔkɛ wɔnibii ni jara wa lɛ baawo Yehowa hiɛ nyam, ejaakɛ wɔle akɛ ehiɛ sɔɔ nikeenii fɛɛ ni ajɛɔ tsui muu fɛɛ mli akɛhãa lɛ lɛ waa. (Abɛi 3:9; Mar. 14:3-9; Luka 21:1-4; Kol. 3:23, 24) Yesu kɛɛ akɛ: “Yaka nyɛná, yaka nyɛkɛhãa.” (Mat. 10:8) Kɛ́ wɔkɛ wɔhe shã afɔle yɛ Yehowa sɔɔmɔ lɛ mli ni wɔkɛ nibii ni wɔyɔɔ lɛ sɔmɔ lɛ lɛ, wɔbaaná miishɛɛ babaoo.​—Bɔf. 20:35.