Wolo ni Jɛ Gbɛtsɔɔmɔ Kuu lɛ Dɛŋ

Nanemɛi Sane Kpakpa Shiɛlɔi:

Eji hegbɛ kpele ni wɔná akɛ wɔbaafee ekome kɛjá Yehowa, ni ji anɔkwa Nyɔŋmɔ kome pɛ lɛ! Wɔji ‘enanemɛi nitsulɔi’ ni etu nitsumɔ krɔŋkrɔŋ ni hereɔ mɛi ayiwala, ni ji e-Maŋtsɛyeli ni eto shishi lɛ he sane kpakpa lɛ shiɛmɔ kɛ etsɔɔmɔ lɛ ewo wɔdɛŋ. (1 Kor. 3:9; Mat. 28:19, 20) Bɔ ni afee ni wɔfee ekome kɛtsu nitsumɔ nɛɛ yɛ toiŋjɔlɛ mli ni wɔnyɛ wɔgbe naa lɛ, esa akɛ ato wɔhe gbɛjianɔ jogbaŋŋ.​—1 Kor. 14:40.

Wolo nɛɛ baaye abua bo koni onu bɔ ni Kristofoi asafo lɛ tsuɔ nii ehãa ŋmɛnɛ lɛ shishi. Abaawie hegbɛi ni oyɔɔ akɛ Yehowa Odasefonyo kɛ sɔ̃i ni otere lɛ ahe yɛ wolo nɛɛ mli. Kɛ́ ohiɛ sɔ hegbɛi ni oyɔɔ yɛ asafo lɛ mli lɛ, ni otsu sɔ̃i ni otere lɛ ahe nii lɛ, ‘ohe baawa yɛ hemɔkɛyeli lɛ mli.’​—Bɔf. 16:4, 5; Gal. 6:5.

No hewɔ lɛ, wɔmiiwo bo hewalɛ ni okase wolo nɛɛ jogbaŋŋ. Susumɔ shihilɛi amli ni obaanyɛ okɛ saji ni yɔɔ wolo nɛɛ mli lɛ atsu nii yɛ lɛ ahe. Akɛ nɔkwɛmɔnɔ lɛ, kɛ́ obatsɔ shiɛlɔ ni abaptisiko lɛ etsɛko lɛ, mɛɛ nibii esa akɛ ofee koni abaptisi bo ni obatsɔ Yehowa Odasefonyo? Ni kɛ́ abaptisi bo lɛ, mɛni obaanyɛ ofee koni ohe awa yɛ hemɔkɛyeli lɛ mli ni olɛɛ sɔɔmɔ ni okɛhãa Yehowa lɛ mli? (1 Tim. 4:15) Mɛni obaanyɛ ofee koni obaa toiŋjɔlɛ ni yɔɔ asafo lɛ mli lɛ yi? (2 Kor. 13:11) Taomɔ sanebimɔi nɛɛ ahetoo yɛ wolo nɛɛ mli.

Kɛ́ oji nuu ni abaptisi lɛ lɛ, mɛni obaanyɛ ofee koni onyɛ osɔmɔ akɛ asafoŋ sɔɔlɔ, ni sɛɛ mli hu lɛ, osɔmɔ akɛ asafoŋ onukpa? Akɛni mɛi hei akpei abɔ miike yuu kɛmiiba Nyɔŋmɔ asafo lɛ mli hewɔ lɛ, ehe ebahia ni aná nyɛmimɛi hii ni sa ni amɛnyiɛ hiɛ. Wolo nɛɛ baaye abua bo ni ona nɔ ni ebaabi ni ofee koni onyɛ oshɛ otii nɛɛ ahe.​—1 Tim. 3:1.

Wɔmiisɔle waa ni wolo nɛɛ aye abua bo koni ona nitsumɔi kɛ sɔ̃i ni obaanyɛ otsu he nii yɛ Yehowa asafo lɛ mli, ni obu hegbɛi nɛɛ akɛ jwetrii. Wɔsumɔɔ nyɛ fɛɛ jogbaŋŋ ni wɔbaaya nɔ wɔsɔle wɔhã nyɛ koni be ni yi aaawula shi lɛ, abu nyɛ afata mɛi ni kɛ miishɛɛ baasɔmɔ Yehowa, wɔ-Tsɛ ni yɔɔ ŋwɛi lɛ kɛya naanɔ lɛ ahe.​—Lala 37:10, 11; Yes. 65:21-25.