SANEBIMƆ 3
Te Mafee Tɛŋŋ Mikɛ Mifɔlɔi Agba Sane?
MƐNI OBAAFEE?
Feemɔ shihilɛ nɛɛ he mfoniri okwɛ: Gbi nɛɛ ji Shɔ gbɛkɛ. Geoff, ni eye afii 17 lɛ, egbe eshĩa nitsumɔi anaa; eetao ekɛ be ni eshwɛ lɛ ajɔɔ ehe fioo! Esu TV, kɛkɛ ni eho eta sɛi ni esumɔɔ waa lɛ mli.
Nɔŋŋ kɛkɛ ni epapa pue yɛ shinaa lɛ naa; enyaaa nɔ ni ena lɛ he.
Ekɛɛ: “Geoffrey! Mɛni hewɔ ofiteɔ obe kɛkwɛɔ TV be ni esa akɛ oyaye obua onyɛmi nuu fioo lɛ kɛfee ehomwɛk lɛ? Akɛko bo nɔ ko ni ofee pɛŋ!”
Geoff bɔi tɔkemɔ ni ekɛɛ: “Oje shishi ekoŋŋ.” Shi epapa nu.
Epapa tsi ebɛŋkɛ lɛ, ni ebi lɛ akɛ: “Owula mɛni okɛɛ lɛ?”
Geoff tũ ehiɛ ni ekɛɛ: “Dada mikɛko nɔ ko.”
Epapa mli fu waa agbɛnɛ, ni ekɛ hiɛdɔɔ kɛɛ: “Okɛ mi akawie nɛkɛ dɔŋŋ, bɛ onu!”
Kɛ́ bo ji Geoff lɛ, mɛni kulɛ obaafee koni nɔ ni ba nɛɛ akaba?
SUSUMƆ HE JOGBAŊŊ DÃ!
Abaanyɛ akɛ sanegbaa ni yaa nɔ yɛ okɛ ofɔlɔi ateŋ lɛ ato lɔle draivimɔ he. Kɛ́ oodraivi ni oyashɛ he ko ni atsĩ gbɛ lɛ, obaanyɛ otao he kroko otsɔ.
SUSUMƆ NƆKWƐMƆNƆ NƐƐ HE OKWƐ:
Oblayoo ko ni atsɛɔ lɛ Leah lɛ wie akɛ: “Minyɛɛɛ mikɛ mipapa agba sane. Bei komɛi lɛ, mawie saŋŋ dani sɛɛ mli lɛ ebaabi mi akɛ, ‘No mli lɛ okɛ mi miiwie?’”
KƐHOOO LƐ, LEAH BAANYƐ AHALA NIBII ETƐ NƐƐ ATEŊ EKOME.
A. Ebaabo ewo epapa.
Leah bo ekɛɛ, “Bo mi toi! Nɔ ni miwieɔ lɛ he miihia!”
B. Ebaafo sanegbaa lɛ sɛɛ.
Leah kpɛ eyiŋ akɛ egbaŋ ehe naa akɛ ekɛ epapa baawie enaagba lɛ he, koni sane ajɔ kɛkɛ.
D. Ebaamɛ koni yɛ be ni sa mli lɛ, ekɛ epapa awie sane lɛ he.
Sɛɛ mli lɛ, Leah yana epapa ni ekɛ lɛ wie, loo eŋma enaagba lɛ yɛ wolo nɔ ni ekɛhã epapa.
Te amɛteŋ nɔ ni obaawo Leah hewalɛ ni ekɔ lɛ?
SUSUMƆ ENƐ HE OKWƐ: No mli lɛ, Leah papa jwɛŋmɔ yɛ nɔ kroko nɔ, no hewɔ lɛ eyɔseee akɛ Leah ehao. Belɛ, kɛ́ Leah hala Klɛŋklɛŋ nɔ lɛ (A), epapa leŋ nɔ hewɔ ni eboɔ ewoɔ lɛ lɛ. Ekolɛ no hãŋ epapa abo lɛ toi, ni no baatsɔɔ akɛ Leah bɛ bulɛ kɛhã epapa loo ekɛ woo hãaa lɛ. (Efesobii 6:2) Ekã shi faŋŋ akɛ, kɛ́ ehala klɛŋklɛŋ nɔ lɛ, amɛteŋ mɔ ko mɔ ko naŋ he sɛɛ.
Bɔ ni kɛ́ ona akɛ atsĩ gbɛ lɛ, otaoɔ gbɛ kroko otsɔɔ nɔ lɛ, nakai nɔŋŋ obaanyɛ otao gbɛ kroko otsɔ nɔ okɛ ofɔlɔi agba sane
Eyɛ mli akɛ Nɔ ni ji enyɔ lɛ (B) feemɔ ebawaŋ kwraa moŋ, kɛ̃lɛ nilee bɛ mli kwraa. Nɔ hewɔ lɛ ji akɛ, dani Leah baanyɛ etsu naagbai ni ekɛkpeɔ lɛ ahe nii lɛ, esa akɛ ekɛ epapa agba he sane—ni dani epapa baanyɛ aye abua lɛ lɛ, ja ele naagbai ni Leah kɛkpeɔ lɛ dã. Kɛ́ efo sɛɛ ni ewieee he dɔŋŋ lɛ, enaŋ enaagbai lɛ anaa tsabaa.
Yɛ Nɔ ni ji etɛ lɛ (D) mli lɛ, Leah hãaa nɔ ni ba lɛ atsĩ enaa koni ekɛ epapa akawie enaagba lɛ he. Moŋ lɛ, eto akɛ ekɛ epapa baawie he sɛɛ mli. Ni kɛ́ ehala akɛ ebaaŋma wolo ni ekɛhã epapa lɛ, Leah tsui baanyɔ emli.
Kɛfata he lɛ, kɛ́ ekpɛ mli akɛ ebaaŋma wolo lɛ, no baaye abua lɛ koni eŋma nɔ tuuntu ni etaoɔ ekɛɛ epapa lɛ. Kɛ́ epapa kane lɛ, ebaana nɔ ni kulɛ Leah taoɔ ekɛɛ lɛ lɛ, ni no baahã ele naagba pɔtɛ̃ɛ ni Leah kɛkpeɔ lɛ. No hewɔ lɛ, kɛ́ Leah hala nɔ ni ji etɛ lɛ (D), ehe baaba sɛɛnamɔ kɛhã lɛ kɛ epapa fɛɛ. Kɛ́ Leah kɛ epapa wie hiɛ kɛ hiɛ jio, eŋma lɛ wolo jio lɛ, nɔ ni ehala nɛɛ kɛ Biblia mli ŋaawoo ni kɛɔ akɛ, ‘nyɛhãa wɔtiua nibii ni kɛ toiŋjɔlɛ baa lɛ sɛɛ’ lɛ kpãa gbee.—Romabii 14:19.
Mɛɛ nɔ kroko hu Leah baanyɛ afee?
Kwɛmɔ akɛ obaanyɛ otsɔɔ eko lo. No sɛɛ lɛ, tsɔɔmɔ nɔ ni baanyɛ ajɛ mli kɛba.
KAAHÃ OFƆLƆI NÁ SUSUMƆ KROKO
Kadimɔ akɛ, jeee be fɛɛ be kɛ́ owie nɔ ko lɛ, ofɔlɔi baanu nɔ tuuntu ni otaoɔ otsɔɔ lɛ shishi.
AKƐ NƆKWƐMƆNƆ LƐ:
Ofɔlɔi bi bo akɛ, “Mɛni hewɔ etamɔ nɔ ni obɛ miishɛɛ nɛkɛ?” Ni ohã amɛ hetoo akɛ, “Misumɔɔɔ ni mawie enɛ he.”
Shi ofɔlɔi nu shishi akɛ, oootao ni otsɔɔ akɛ: “Mibɛ hekɛnɔfɔɔ yɛ nyɛmli bɔ ni manyɛ mikɛ nyɛ agba minaagba lɛ he sane. Mikɛ minanemɛi moŋ baagba he sane.”
Ŋɔɔ lɛ akɛ, okɛ naagba ko ni mli wa miikpe, ni ofɔlɔi kɛɛ amɛbaasumɔ ni amɛye amɛbua bo. Shi okɛɛ amɛ akɛ: “Nyɛkagbaa nyɛhe naa, mi diɛŋtsɛ manyɛ matsu he nii.”
Mɛni ofɔlɔi baanyɛ asusu akɛ otsɔɔ lɛ?
Mɛɛ hetoo ni sa kulɛ esa akɛ okɛhã?