NIKASEMƆ 8
Abraham Kɛ Sara Bo Nyɔŋmɔ Toi
No mli lɛ, maŋ ko bɛŋkɛ Babel, ni atsɛɔ lɛ Ur. Mɛi ni yɔɔ Ur lɛ jáaa Yehowa, amɛjáa amale nyɔŋmɔi babaoo. Shi nuu ko yɛ jɛmɛ ni jáa Yehowa pɛ. Atsɛɔ lɛ Abraham.
Yehowa kɛɛ Abraham akɛ: ‘Fãa oshi oshĩa kɛ owekumɛi lɛ, ni oya he ni matsɔɔ bo lɛ.’ Nyɔŋmɔ wo lɛ shi akɛ: ‘Obaatsɔ maŋ wulu, ni ohewɔ lɛ, mafee nibii kpakpai mahã mɛi pii yɛ shikpɔŋ lɛ nɔ hei srɔtoi fɛɛ.’
No mli lɛ, Abraham leee he ni Yehowa kɛɛ eya lɛ, shi ehe Yehowa nɔ eye. No hewɔ lɛ, Abraham, eŋa Sara, epapa Tera, kɛ enyɛmi bi Lot to amɛ nibii fɛɛ ni amɛje gbɛfãa kakadaŋŋ lɛ shishi.
Be ni Abraham kɛ eweku lɛ yashɛ maŋ ni Yehowa kɛɛ amɛya nɔ lɛ nɔ lɛ, no mli lɛ, eye afii 75. Atsɛɔ nakai maŋ lɛ Kanaan. Jɛmɛ hu Nyɔŋmɔ wo Abraham shi akɛ: ‘Mikɛ shikpɔŋ ni onaa nɛɛ baahã obii fɛɛ.’ Shi no mli lɛ, Abraham kɛ Sara egbɔlɔ ni amɛbɛ bi kome po. No hewɔ lɛ, mɛɛ gbɛ nɔ Yehowa shiwoo lɛ baaba mli?
“Hemɔkɛyeli Abraham kɛbo Nyɔŋmɔ toi . . . , ni eyiŋ etee he ni enine baashɛ gboshinii ko nɔ yɛ lɛ; eyiŋ etee, eyɛ mli akɛ eleee he ni eyaa.”—Hebribii 11:8