Kaimɔ Lot Ŋa Lɛ

Lot kɛ epapa nyɛmi nuu Abraham hi shi yɛ Kanaan. Sɛɛ mli lɛ, Abraham kɛ Lot fɛɛ baná kooloi babaoo. Amɛkooloi lɛ ayi bafa aahu akɛ, shikpɔŋ lɛ edaaa ehãaa amɛ dɔŋŋ. No hewɔ lɛ, Abraham kɛɛ Lot akɛ: ‘Wɔnyɛŋ wɔhi he kome. Ofainɛ, kwɛmɔ shikpɔŋ lɛ he ni obaasumɔ ni oyahi ni oya jɛmɛ, koni mi hu mahi he kroko lɛ.’ Enɛ hãa wɔnaa akɛ, Abraham susuuu lɛ pɛ ehe, aloo jeee nakai?

Lot kwɛ shikpɔŋ lɛ fɛɛ ni ena he ko ni yɔɔ fɛo waa ni bɛŋkɛ maŋ ko ni atsɛɔ lɛ Sodom lɛ. Ena akɛ nu kɛ kooloi aniyenii babaoo yɛ jɛmɛ. No hewɔ lɛ, ekɔ nakai shikpɔŋ lɛ, ni ekɛ eweku lɛ fɛɛ yahi jɛmɛ. Sɛɛ mli lɛ, amɛyahi Sodom maŋ lɛ mli.

Maŋ kroko ko bɛŋkɛ Sodom, ni atsɛɔ maŋ nɛɛ Gomora. Maji enyɔ nɛɛ amli bii lɛ fee nibii gbohii waa. Enɛ hewɔ lɛ, Yehowa kpɛ eyiŋ akɛ ebaagbe amɛ. Shi Nyɔŋmɔ sumɔɔɔ ni egbeɔ Lot kɛ eweku lɛ. No hewɔ lɛ, etsu ŋwɛibɔfoi enyɔ ni amɛyakɛɛ amɛ akɛ: ‘Nyɛfea oya ni nyɛshia maŋ nɛɛ mli! Yehowa miiba ebafite maŋ lɛ.’

Shi Lot shiii nɔŋŋ. Etee nɔ ehi maŋ lɛ mli. No hewɔ lɛ, ŋwɛibɔfoi lɛ mɔ lɛ, eŋa lɛ, kɛ amɛbiyei enyɔ lɛ anine shi, ni amɛkɛ amɛ je kpo kɛshi maŋ lɛ mli oya. Amɛkɛɛ amɛ akɛ: ‘Nyɛjoa foi koni akagbe nyɛ! Ni nyɛkakwɛa nyɛsɛɛ. Kɛ́ nyɛkwɛ nyɛsɛɛ lɛ, nyɛbaagboi!’

Be ni amɛyashɛ maŋ ni atsɛɔ lɛ Zoar lɛ, Yehowa hã la kɛ sɔlfa jɛ ŋwɛi ebashã Sodom kɛ Gomora. Nakai maji enyɔ lɛ ahiɛ kpãtã kwraa. Lot ŋa lɛ booo Yehowa toi. Ekwɛ esɛɛ, ni etsɔ ŋookpɔ kɛma shi! Edɔ Lot kɛ ebiyei lɛ waa akɛ eŋa lɛ booo Yehowa toi. Shi akɛni amɛ lɛ amɛbo Yehowa toi hewɔ lɛ, akpãtãaa amɛhiɛ, ni enɛ hã amɛná miishɛɛ waa.