Yesu Lɛ Mɛi Akpei Abɔ

Be ko lɛ, bɔfoi lɛ tee amɛyashiɛ, ni be ni amɛku amɛsɛɛ lɛ, etɔ amɛ waa. No mli lɛ, eshwɛ fioo ni abaaye afi 32 Ŋ.B. Hehoo lɛ. Be ni amɛba lɛ, Yesu hã amɛkɛ lɛlɛ fã gbɛ koni amɛyajɔɔ amɛhe yɛ Betsaida. Shi be ni eshwɛ fioo ni amɛbaashɛ lɛ, Yesu na akɛ mɛi akpei abɔ etsɔ amɛhiɛ kɛtee jɛmɛ ni amɛmiimɛ amɛ. Eyɛ mli akɛ no mli lɛ Yesu miitao ni ekɛ ekaselɔi lɛ pɛ ahi jɛmɛ moŋ, shi eshwieee mɛi lɛ. Etsa amɛteŋ mɛi ni bɛ hewalɛ lɛ, ni ebɔi amɛ nitsɔɔmɔ. Yesu tsɔɔ amɛ Nyɔŋmɔ Maŋtsɛyeli lɛ he nii gbi muu lɛ fɛɛ. Be ni je na lɛ, bɔfoi lɛ ba Yesu ŋɔɔ amɛbakɛɛ lɛ akɛ: ‘Benɛ nɛɛ hɔmɔ miiye mɛi lɛ. Hã amɛya koni amɛyatao nɔ ko amɛye.’

Yesu kɛɛ amɛ akɛ: ‘Ehe ehiaaa ni amɛya. Nyɛhãa amɛ nɔ ko amɛyea.’ Bɔfoi lɛ bi lɛ akɛ: ‘Ani ootao wɔyahé blodo wɔbahã amɛ?’ Amɛteŋ mɔ kome ni atsɛɔ lɛ Filipo lɛ wie akɛ: ‘Kɛ́ wɔyɛ shika pii po lɛ, nɛgbɛ wɔbaaná blodo babaoo yɛ wɔhã mɛi pii nɛɛ?’

Yesu bi bɔfoi lɛ akɛ: ‘Mɛɛ niyenii wɔyɔɔ yɛ jɛmɛ?’ Andrea kɛɛ lɛ akɛ: ‘Wɔyɛ blodoi enumɔ kɛ nu mli loi bibii enyɔ. Eshɛŋ mɛi lɛ kwraa.’ Yesu kɛɛ akɛ: ‘Nyɛkɛ blodoi lɛ kɛ loi lɛ abahãa mi.’ Ehã mɛi lɛ tara shi yɛ kui amli, ni mɛi aaafee 50 loo 100 yɔɔ kui lɛ eko fɛɛ eko mli. Yesu kɔlɔ blodoi lɛ kɛ loi lɛ, ewó ehiɛ nɔ ekwɛ ŋwɛi, ni esɔle. Kɛkɛ ni ekɛhã ebɔfoi lɛ ni bɔfoi lɛ hu kɛhã mɛi lɛ. Hii 5,000 kɛ yei kɛ gbekɛbii lɛ fɛɛ ye ni amɛtɔrɔ. No sɛɛ lɛ, bɔfoi lɛ bua niyenii ni eshwɛ lɛ naa koni eko akafite. Be ni amɛbua naa lɛ, amɛná kɛntɛŋi 12 sɔŋŋ obɔbɔ! Nɔ ni Yesu fee lɛ yɛ naakpɛɛ waa, aloo onaaa nakai?

Mɛi lɛ ná nɔ ni Yesu fee lɛ he miishɛɛ waa, no hewɔ lɛ kulɛ amɛmiitao amɛwó lɛ maŋtsɛ. Shi Yesu le akɛ be ni Yehowa eto ni ekɛbaawó lɛ maŋtsɛ lɛ shɛko. No hewɔ lɛ, ehã mɛi lɛ tee shĩa, ni ekɛɛ ebɔfoi lɛ akɛ amɛfo Galilea Ŋshɔ lɛ kɛya ŋshɔ lɛ sɛɛgbɛ. Bɔfoi lɛ bote lɛlɛ lɛ mli, ni Yesu kome too tee gɔŋ ko nɔ. Mɛni etee feemɔ yɛ jɛmɛ? Etee koni eyasɔle ehã Yehowa, e-Tsɛ ni yɔɔ ŋwɛi lɛ. Yesu bɛ dekã kwraa, shi etao be esɔle daa.