Yesu Nyiɛ Nu Hiɛ

Yesu tsa helai ni etee gbohii ashi. Shi ani ole akɛ enyɛ ená kɔɔyɔɔ lɛ kɛ nugbɔ hu nɔ hewalɛ? Be ni Yesu sɔle yɛ gɔŋ lɛ nɔ egbe naa lɛ, ekwɛ Galilea Ŋshɔ lɛ, ni ena akɛ ahum ko miitswa. Bɔfoi lɛ ta amɛlɛlɛ lɛ mli, ni eetɔ amɛ kɛ lɛlɛ lɛ kudɔmɔ, ejaakɛ amɛmiikpee kɔɔyɔɔ. Yesu kpeleke shi kɛjɛ gɔŋ lɛ nɔ, ni enyiɛ nu lɛ hiɛ kɛbɛŋkɛ amɛlɛlɛ lɛ. Be ni bɔfoi lɛ na mɔ ko nyiɛ nu lɛ hiɛ lɛ, amɛshe gbeyei waa. Shi Yesu kɛɛ amɛ akɛ: ‘Mi ni; nyɛkashea gbeyei.’

Petro kɛɛ lɛ akɛ: ‘Nuŋtsɔ, kɛ́ bo ni lɛɛlɛŋ lɛ, fã mi koni maba oŋɔɔ.’ Yesu here nɔ akɛ: ‘Ba miŋɔɔ.’ No hewɔ lɛ, Petro kpeleke shi kɛje lɛlɛ lɛ mli be ni ahum lɛ kã he etswaa lɛ, ni enyiɛ nu lɛ hiɛ akɛ eeya Yesu ŋɔɔ. Shi be ni ebɛŋkɛ Yesu lɛ, ekwɛ ahum lɛ ni eshe gbeyei. Petro bɔi shiumɔ. No hewɔ lɛ, ebo ekɛɛ Yesu akɛ: ‘Nuŋtsɔ, heremɔ mi!’ Yesu mɔ enine mli, ni ekɛɛ lɛ akɛ: ‘Mɛni hewɔ ohã oyiŋ fee bo kɔshikɔshi? Ani obɛ hemɔkɛyeli ko kwraa?’

Be ni Yesu kɛ Petro kwɔ lɛlɛ lɛ, ahum lɛ kpa tswaa amrɔ nɔŋŋ. Kɛ́ okwɛ lɛ, te bɔfoi lɛ baanu he amɛhã tɛŋŋ? Amɛwie akɛ: “Nyɔŋmɔ Bi ji bo lɛɛlɛŋ.”

Shi jeee sane nɛɛ pɛ tsɔɔ akɛ Yesu nyɛ ená kɔɔyɔŋ tsakemɔ nɔ hewalɛ. Naa sane kroko ni tsɔɔ nakai. Be ko lɛ, Yesu kɛ bɔfoi lɛ yɛ lɛlɛ mli ni amɛmiifo ŋshɔ lɛ. Yesu tee lɛlɛ lɛ sɛɛgbɛ ni eyakã shi ewɔ. Be ni ewɔɔ lɛ, ahum kpele ko bɔi tswaa. Ŋshɔkei kumɔ wo lɛlɛ lɛ mli, ni lɛlɛ lɛ mli yi kɛ nu. Bɔfoi lɛ tsĩɛ Yesu, ni amɛbolɔ akɛ: ‘Tsɔɔlɔ, wɔbaagboi! Heremɔ wɔ!’ Yesu te shi ni ekɛɛ ŋshɔ lɛ akɛ: “Feemɔ diŋŋ!” Amrɔ nɔŋŋ lɛ, kɔɔyɔɔ lɛ kpa tswaa, ni ŋshɔ lɛ efeee hamahama dɔŋŋ. Yesu bi bɔfoi lɛ akɛ: ‘Ani nyɛbɛ hemɔkɛyeli ko kwraa?’ Bɔfoi lɛ kɛɛkɛɛ amɛhe akɛ: “Kɔɔyɔɔ kɛ ŋshɔ po boɔ lɛ toi.” Amɛkase akɛ, kɛ́ amɛhe Yesu amɛye kɛ amɛtsui fɛɛ lɛ, nɔ ko bɛ ni baawo amɛhe gbeyei.