Petro Kɛɛ Eleee Yesu

Be ni Yesu kɛ ebɔfoi lɛ yɔɔ ŋwɛitsu lɛ nɔ lɛ, ekɛɛ amɛ akɛ: ‘Gbɛkɛ nɛɛ, nyɛ fɛɛ nyɛbaajo foi nyɛshi mi.’ Petro wie akɛ: ‘Mi lɛ, mifeŋ nakai! Kɛ́ mɛi krokomɛi lɛ fɛɛ baashi bo po lɛ, mishiŋ bo.’ Shi Yesu kɛɛ lɛ akɛ: ‘Dani wuɔ baagbɛɛ lɛ, obaawie shii etɛ akɛ oleee mi.’

Be ni asraafoi lɛ kɛ Yesu yaa Kaiafa shĩa lɛ, no mli lɛ bɔfoi lɛ ateŋ mɛi babaoo ejo foi amɛshi lɛ. Shi amɛteŋ mɛi enyɔ futu mɛi lɛ kɛnyiɛ asraafoi lɛ asɛɛ kɛtee. Mɔ kome ji Petro. Be ni amɛshɛ Kaiafa shĩa lɛ, Petro tee kpo lɛ nɔ. No mli lɛ ashɛre la yɛ jɛmɛ, ni etee eyadamɔ he koni fɛ̃i akaye lɛ. Bɔ ni jɛmɛ kpɛɔ lɛ hewɔ lɛ, gbekɛ yoo ko ni ji tsulɔ lɛ na ehiɛ ni ekɛɛ lɛ akɛ: ‘Mile bo! No mli lɛ okɛ Yesu nyiɛɔ!’

Petro wie akɛ: ‘Dabi, jeee mi ni! Mileee nɔ ni owieɔ lɛ he nɔ ko!’ Kɛkɛ ni ekɛ ehiɛ tsɔɔ geeti lɛ naa. Shi etsɛɛɛ ni gbekɛ yoo kroko ni ji tsulɔ lɛ na lɛ ni ekɛɛ mɛi lɛ akɛ: ‘Nuu nɛɛ kɛ Yesu yɔɔ!’ Petro wie akɛ: ‘Yesu lɛ po, mileee lɛ!’ Nuu ko hu wie akɛ: ‘Ofata amɛhe! Owiemɔ po tsɔɔ akɛ Galileanyo ji bo tamɔ Yesu nɔŋŋ.’ Shi Petro kã kita ekɛɛ: ‘Mileee lɛ!’

Amrɔ nɔŋŋ lɛ, wuɔ gbɛɛ. Petro na akɛ Yesu etsɔ ehiɛ ebakwɛ lɛ. Kɛkɛ ni ekai nɔ ni Yesu kɛɛ lɛ lɛ, ni eje kpo kɛtee agbo lɛ naa eyafo aahu.

Nakai gbɛkɛ lɛ nɔŋŋ lɛ, Sanhedrin lɛ bua amɛhe naa yɛ Kaiafa shĩa lɛ koni amɛye Yesu sane. No mli lɛ, amɛkpɛ amɛyiŋ momo akɛ amɛbaagbe lɛ. Shi agbɛnɛ lɛ, eshwɛ nɔ ni amɛbaadamɔ nɔ amɛfee nakai. Amɛnáaa nɔ fɔŋ ko yɛ ehe ni amɛbaadamɔ nɔ amɛwie akɛ gbɔmɔ fɔŋ ji lɛ. Naagbee lɛ, Kaiafa bi Yesu tɛ̃ɛ akɛ: ‘Ani bo ji Nyɔŋmɔ Bi lɛ?’ Yesu kɛɛ lɛ akɛ: ‘Mi ni.’ Kaiafa wie akɛ: ‘Obuuu Nyɔŋmɔ! Odaseyeli ko he ehiaaa wɔ dɔŋŋ.’ Mɛi lɛ fɛɛ kpɛlɛ nɔ, ni amɛwie akɛ: ‘Nuu nɛɛ sa gbele.’ Amɛgbala ehiɛ mai, ni amɛtsɛ̃ lajɔ̃ amɛshwie ehe. Amɛha ehiɛ ni amɛmamɔ lɛ atswɛrɛi ni amɛkɛɛ lɛ akɛ: ‘Kɛ́ gbalɔ ji bo lɛ, tsɔɔmɔ wɔ mɔ ni ma bo atswɛrɛ lɛ!’

Be ni je tsɛre lɛ, amɛkɛ Yesu tee he ni Sanhedrin lɛ kpeɔ yɛ lɛ, ni amɛbi lɛ ekoŋŋ akɛ: ‘Ani bo ji Nyɔŋmɔ Bi lɛ?’ Yesu hã hetoo akɛ: ‘Nyɛ diɛŋtsɛ nyɛwie akɛ mi ni.’ Enɛ ni ewie lɛ hewɔ lɛ, amɛbu lɛ fɔ akɛ ebuuu Nyɔŋmɔ, ni amɛkɛ lɛ tee Roma amralo Pontio Pilato shĩa lɛ. Ani ole nɔ ni ba yɛ jɛmɛ? Hã wɔkwɛ.