NIKASEMƆ 26
Mɛni Hewɔ Nibii Fɔji Baa Ni Mɛi Naa Nɔ Hu Lɛ?
Kɛ́ sane fɔŋ ko ba lɛ, nɔ ni mɛi fɔɔ bimɔ ji akɛ, “Mɛɛba?” Miishɛɛ sane ji akɛ, Biblia lɛ kɛ sanebimɔ nɛɛ hetoo ni yɔɔ faŋŋ ehã!
1. Mɛɛ gbɛ nɔ Satan hã abɔi nibii fɔji feemɔ?
Satan Abonsam tse Nyɔŋmɔ hiɛ atua. Satan miisumɔ ni eye mɛi anɔ, hewɔ lɛ, elaka Adam kɛ Hawa, ni ji gbɔmɛi ni abɔ klɛŋklɛŋ lɛ, koni amɛ hu amɛtse Nyɔŋmɔ hiɛ atua. Satan male Hawa, ni no hã enyɛ efee nakai. (1 Mose 3:1-5) Satan hã Hawa nu he akɛ Yehowa kɛ nɔ ko kpakpa ko miitee lɛ. Nɔ ni ekɛɛ Hawa lɛ tsɔɔ akɛ, kɛ́ adesai gbo Nyɔŋmɔ nɔ toi lɛ, no baahã amɛná miishɛɛ waa. Satan kɛɛ Hawa akɛ egboŋ, ni enɛ ji klɛŋklɛŋ amale. Enɛ hewɔ lɛ, Biblia lɛ tsɛɔ Satan akɛ “amalelɔ kɛ malemɔ tsɛ.”—Yohane 8:44.
2. Mɛni Adam kɛ Hawa hala akɛ amɛbaafee?
Yehowa fee Adam kɛ Hawa ejurɔ waa. Ekɛɛ amɛbaanyɛ amɛye tsei fɛɛ ni yɔɔ Eden abɔɔ lɛ mli lɛ anɔ yibii lɛ, ja ekome pɛ kɛkɛ. (1 Mose 2:15-17) Shi loloolo lɛ, amɛkpɛ amɛyiŋ akɛ amɛbaaye nakai tso lɛ nɔ yibii lɛ eko. Hawa ‘tse enɔ yibii lɛ eko ni ebɔi yeli.’ Sɛɛ mli lɛ, Adam hu ‘bɔi yeli.’ (1 Mose 3:6) Amɛ fɛɛ amɛgbo Nyɔŋmɔ nɔ toi. Akɛni Adam kɛ Hawa eye emuu hewɔ lɛ, ewaaa kwraa kɛhãaa amɛ akɛ amɛbaafee nɔ ni ja. Shi amɛkpɛ amɛyiŋ akɛ amɛbaagbo Nyɔŋmɔ nɔ toi. Nɔ ni amɛfee lɛ ji esha, ni etsɔɔ hu akɛ, amɛsumɔɔɔ ni Nyɔŋmɔ tsɔɔ amɛ nɔ ni hi kɛ nɔ ni ehiii. Yiŋ ni amɛkpɛ nɛɛ hã amɛna nɔ waa.—1 Mose 3:16-19.
3. Mɛɛ gbɛ nɔ yiŋ ni Adam kɛ Hawa kpɛ lɛ esa wɔhe?
Be ni Adam kɛ Hawa fee esha lɛ, amɛbatsɔmɔ mɛi ni yeee emuu, ni no hewɔ lɛ, amɛseshibii lɛ fɛɛ hu yeee emuu. Biblia lɛ wie yɛ Adam he akɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ.”—Romabii 5:12.
Mɛni hewɔ wɔnaa nɔ? Wɔnaa nɔ yɛ yiŋtoi srɔtoi ahewɔ. Bei komɛi lɛ, wɔnaa nɔ yɛ yiŋ gbohii komɛi ni wɔ diɛŋtsɛ wɔkpɛɔ lɛ hewɔ. Bei komɛi hu lɛ, wɔnaa nɔ yɛ yiŋ gbohii ni mɛi krokomɛi kpɛɔ lɛ hewɔ. Ni bei komɛi hu lɛ, wɔnaa nɔ akɛni wɔyajeɔ he ko ni esaaa yɛ be ni esaaa mli lɛ hewɔ.—Kanemɔ Jajelɔ 9:11.
KASEMƆ PII OFATA HE
Obaana nɔ hewɔ ni jeee Nyɔŋmɔ ji mɔ ni hãa nibii fɔji baa ni wɔnaa nɔ hu lɛ, kɛ agbɛnɛ hu, bɔ ni enuɔ he ehãa kɛ́ wɔmiina nɔ.
4. Mɔ ni hãa wɔnaa nɔ lɛ
Mɛi pii susuɔ akɛ Nyɔŋmɔ ji mɔ ni kudɔɔ je lɛ. Ani eji anɔkwale? Jiemɔ VIDIO lɛ.
Nyɛkanea Yakobo 1:13 kɛ 1 Yohane 5:19 lɛ, ni nyɛsusua sanebimɔ nɛɛ he:
Ani Nyɔŋmɔ ji mɔ ni hãa nibii fɔji baa ni wɔnaa nɔ hu lɛ?
5. Kɛjɛ be ni Satan bɔi nɔyeli lɛ, mɛni eba?
Nyɛkanea 1 Mose 3:1-6 lɛ, ni nyɛsusua sanebimɔi nɛɛ ahe:
Mɛɛ amale Satan male?—Kwɛmɔ kuku 4 kɛ 5 lɛ.
Mɛni Satan wie ni tsɔɔ akɛ, Yehowa kɛ nɔ ko kpakpa ko miitee adesai?
Bɔ ni Satan tsɔɔ lɛ naa lɛ, ani ehe miihia ni Yehowa aye adesai anɔ dani amɛná miishɛɛ?
Nyɛkanea Jajelɔ 8:9 lɛ, ni nyɛsusua sanebimɔ nɛɛ he:
Kɛjɛ be ni Yehowa kpa je lɛ nɔyeli nɛɛ, mɛni eba?
A. Adam kɛ Hawa hi Paradeiso, ni no mli lɛ, amɛye emuu. Shi amɛbo Satan toi, ni amɛtse Yehowa hiɛ atua
B. Yɛ atuatsemɔ lɛ sɛɛ lɛ, je lɛ mli bayi kɛ esha, nɔnaa, kɛ gbele
D. Yehowa baafo esha, nɔnaa, kɛ gbele sɛɛ. Kɛkɛ lɛ, adesai baaye emuu ekoŋŋ, ni amɛbaahi Paradeiso
6. Kɛ́ wɔmiina nɔ lɛ, egbaa Yehowa naa
Kɛ́ wɔmiina nɔ lɛ, ani eshiii Nyɔŋmɔ kpu po? Naa nɔ ni Maŋtsɛ David kɛ bɔfo Petro ŋma. Nyɛkanea Lala 31:7 kɛ 1 Petro 5:7 lɛ, ni nyɛsusua sanebimɔ nɛɛ he:
Te le ni ole akɛ Yehowa naa omanehulu lɛ ni ejwɛŋɔ ohe lɛ, hãa onuɔ he ohãa tɛŋŋ?
7. Nyɔŋmɔ baafo adesai anɔnaa fɛɛ sɛɛ
Nyɛkanea Yesaia 65:17 kɛ Kpojiemɔ 21:3, 4 lɛ, ni nyɛsusua sanebimɔ nɛɛ he:
Te le ni ole akɛ Yehowa baafo adesai anɔnaa fɛɛ sɛɛ lɛ, hãa onuɔ he ohãa tɛŋŋ?
Ani ole akɛ . . .
be ni Satan male klɛŋklɛŋ amale lɛ, egbe Yehowa he guɔ? Ni tsɔɔ akɛ, efite Yehowa gbɛ́i akɛ ejeee Nɔyelɔ kpakpa ni yɔɔ suɔmɔ. Etsɛŋ, Yehowa baafo adesai anɔnaa sɛɛ, ni ekɛ no baatse egbɛ́i lɛ he. Kɛ́ wɔɔkɛɛ lɛ, ebaahã ana akɛ, enɔyeli lɛ ji nɔ ni hi fe fɛɛ. Yehowa gbɛ́i lɛ he ni abaatse lɛ ji sane ko ni he hiaa waa diɛŋtsɛ.—Mateo 6:9, 10.
MƐI KOMƐI KƐƆ AKƐ: “Nyɔŋmɔ hãa wɔnaa nɔ koni ekɛka wɔ ekwɛ.”
Mɛni obaakɛɛ amɛ?
EMLI OTI
Satan Abonsam kɛ Adam kɛ Hawa ji mɛi titri ni ehã wɔnaa nɔ yɛ je lɛ mli lɛ. Kɛ́ wɔmiina nɔ lɛ, egbaa Yehowa naa waa, ni etsɛŋ, ebaafo fɛɛ sɛɛ.
Mɛni Okase?
Mɛɛ malemɔ Satan Abonsam male Hawa?
Mɛɛ gbɛ nɔ Adam kɛ Hawa atuatsemɔ lɛ esa wɔ fɛɛ wɔhe?
Te wɔfeɔ tɛŋŋ wɔleɔ akɛ kɛ́ wɔmiina nɔ lɛ, egbaa Yehowa naa lɛ?
EHE SAJI KROKOMƐI
Obaana nɔ ni Biblia lɛ tsɔɔ akɛ no ji esha.
Obaana sane ni Satan Abonsam tee lɛ shi yɛ Eden abɔɔ lɛ mli lɛ he saji krokomɛi.
“Mɛni Hewɔ Nyɔŋmɔ Ŋmɛɔ Piŋmɔ Gbɛ?” (Buu-Mɔɔ, January 1, 2014)
Obaana sanebimɔ ko ni wa lɛ hetoi ni shɛjeɔ mɔ mii.
“Mɛni Hewɔ Kulɛ Ayaabule Yudafoi Lɛ Ashishi Lɛ? Mɛni Hewɔ Nyɔŋmɔ Etsĩii Naa Lɛ?” (jw.org lɛ nɔ sane)
Obaana nɔ ni nuu ko kase yɛ nibii gbohii ni ena lɛ he.