NIKASEMƆ 29

Kɛ́ Mɔ Ko Gbo Lɛ, Nɛgbɛ Eyaa?

Nɔ Ni Aprinti

Ani mɔ ko ni osumɔɔ esane waa egbo? Kɛ́ okɛ shihilɛ ni naa wa nɛɛ eko kpe lɛ, ekolɛ obaabi ohe akɛ: ‘Kɛ́ mɔ ko gbo lɛ, nɛgbɛ eyaa? Ani wɔbaana wɔsuɔlɔi ni egboi lɛ ekoŋŋ?’ Obaana hetoi ni shɛjeɔ mɔ mii ni Biblia lɛ kɛhãa yɛ nikasemɔ nɛɛ kɛ nɔ ni nyiɛ sɛɛ lɛ mli.

1. Kɛ́ mɔ ko gbo lɛ, ani ele nɔ ni yaa nɔ?

Yesu kɛ gbele to wɔ ni tsii he. Kɛ́ wɔ ni tsii nyɔ mɔ ko nɔ lɛ, eleee nɔ ni yaa nɔ yɛ he ni ekã lɛ. Mɛɛ gbɛ nɔ gbele tamɔ wɔ nɔŋŋ? Kɛ́ mɔ ko gbo lɛ, enuuu nɔ ko nɔ ko he. Ni ekɔɔɔ he eko bɔ ni esumɔɔ enanemɛi kɛ eweku lɛ hã lɛ, enuŋ shoofeemɔ he, ejaakɛ Biblia lɛ kɛɛ: “Mɛi ni egboi lɛ leee nɔ ko nɔ ko kwraa.”—Kanemɔ Jajelɔ 9:5.

2. Kɛ́ wɔle anɔkwale ni kɔɔ gbele he lɛ, mɛɛ gbɛ nɔ ebaawa wɔ?

Mɛi pii sheɔ gbele gbeyei—ni amɛsheɔ mɛi ni egboi lɛ po gbeyei! Shi nɔ ni Biblia lɛ kɛɔ yɛ gbele he lɛ baashɛje omii waa. Yesu wie akɛ: “Anɔkwale lɛ baahã nyɛye nyɛhe.” (Yohane 8:32) Jamɔi komɛi tsɔɔ akɛ, nɔ ko yɛ wɔmli ni yaa nɔ ehiɔ shi yɛ wɔgbele sɛɛ, shi jeee nakai kwraa Biblia lɛ tsɔɔ. No hewɔ lɛ, mɔ ko mɔ ko piŋŋ kɛ́ egbo. Agbɛnɛ hu, akɛni gbohii lɛ leee nɔ ko nɔ ko hewɔ lɛ, amɛnyɛŋ amɛfee wɔ nɔ ko. Enɛ hewɔ lɛ, ehe ehiaaa ni wɔjá gbohii lɛ loo wɔfee kusum ko koni amɛmli akafu wɔ, ni ehe ehiaaa hu ni wɔsɔle wɔhã amɛ.

Mɛi komɛi kɛɛ amɛnyɛɔ amɛkɛ gbohii lɛ wieɔ. Shi ejeee anɔkwale. Tamɔ wɔna lɛ, gbohii lɛ “leee nɔ ko nɔ ko kwraa.” Kɛ́ mɔ ko susuɔ akɛ enyɛɔ ekɛ gbohii wieɔ lɛ, yɛ anɔkwale mli lɛ, daimonioi ni amɛkwa amɛfee amɛhe mɛi ni egboi lɛ ekɛwieɔ lɛ. Hewɔ lɛ, kɛ́ wɔle anɔkwale ni kɔɔ gbele he lɛ, ebuɔ wɔhe kɛjeɔ daimonioi lɛ ahe. Yehowa ebɔ wɔ kɔkɔ akɛ wɔkɛ gbohii lɛ akawie, ejaakɛ ele akɛ kɛ́ wɔkɛ daimonioi lɛ shãra lɛ, no baaye wɔ awui.—Kanemɔ 5 Mose 18:10-12.

KASEMƆ PII OFATA HE

Obaana saji krokomɛi ni Biblia lɛ ewie yɛ gbele he, ni no baahã ohe Nyɔŋmɔ ni yɔɔ suɔmɔ, ni piŋŋ mɛi ni egboi lɛ oye waa.

Nuu ko ŋa egbo, ni aafee yara lɛ ni nuu lɛ kɛ ebii bibii enyɔ tara sɛi nɔ. Nanemɛi kɛ wekumɛi eba koni amɛbashɛje amɛmii ni amɛwa amɛ.

3. Mɛɛ shihilɛ tuuntu mli gbohii lɛ yɔɔ?

Yɛ je lɛŋ fɛɛ lɛ, mɛi hiɛ susumɔi srɔtoisrɔtoi yɛ shihilɛ mli ni gbohii lɛ yɔɔ lɛ he. Shi jeee susumɔi nɛɛ fɛɛ ji anɔkwale.

Yɛ he ni oyɔɔ lɛ, mɛɛ susumɔi mɛi hiɛ yɛ shihilɛ mli ni gbohii lɛ yɔɔ lɛ he?

Bɔ ni afee ni ona nɔ ni Biblia lɛ tsɔɔ lɛ, jiemɔ VIDIO lɛ.

VIDIO: Mɛɛ Shihilɛ Mli Gbohii Lɛ Yɔɔ?—Vidio Lɛ Fã Ko (1:19)

Mfonirii ni ato naa: Vidio ni ji, ‘Mɛɛ Shihilɛ Mli Gbohii Lɛ Yɔɔ?—Vidio Lɛ Fã Ko’ lɛ mli mfonirii komɛi. 1. Mɔ ko egbo yɛ helatsamɔhe. 2. Nuu ko ni kɛ oketeke miifa gbɛ ta mɛi enyɔ ateŋ ewɔ.

Nyɛkanea Jajelɔ 3:20 lɛ, ni nyɛsusua sanebimɔi nɛɛ ahe:

Yɛ ŋmalɛ nɛɛ naa lɛ, kɛ́ mɔ ko gbo lɛ, nɛgbɛ eyaa?
Ani nɔ ko yɛ mɔ lɛ mli ni yaa nɔ ehiɔ shi yɛ egbele sɛɛ?

Yesu naanyo kpaakpa ko ni atsɛɔ lɛ Lazaro lɛ gbele he sane yɛ Biblia lɛ mli. Be ni nyɛkaneɔ Yohane 11:11-14 lɛ, kwɛmɔ bɔ ni Yesu wie shihilɛ mli ni Lazaro yaje lɛ he ehã. No sɛɛ lɛ, nyɛsusua sanebimɔi nɛɛ ahe:

Mɛni he Yesu kɛ gbele to?
Mɛni enɛ tsɔɔ wɔ yɛ shihilɛ mli ni gbohii lɛ yɔɔ lɛ he?
Te onaa nɔ ni Biblia lɛ tsɔɔ yɛ shihilɛ mli ni gbohii lɛ yɔɔ lɛ he lɛ ohãa tɛŋŋ?

4. Kɛ́ wɔle anɔkwale ni kɔɔ gbele he lɛ, ewaa wɔ

Kɛ́ wɔle anɔkwale ni kɔɔ gbele he lɛ, wɔsheee gbohii lɛ gbeyei. Nyɛkanea Jajelɔ 9:10 lɛ, ni nyɛsusua sanebimɔ nɛɛ he:

Ani gbohii lɛ baanyɛ aye wɔ awui?

Biblia mli anɔkwale lɛ buɔ wɔhe koni wɔkajá gbohii lɛ, ni ebuɔ wɔhe hu ni wɔkafee kusumii ni mɛi feɔ koni gbohii lɛ amli akafu amɛ lɛ. Nyɛkanea Yesaia 8:19 kɛ Kpojiemɔ 4:11 lɛ, ni nyɛsusua sanebimɔ nɛɛ he:

Kɛ́ mɔ ko jáa gbohii loo efeɔ nibii koni gbohii lɛ awa lɛ lɛ, kɛ́ okwɛ lɛ, te Yehowa baana lɛ ehã tɛŋŋ?

Mfonirii ni ato naa: Kusumii ni afeɔ kɛwoɔ gbohii lɛ ahiɛ nyam. 1. Nuu ko ekula shi yɛ sai ko kɛ enɔ niyenii hiɛ eesɔle. 2. Hii etɛ komɛi wo atadei ni akɛfeɔ kusumii ahaa gbohii, ni amɛmiijo. 3. Aaye Gbohii Agbi Jurɔ ni mɛi ebu gbele wu mask, ni amɛhiɛ gbele wu yitsei wujiwuji kɛmiishi akoŋ. — Anɔkwale ni kɔɔ gbele he lɛ hãa wɔyeɔ wɔhe kɛjeɔ kusumii ni esaaa Yehowa hiɛ lɛ ahe

5. Kɛ́ wɔle anɔkwale ni kɔɔ gbele he lɛ, eshɛjeɔ wɔmii

Atsɔɔ mɛi pii akɛ, kɛ́ amɛgboi lɛ abaagbala amɛtoi yɛ nibii gbohii ni amɛfee lɛ hewɔ. Shi eŋɔɔ wɔnaa akɛ wɔbale akɛ mɔ ko mɔ ko piŋŋ yɛ egbele sɛɛ—mɛi ni efee eshai ni yɔɔ hiɛdɔɔ waa lɛ po piŋŋ. Nyɛkanea Romabii 6:7 lɛ, ni nyɛsusua sanebimɔ nɛɛ he:

Biblia lɛ tsɔɔ akɛ, kɛ́ mɔ ko gbo lɛ abuɔ lɛ bem kɛjeɔ ehe esha lɛ mli loo akɛ ehe esha lɛ keɔ lɛ. Hewɔ lɛ, kɛ́ okwɛ lɛ, mɛi ni egboi lɛ miipiŋ yɛ eshai ni amɛfee lɛ hewɔ?

Kɛ́ wɔbale Yehowa jogbaŋŋ lɛ, wɔbaana akɛ egbalaaa gbohii lɛ atoi yɛ gbɛ ko kwraa nɔ. Nyɛkanea 5 Mose 32:4 kɛ 1 Yohane 4:8 lɛ, ni nyɛsusua sanebimɔi nɛɛ ahe:

Kɛ́ okwɛ lɛ, Nyɔŋmɔ ni yɔɔ sui ni awie he yɛ ŋmalɛi nɛɛ amli lɛ baapiŋ mɛi ni egboi lɛ?
Ani anɔkwale ni kɔɔ gbele he lɛ ni oná ole lɛ, shɛjeɔ omii? Mɛni hewɔ okɛɔ nakai?

MƐI KOMƐI KƐƆ AKƐ: “Miishe gbeyei akɛ ekolɛ abaapiŋ mi yɛ migbele sɛɛ.”